ដោយគង់ សូរិយា
ភ្នំពេញៈ កត្តានគរូបនីយកម្ម និងប្រជាសាស្ត្របានធ្វើឲ្យស្រុកចំនួន៦ក្នុងខេត្តក ណ្តាលមានភាពរីកចម្រើនលឿនជាងគេ ដោយសារទទួលឥទ្ឋិពលពីរាជធានីភ្នំពេញដែលមានការរីកចម្រើនយ៉ាងលឿន។
បណ្តាស្រុកទាំងនោះរួមមាន ស្រុកកៀនស្វាយ ស្រុកពញ្ញាលឺ ស្រុកអង្គស្នួល ស្រុកខ្សាច់កណ្តាល និងក្រុងតាខ្មៅជាដើម។
ប្រធានសមាមគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា សម្រាប់ដីនៅតាមបណ្តាស្រុកសំខាន់ៗ ព័ទ្ឋជុំវិញរាជធានីភ្នំពេញ គឺកំពុងតែមានភាពទាក់ទាញខ្លាំង ដែលអាចផ្តល់ឱកាសយ៉ាងល្អប្រសើរទៅដល់បណ្តាអ្នកវិនិយោគនានា ទាំងការទិញ-លក់ ក៏ដូចជាអ្នកអភិវឌ្ឍលើគម្រោងសំណង់លំនៅដ្ឋាន។ ដ្បិតដីនៅតំបន់នេះ មានវិសាលភាពធំទូលាយ តម្លៃនៅមានកម្រិត ជាពិសេសមានអំណោយផលពីធម្មជាតិ ដូចជា មានដងទន្លេនៅអមជាមួយដែលផ្តល់បរិយាកាសរស់នៅយ៉ាងគាប់ប្រសើរ មានស្ពានដែលនឹងតភ្ជាប់ពីតំបន់ក្តីតាកុយទៅអរិយក្សត្រ ។
លោកបន្តថា ខេត្តកណ្តាលព័ទ្ឋជុំវិញរាជធានីភ្នំពេញ ដែលមានសក្តានុពលជាច្រើន ដោយសារតំបន់នេះមានតំបន់សេដ្ឋកិច្ចពិសេស គម្រោងផ្លូវក្រវ៉ាត់ក្រុងទី៣ ដែលជាផ្លូវសេដ្ឋកិច្ចដ៏ធំ កំពង់ផែលំដាប់អន្តរជាតិ ការបញ្ចប់ផ្លូវជាតិលេខ១ ដែលជាផ្លូវតភ្ជាប់ច្រករបៀងភាគខាងត្បូងជាដើម” ។
លើសពីនេះទៅទៀត អ្វីដែលជាការគួរឱ្យកត់សម្គាល់នោះ បច្ចុប្បន្ននេះ មានអ្នកវិនិយោគជាច្រើន បាននិងកំពុងតែបញ្ចេញសកម្មភាពយ៉ាងសកម្ម ទៅលើគម្រោងពុះដីឡូតិ៍ព្រោងព្រាត ក៏ដូចជា គម្រោងអភិវឌ្ឍសំណង់លំនៅដ្ឋានតម្លៃមធ្យម និងក្រោមធម្យម ដែលរឹតតែធ្វើឱ្យដីតំបន់កៀនស្វាយកាន់តែមានប្រជាប្រិយភាពខ្ពស់។
លើកឡើងស្រដៀងគ្នានេះ លោកឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisal បានមានប្រសាសន៍ឲ្យដឹងផងដែរថា បច្ចុប្បន្ន និងទៅអនាគត ស្រុកកៀនស្វាយ និងបណ្តាស្រុកមួយចំនួនទៀត មានសក្ដានុពលខ្លាំងមិនចាញ់ តំបន់ជុំវិញរាជធានីភ្នំពេញនោះឡើយ ដែលនេះជាចំណុចល្អប្រសើរ សម្រាប់អ្នកវិនិយោគស្វែងរកភាគចំណេញ ក៏ដូចជាសម្រាប់អ្នកសង់លំនៅដ្ឋានផងដែរ។
លោកឧកញ៉ាបន្តថា “សព្វថ្ងៃនេះដោយសារតែផ្ទៃដី នៅក្នុងក្រុងមានភាពចង្អៀត និងមានតម្លៃថ្លៃផងនោះ បានជំរុញឱ្យបណ្តាអ្នកវិនិយោគនានា ងាកទៅកាន់តំបន់ជាយក្រុង។លោកបន្តថា ស្រុកកៀនស្វាយ និងបណ្តាស្រុកដទៃទៀត បាននិងកំពុងស្ថិតក្នុងក្រសែភ្នែករបស់អ្នកជំនួញផ្នែកដីធ្លីទាំងអស់នោះដែរ” ៕
