ដោយស៊ីវ ម៉េង
ភ្នំពេញៈ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA)បានប្រកាសជូនដំណឹងពីការបោះឆ្នោតជ្រើសរើសប្រធានប្រតិបត្តិ និងសមាសភាពក្រុមប្រឹក្សាភិបាលសំរាប់អាណត្តិថ្មីសំរាប់ឆ្នាំ២០២០ ២០២២ខាងមុខ។
យោងតាមសេចក្តីជូនដំណឹងរបស់សមាគមនេះបានឲ្យដឹងថា ដោយមានការផ្អាកបន្តនូវសកម្មភាពជួបជុំ ដែលមានអ្នកចូលរួមលើសពី២០នាក់របស់រាជរដ្ឋាភិបាល ដើម្បីចូលរួមទប់ស្កាត់ និងគោរពតាមការណែនាំរបស់រដ្ឋាភិបាល ដូច្នេះការបោះឆ្នោតត្រូវបានរៀបចំឡើង មិនមានការជួបជុំលើសពី២០នាក់ គឺបោះឆ្នោតម្តងមួយៗតាមរយៈហឹបឆ្នោត ចំពោះមុខគណកម្មការនៃការរៀបចំការបោះឆ្នោត និងអ្នកសង្កេតការណ៍ដោយរក្សាគម្លាត និងអនាម័យទៅតាមស្តង់ដា។
ចំពោះការឃោសនា និងដំណើរការនៃកម្មវិធីត្រូវធ្វើឡើង តាមរយៈកម្មវិធីZoom ដែលការបោះឆ្នោតនេះ ប្រព្រឹត្តិទៅនៅថ្ងៃទី២៣ ធ្នូ ឆ្នាំ២០២០ខាងមុខនេះ ចាប់ពីម៉ោង៩ព្រឹក ដល់ម៉ោង៤ល្ងាចនៅអគ្គលេខធិកាដ្ឋានសមាគម អាគារលេខ៥០ ជាន់ទី៣ ផ្លូវលេខ៥១៦ កែងនឹងផ្លូវលេខ៣១៧ សង្កាត់បឹងកក់១ ខ័ណ្ឌទួលគោក រាជធានីភ្នំពេញ។
សេចកក្តីជូនដំណឹងរបស់សមាគមបានបន្តថា អាស្រ័យដូចបានជំរាបជូនខាងលើ សូមបេក្ខភាពប្រធានសមាគម និងក្រុមប្រឹក្សាភិបាល ព្រមទាំងសមាជិកដែលមានសិទ្ឋបោះឆ្នោត សូមអញ្ជើញមកបោះឆ្នោត ដើម្បីឲ្យការបោះឆ្នោតដំណើរការដោយរលូន និងមានប្រសិទ្ឋភាពខ្ពស់៕
