ដោយៈប៊ី
ភ្នំពេញៈ ខេត្តសៀមរាបនឹងស្វាគមន៍ឆាយណាថោនជាលើកដំបូង ដែលអភិវឌ្ឍន៍ដោយ ក្រុមហ៊ុនណាហ្គា ខប (NagaCorp) នៅក្នុងគម្រោងអភិវឌ្ឍន៍ថ្មីមួយរបស់ខ្លួន ដែលគ្រោងនឹងបោះទុនវិនិយោគ ៣៥០លានដុល្លារ។
ក្រុមហ៊ុនណាហ្គាខប កាលពីថ្មីៗនេះ បានបង្ហាញផែនការអភិវឌ្ឍរមណីយដ្ឋានមិនមានល្បែង ក្នុងទំហំទឹកប្រាក់វិនិយោគចំនួន៣៥០លានដុល្លារ នៅខេត្តសៀមរាបក្នុងគោលបំណងលើកកម្ពស់តំបន់ប្រាសាទអង្គរវត្ត ដែលបានចុះបញ្ជីជាបេតិកភណ្ឌពិភពលោក។
យោងតាមសេចក្តីក្រុមហ៊ុនណាហ្គា ខបកាលពេលថ្មីៗនេះបានឱ្យដឹងថា គម្រោងអភិវឌ្ឍថ្មីរបស់ក្រុមហ៊ុន ណាហ្គា ខប នឹងត្រូវបញ្ចប់នៅឆ្នាំ២០២៥ មុនពេលគម្រោងណាហ្គា៣ តម្លៃ៣.៥០០ លានដុល្លារ បើកដំណើរការ ហើយគម្រោងនៅសៀមរាបនេះ នឹងបញ្ចូលសណ្ឋាគារលំដាប់ប្រណីត សួនទឹក សួនឧទ្យានដែលបំពាក់បច្ចេកវិទ្យាទំនើប ប្រឡាយទឹកស្អាត កន្លែងកម្សាន្តតាមដងទឹក និងកន្លែងធុរកិច្ច។
គម្រោងនេះ ក៏នឹងមានមណ្ឌលកម្សាន្តមួយឈ្មោះថា “សៀមរាបឆាយណាថោន” ផ្តល់ជូននូវអាហារ Street Food ហាង តន្ត្រី និងការដើរទិញឥវ៉ាន់ ដែលនឹងត្រូវបានរួមបញ្ចូលជាមួយនឹងសួនច្បារ អមដោយប្រព័ន្ធទឹកស្រស់ស្អាត និងមានដំបូលការពារអាកាសធាតុ ដែលជួយលើកកម្ពស់ខ្យល់ និងពន្លឺធម្មជាតិទន់។
ដោយដាក់ឈ្មោះជាផ្លូវការនូវ “បឹងអង្គរអច្ឆរិយៈ ឬ Angkor Lake of Wonder” នៅលើផ្ទៃដី៧៥ហិកតា វានឹងក្លាជាគម្រោងធំជាងទំហំរួមនៃ Disneyland និង Disney California នៅ Los Angeles ។
ក្រុមហ៊ុនណាហ្គាខបបានឱ្យដឹងថា ការអភិវឌ្ឍន៍នេះនឹងបម្រើដល់គោលបំណងជាច្រើនដូចជា ការបង្កើនដំណើរទស្សនកិច្ចរបស់ភ្ញៀវទេសចរជាតិ អន្តរជាយិទៅកាន់ខេត្តសៀមរាប ស្របពេលណាហ្គាវើលអនុវត្តយុទ្ធសាស្ត្រ ធ្វើដំណើរថ្មីភ្ជាប់ខេត្តសៀមរាបនិងភ្នំពេញ។ ក្រុមហ៊ុននេះមានបំណងអនុវត្តយុទ្ធសាស្ត្រ ធ្វើការជាមួយភ្នាក់ងារទេសចរណ៍តាមអ៊ិនធឺរណែត និងភ្នាក់ងារទេសចរណ៍ប្រទេសចិន និងកន្លែងផ្សេងទៀត ដើម្បីផ្តល់ជូននូវដំណើរកម្សាន្ត ដោយផ្អែកលើមូលដ្ឋានពេញលេញ ក្នុងខេត្តសៀមរាប និងរាជធានីភ្នំពេញ។
ទីប្រឹក្សាសមាគមអចលនទ្រព្យសកល លោកយិន លាងគង់បានមានប្រសាសន៍ថា វាមិនមែនជារឿងចម្លែកនោះទេ ដែលក្រុមហ៊ុនម៉ាឡេស៊ីដ៏ធំនេះ វិនិយោគទឹកប្រាក់ត្រឹម៣៥០លានដុល្លារនៅទីក្រុងសៀមរាប តាមពិតនេះជាការធ្វើពិពិធកម្មវិនិយោគរបស់ពួកគេនៅកម្ពុជា ព្រោះនៅកម្ពុជានៅមានឳកាសជាច្រើនទៀត ដែលក្រុមហ៊ុនបរទេសកំពុងសម្លឹងមក។
លោកបន្តថា “ការវិនិយោគរបស់ Naga Corp បានមើលឃើញផលចំណេញរួចទៅហើយ ព្រោះខេត្តសៀមរាប ក្រៅពីសំណង់ប្រាសាទដ៏មហស្ចារ្យ មិនមានអ្វីឲ្យភ្ញៀវទេសចរណ៍ចាប់អារម្មណ៍ទៀតទេ” ។ លោកបន្តថា “ការធ្វើពិពិធកម្មផលិតផលទេសចរណ៍ជារឿងចាំបាច់បំផុត ដើម្បីជម្រុញឲ្យខេត្តនេះ ទាក់ទាញបាននូវការចាប់អារម្មណ៍ពីភ្ញៀវជាតិ អន្តរជាតិ អាចសម្រាកលំហែរបានយូរ និងចំណាយប្រាក់ច្រើននៅទីនោះ៕
