ដោយៈរ៉ាណេត
ភ្នំពេញៈ ក្រុមហ៊ុន ASIA COMFORT INVESTMENT GROUP ដែលគេស្គាល់ថាជាក្រុមហ៊ុនដ៏ធំលំដាប់កំពូលប្រចាំនៅកម្ពុជា លើការផ្គត់ផ្គង់លើសេវាដឹកជញ្ជូន និងចាក់ខ្សាច់បំពេញគម្រោងអភិវឌ្ឍន៍ និងសាងសង់សំណង់នានា បាននិងកំពុងរៀបចំបំពេញឯកសារពាក់ព័ន្ធមួយចំនួន ដើម្បីត្រៀមសហការជាដៃគូជាមួយក្រុមហ៊ុន OCIC លើការបូមខ្សាច់ចាក់បំពេញ គម្រោងអភិវឌ្ឍន៍ព្រលានយន្ដហោះអន្តរជាតិភ្នំពេញថ្មី ក្នុងខេត្តកណ្តាល។
ប្រធានក្រុមប្រឹក្សាភិបាលក្រុមហ៊ុន ASIA COMFORT INVESTMENT GROUP លោកឧកញ៉ា ប៊ី សុក្របណ្ឌិតបានមានប្រសាសន៍ ប្រាប់តាមទូរស័ព្ទនៅល្ងាចថ្ងៃទី២៩ ខែកញ្ញាឆ្នាំ២០២០ថា ក្នុងរយៈពេលដ៏ខ្លីនៃការចាប់ផ្តើមក្រុមហ៊ុន ASIA COMFORT INVESTMENT GROUP លើការផ្តល់សេវាដឹកជញ្ជូនថ្ម ដី ជាពិសេស ការបូម និងផ្គត់ផ្គង់ខ្សាច់ លើគម្រោងអភិវឌ្ឍន៍នានានៅកម្ពុជា ក្រុមហ៊ុនបានពង្រីកវិសាលភាព និងកេរ្តិ៍ឈ្មោះដ៏ល្បីល្បាញ និងមានក្រុមហ៊ុនលំដាប់កំពូលធំៗជាច្រើនចូលរួមសហការជាដៃគូ។
លោកឧកញ៉ាបញ្ជាក់ថា “នៅក្នុងប្រតិបត្តិការអាជីវកម្មនាពេលបច្ចុប្បន្ននេះ ក្រុមហ៊ុន ASIA COMFORT INVESTMENT GROUP បានបង្កើនគ្រឿងចក្រពាក់ព័ន្ធធំជាច្រើនដើម្បីបម្រើដល់សេចក្ដីត្រូវការរបស់បណ្តាអ្នកអភិវឌ្ឍន៍ ដែលក្នុងនោះរួមមា នដូចជា រថយន្តដឹកខ្សាច់ធុនធំជាង២០០គ្រឿង សាឡង់ដឹកខ្សាច់មានជាង ១០០គ្រឿង រួមជាមួយនឹងម៉ាស៊ីនបូមខ្សាច់ខ្នាត់ធំ (អ៊ូ) មានរហូតដល់៥០គ្រឿង រួមជាមួយនឹងឧបករណ៍ និងម៉ាស៊ីនផ្សេងៗជាច្រើប្រភេទទៀត” ។
ជាបទពិសោធន៍របស់ក្រុមហ៊ុន ASIA COMFORT INVESTMENT GROUP បន្ទាប់ពីបើកដំណើរការកាលពីអំឡុងឆ្នាំ២០១៨ ក្រុមហ៊ុនធ្លាប់ទទួលបានកិច្ចសហការជាដៃគូជាមួយគម្រោងអភិវឌ្ឍន៍ក្នុងវិស័យសាងសង់ និងសំណង់ជាច្រើនគម្រោង ដែលក្នុងនោះរួមមានការផ្តត់ផ្គង់ ថ្ម ខ្សាច់ ផ្ដាច់មុខក្នុងគម្រោងអភិវឌ្ឍន៍បុរីជាច្រើន នៅក្នុងខេត្តកំពង់ធំ គម្រោអភិវឌ្ឍន៍នៅក្នុងរាជធានីភ្នំពេញ គម្រោងអភិវឌ្ឍន៍នៅក្នុងខេត្តកណ្តាល ជាពិសេសគម្រោងអភិវឌ្ឍន៍ដ៏ធំ របស់ក្រុមហ៊ុនអន្តរជាតិ Prince Real Estate (Cambodia) Group នៅក្រុងព្រះសីហនុ។
លោកឧកញ៉ា ប៊ី សុក្របណ្ឌិត បានឲ្យដឹងផងដែរថា ក្រុមហ៊ុនធ្លាប់សហការជាដៃគូជាមួយក្រុមហ៊ុនអភិវឌ្ឍន៍ វិស័យសំណង់ដ៏ធំ Prince នៅក្រុងព្រះសីហនុ ហើយបច្ចុប្បន្ននេះ យើងក៏កំពុងរៀបចំឯកសារពាក់ព័ន្ធមួយចំនួន ដើម្បីស្នើសុំសហការជាដៃគូក្នុងការផ្គត់ផ្កង់លើការចាក់ដីបំពេញ នៅក្នុងគម្រោងដ៏ធំប្រចាំប្រទេសមួយទៀត របស់ក្រុមហ៊ុនអ្នកឧកញ៉ា ពុង ឃាងសែ ដែលសាងសង់ព្រលានយន្តហោះអន្តរជាតិភ្នំពេញថ្មី ដែលស្ថិតនៅក្នុងខេត្តកណ្តាល ហើយប្រសិនបើគម្រោងសហការថ្មីមួយនេះ អាចទទួលបានមែន នោះវាគឺជាសមិទ្ធផលប្រវត្តិសាស្ត្រមួយទៀត សម្រាប់ក្រុមហ៊ុនរបស់យើង។
ព្រលានយន្តហោះថ្មីនេះ ត្រូវបានរចនាឡើងលំដាប់ថ្នាក់ 4F ជាអាកាសយានដ្ឋានធំបំផុតលំដាប់ទី៩ នៅក្នុង ពិភពលោកដែលស្ថិតនៅលំដាប់ពីក្រោយ អាកាសយានដ្ឋាន Chicago O’Hare និងលំដាប់មុខ អាកាសយានដ្ឋានអន្តរជាតិទីក្រុងប៉េកាំង របស់ប្រទេសចិន។ នៅពេលសាងសង់ចប់អាកាសយានដ្ឋានថ្មីនេះនឹង សមត្ថភាពទទួលយន្តហោះដឹកជញ្ជូនធុនធ្ងន់ផ្លូវឆ្ងាយ។
គម្រោងព្រលានយន្តហោះអន្តរជាតិភ្នំពេញថ្មី នឹងត្រូវសាងសង់លើផ្ទៃដីទំហំសរុប ២៦០០ហិកតា ស្ថិតនៅព្រំប្រទល់រវាងខេត្តកណ្តាល និងខេត្តតាកែវ។ ទំហំដីនៅខេត្តកណ្ដាល ២២២៧ ក្បាលដី = ២៤៤១ ហិកតា និងខេត្តតាកែវ ៣៦០ ក្បាលដី = ១៥៨ ហិកតា ជាមួយនឹងទុនវិនិយោគ១៥០០លានដុល្លារ របស់ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ដោយដំណាក់កាលទីមួយ នឹងត្រូវបញ្ចប់ការសាងសង់ក្នុងឆ្នាំ២០២៣ ៕
