ដោយគង់ សូរិយា
ភ្នំពេញៈ លំនៅដ្ឋាបបសហកម្មសិទ្ឋ កាន់តែមានភាពពេញនិយមក្នុងស្រទាប់ពលរដ្ឋខ្មែរ ប៉ុន្តែពួកគេភាគច្រើនទំនងជាមិនទាន់បានដឹង ពីករណីឧបទ្ទវហេតុណាមួយកើតឡើង ដូចជា ករណីអាគារដួលរលំ ឬភ្លើងឆេះខ្ទេច តើត្រូវធ្វើបែបណាឡើយ។
ករណីបែបនេះ ទំនងជាមិនត្រូវបានពន្យល់លំអិត ដោយភ្នាក់ងារអចលនទ្រព្យនៅកម្ពុជាបានលំអិតនៅឡើយទេដោយសារវាជាករណីរសើបបំផុត។
គេហទំព័រ Propertyarea.asia សូមលើកយកចំណេះដឹងមួយចំនួន ដើម្បីជាការចែករំលែកចំណេះដឹងដល់អ្នកវិនិយោគ ឬអ្នកចង់រស់នៅក្នុងអាគារសហកម្មសិទ្ឋ។
ទិញអាគារខុនដូដែលមានការធានារ៉ាប់រង
សម្រាប់ក្រុមហ៊ុនដែលមានស្តង់ដាអន្តរជាតិ ពិតប្រាកដ ពួកគេប្រាកដជាបានទិញធានារ៉ាប់រងលើអាគារខុនដូ ឬអាគារបែបសហកម្មសិទ្ឋរបស់ពួកគេ ដើម្បីបង្ការហានិភ័យណាមួយកើតឡើង ពួកគេនឹងទទួលបានសំណងសម្រាប់គំរោងរបស់ពួកគេ និងងាយដោះស្រាយបញ្ហាជាមួយម្ចាស់លំនៅដ្ឋាននិមួយ។
គំរោងខុនដូនៅកម្ពុជា មួយចំនួនមិនបានទិញធានារ៉ាប់រងទេ ដោយសារវាជាទីផ្សារថ្មី ដែលច្បាប់បទដ្ឋានគតិយុត្តិនានារបស់រដ្ឋាភិបាលមិនបានពង្រឹង ឬរៀបចំនៅឡើយ ដោយសារវិស័យឯកជនបានដើរលឿនជាង ការអភិវឌ្ឍពីផ្នែកឯកជន។
អ្នកគួរសិក្សាពីកំពស់នៃធ្នឹមនិមួយៗ
ធ្នឹមនិមួយៗ ឬកំពស់ពីជាន់មួយទៅជាន់មួយទៀត ឲ្យបានច្បាស់លាស់ ដើម្បីធ្វើឲ្យប្រាកដថា អ្នកមិនរស់នៅក្នុងប្រអប់ ដែលធ្វើឲ្យបរិយាកាសហប់ ពិបាកដកដង្ហើម និងមិនផ្តល់ផាសុខភាពដល់អ្នករស់នៅ។
លោក អ្នកក៏គួរសិក្សាពីប្រវត្តិ សាវតារបស់ក្រុមហ៊ុនសាងសង់ផងដែរ ព្រោះក្រុមហ៊ុន ដែលគ្មានស្តង់ដាអន្តរជាតិ ពួកគេគិតតែផលចំណេញ ដោយមិនគិតពីសុខមាលភាពអ្នករស់នៅឡើយ។
បើភ្លើងឆេះឬដួលរលំអាគារត្រូវធ្វើដូចម្តេច?
ករណីបើអ្នកវិនិយោគចំលើខុនដូ ដែលមានការទិញធានារ៉ាប់រងត្រឹមត្រូវ អ្នកនឹងទទួលបានខុនដូឡើងវិញ បើសិនជាអ្នកទិញខុនដូចាប់ពី៦០ភាគរយ ឡើងទៅយល់ព្រមឲ្យមានការសាងសង់ឡើងវិញ ប៉ុន្តែប្រសិនជាម្ចាស់ខុនដូ មានចំនួនតិចជាង៦០ភាគរយ យល់ព្រមសាងសង់ឡើងវិញ វានឹងមានការជជែកគ្នាបន្ថែមទៀត នៅពេលករណីមានករណីប្រធានស័ក្តិណាមួយកើតឡើង។
ហេតុនេះអ្នកត្រូវតែប្រាកដថា ក្រុមហ៊ុនវិនិយោគខុនដូដែលអ្នកបានទិញ ជាក្រុមហ៊ុនមានស្តង់ដា ជាក្រុមហ៊ុនគោរពតាមបទដ្ឋានអភិវឌ្ឍន៍ជាលក្ខណៈអន្តរជាតិ និងជាក្រុមហ៊ុនដែលផ្តោតលើផលប្រយោជន៍អតិថិជនផងដែរ ជាជាងគិតតែផលប្រយោជន៍ផ្ទាល់ខ្លួន៕
