ដោយៈ រ៉ាណេត
ភ្នំពេញៈ នៅត្រឹមរយៈពេលជិត២ទសវត្សរ៍ចុងក្រោយនេះ វិស័យអចលនទ្រព្យកម្ពុជាមានភាពរីកចម្រើន និងអភិវឌ្ឍន៍យ៉ាងខ្លាំង ជាពិសេសបានកែប្រែតំបន់ដាច់ស្រយាល តំបន់ដីទំនេរទៅ ជាបណ្តុំសំណង់អគារយ៉ាងស្អេកស្កះ។
ប៉ុន្តែជាមួយនឹងវឌ្ឍនភាពទាំងអស់នេះ អ្នកជំនាញអចលនទ្រព្យលំដាប់អន្តរជាតិបានលើកឡើងថា ភាពរីកចម្រើននៃវិស័យអចលនទ្រព្យ ជាពិសេសផ្នែកសំណង់នាពេលបច្ចុប្បន្ននេះ គឺនៅតែប្រឈមទៅនឹងបញ្ហានៅឡើយ។
នាយិកាប្រចាំប្រទេសក្រុមហ៊ុនអន្តរជាតិប្រចាំនៅកម្ពុជា CBRE Cambodia លោកស្រីអាន សុធីតា បានមានប្រសាសន៍ឱ្យដឹងនៅល្ងាចថ្ងៃទី១៩ ខែកុម្ភៈ ឆ្នាំ២០២១ថា ក្នុង រយៈពេលជិត២០ឆ្នាំចុងក្រោយនេះ វិស័យអចលនទ្រព្យនៅកម្ពុជា ពិតជាមានភាពរីកចម្រើនខ្លាំង ជាមួយនឹងការកកើតនូវសំណង់អាគារតូច ធំយ៉ាងស្អេកស្កះ ជាពិសេសសំណង់អគារខ្ពស់ៗ បានសាងសង់ព្រោងព្រាត នៅក្នុងរាជធានីភ្នំពេញក្នុងនាមជាមជ្ឈមណ្ឌលពាណិជ្ជកម្មកម្រិតខ្ពស់ប្រចាំប្រទេស។
លោកស្រីបានបញ្ជាក់ថា “កាលពីប្រមាណ២០ឆ្នាំមុន នៅពេលនិយាយពីទីផ្សារអចលនទ្រព្យ ហាក់មិនមានអ្នកស្គាល់ច្បាស់ច្រើននោះទេ ហើយចំពោះអ្នករកស៊ីនៅក្នុងវិស័យនេះ ភាគច្រើនអ្នកមានលុយ គឺមានទិញទុកសម្រាប់លក់បន្តតែប៉ុណ្ណោះ ដោយមិនមានគំនិត ឬគម្រោងអភិវឌ្ឍដីទំនេរឱ្យលេចចេញជាសំណង់ សម្រាប់បម្រើផលប្រយោជន៍ក្នុងវិស័យណាមួយនោះទេ” ។
លោកស្រីបន្តថា អ្វីដែលជាការគួរឱ្យកត់សម្គាល់ខ្លាំង គឺទើបតែប្រមាណ១០មុននេះ ក្រោយពេលមានក្រុមហ៊ុនបរទេសចូលមកវិនិយោគ និងអភិវឌ្ឍន៍នៅកម្ពុជាដែលក្រៅពីនាំយកទុន បច្ចេកទេស និងជំនាញមកជាមួយនោះ បានជួយផ្តល់ជាបទពិសោធន៍ដល់អ្នកក្នុងស្រុកឱ្យមានគំនិត និងគម្រោងអភិវឌ្ឍន៍ក្នុងវិស័យសំណង់បន្តិចម្ដងៗដោយ ផ្តើមចេញពីការអភិវឌ្ឍផ្នែកលំនៅដ្ឋាន ក្រោយមកមានផ្នែកសណ្ឋាគារ ផ្សារសហគមន៍ អគារការិយាល័យ និងផ្សារទំនើបជាបន្តបន្ទាប់រហូតមកដល់សព្វថ្ងៃនេះ។
ជាមួយនឹងការលើកឡើងពីភាពរីកចម្រើន និងការអភិវឌ្ឍន៍ខាងលើនេះ លោកស្រីអាន សុធីតា បានលើកឡើងផងដែរថា បើទោះជាវិស័យអចលនទ្រព្យ និងសំណង់នៅកម្ពុជាមានភាពរីកចម្រើន ដូចការមើលឃើញនាពេលបច្ចុប្បន្ននេះ ប៉ុន្តែបញ្ហានិងភាពប្រឈមនៅក្នុងភាពរីកចម្រើននេះនៅតែមាន ដែលអាចបង្កជាបញ្ហានៅពេលអនាគត។
លោកស្រីបញ្ជាក់ថា សម្រាប់តែក្នុងរាជធានីភ្នំពេញ ដោយសារមិនទាន់មានការកំណត់តំបន់ និងទំហំនៃការអភិវឌ្ឍ យើងឃើញមានសំណង់អគារតូចធំ ទាបខ្ពស់ ហាក់មានភាពរប៉ាត់រប៉ាយលាយឡំគ្នា ដែលមិនទាន់មានការកំណត់ឱ្យបានច្បាស់លាស់ថា តំបន់សម្រាប់អភិវឌ្ឍសំណង់អគារការិយាល័យជួល តំបន់ណាជាសំណង់ខុនដូ តំបន់ជាតំបន់មជ្ឈមណ្ឌលពាណិជ្ជកម្ម ពោលគឺអាស្រ័យតែលើអ្នកវិនិយោគ និងអភិវឌ្ឍន៍ដែលចង់បានទីតាំងណាសង់នៅទីតាំងនោះបាន ដែលវាអាចនឹងកើតមានជាបញ្ហានៅថ្ងៃក្រោយ ហើយទាំងអស់នេះ ជាកំហុសដែលកើតមានឡើងពីអ្នកវិនិយោគ និងអភិវឌ្ឍន៍ កំហុសពីក្រុមហ៊ុនផ្តល់យោបល់ ក៏ដូចជាកើតចេញពីស្ថាប័ន ដែលពាក់ព័ន្ធផងដែរដោយសារតែមិនមានការគ្រប់គ្រងច្បាស់លាស់នៅឡើយ។
លោកស្រីថា “នេះជាបញ្ហាធំដែលយើងមើលរំលង ប្រសិនបើនៅតំបន់មួយដែលមិនមានការបែងចែក និងកំណត់គ្រប់គ្រងឱ្យបានច្បាស់លាស់ នោះហេដ្ឋារចនាសម្ព័ន្ធក្នុងតំបន់អភិវឌ្ឍន៍ទាំងនោះ មិនអាចទទួលយកបាននោះទេ និយាយតែការចរាចរណ៍តែមួយមុខក៏ជាបញ្ហា ដែលកើតចេញពីការមើលរំលងបញ្ហាមួយនេះដែរ” ។ លោកស្រីបន្ថែមថា “ ដូច្នេះត្រូវតែមានការកំណត់នូវប្រភេទសំណង់ កំណត់នូវទំហំនៃការសាងសង់អាគារឱ្យបានត្រឹមត្រូវ ទើបមានការអភិវឌ្ឍរក្សាបាននូវភាពល្អប្រសើរជានិរន្តរភាព” ៕
