ដោយ:ស៊ីវ ម៉េង
ភ្នំពេញៈ ការសិក្សាថ្មីមួយដែលធ្វើឡើង ដោយក្រុមហ៊ុនCBRE Cambodiaបានរកឃើញថា ទីផ្សារដីធ្លីជាផ្នែកមានសក្តានុពលជាងគេ នៅក្នុងឆ្នាំ២០២១នេះ ដែលដីធ្លីនៅតាមបណ្តារាជធានី ខេត្តមួយចំនួននឹងកើនឡើងតម្លៃ។
អ្នកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ក្នុងកិច្ចសម្ភាសន៍ពិសេសកាលពីម្សិលម៉ិញនេះថា ឆ្នាំ២០២១នេះ ដីធ្លីជាផ្នែកដែលមានភាពលេចធ្លោជាងគេ ក្នុងវិស័យអចលនទ្រព្យ ដោយសារមានតម្រូវការកើនឡើង ប៉ុន្តែមិនមែនមានន័យថាគ្រប់ខេត្តសុទ្ឋតែទទួលបានសញ្ញាវិជ្ជមាននោះទេ។
លោកស្រីបន្តថា “អ្វីៗវាអាស្រ័យលើសក្តានុពលរបស់តំបន់និមួយៗ ពិសេសការអភិវឌ្ឍហេដ្ឋារចនាសម្ព័ន្ឋរបស់រដ្ឋាភិបាល”។ លោកស្រីបន្តថា “ដីធ្លីនៅរាជធានីភ្នំពេញនឹងបន្តឡើងថ្លៃនៅតំបន់មួយចំនួន ខេត្តកណ្តាល ព្រះសីហនុ និងខេត្តសៀមរាបតម្លៃដីធ្លី និងតម្រូវការប្រើប្រាស់ដីធ្លីនឹងកើនឡើង”។
អ្នកស្រីបន្តថា ទោះជាយ៉ាងណា ការកើនឡើងតម្លៃដីធ្លីមិនខ្ពស់នោះទេ ដោយសារលំហូរទុនវិនិយោគផ្ទាល់ពីបរទេស(FDI) នឹងស្ថិតនៅមានកម្រិត បើទោះជាអ្នកជំនាញជាតិ អន្តរជាតិ និងរដ្ឋាភិបាលមានសុទិដ្ឋិនិយមច្រើន លើកំនើនសេដ្ឋកិច្ចកម្ពុជាក្នុងឆ្នាំនេះក្តី។
អ្នកស្រីបន្តថា “ការកើនឡើងតម្លៃដីធ្លី វាអាស្រ័យលើគោលនយោបាយរបស់រដ្ឋាភិបាល អាស្រ័យលើផែនការអភិវឌ្ឍន៍ កំនើនសេដ្ឋកិច្ច និងសក្តានុពលរបស់តំបន់និមួយៗ”៕
