ដោយៈគង់ សូរិយា
ភ្នំពេញៈ ស្ថាបនិកនិងជាអគ្គនាយកគេហទំព័រ Propertyarea.asia លោកយិន លាងគង់ ដែលបានតាមដានការវិវត្តនៃវិស័យ អចលនទ្រព្យបានបង្ហាញពីទីតាំងដី និងតម្លៃដីដែលងាយទទួលបានផលចំណេញ និងលក់ចេញបានឆាប់រហ័ស។
ជាទីប្រឹក្សាសមាគមអចលនទ្រព្យសកលផងដែរ លោកយិន លាងគង់ បានមានប្រសាសន៍ឲ្យដឹងកាលពីពេលថ្មីៗនេះថា ប្រសិនជាអ្នកវិនិយោគដីធ្លី ដែលងាយស្រួលក់ចេញនិងងាយស្រួករកអ្នកទិញ លោក អ្នកគួរសិក្សាពីតម្លៃ និងលទ្ឋភាពរបស់ប្រជាជនកម្ពុជាភាគច្រើន ព្រោះប្រជាជនកម្ពុជាភាគច្រើនជាអ្នកមានចំណូលមធ្យម ហេតុនេះលទ្ឋភាពរបស់ពួកគេក៏មានកម្រិតផងដែរ។
លោកបន្តថា “បើលោក អ្នកមានលទ្ឋភាពទិញដីវិនិយោគតម្លៃត្រឹម៥ ទៅ១០ម៉ឺនដុល្លារ លោក អ្នកគួរទិញដីក្នុងតម្លៃចន្លោះពី១០ទៅ៣០ដុល្លាររក្នុងមួយម៉ែត្រការ៉េ ព្រោះដដីមានតម្លៃប៉ុណ្ណឹងងាយឡើងថ្លៃ ប្រសិនជាមានទីតាំងល្អ ពិសេសជាយក្រុងភ្នំពេញ” ។លោកបន្តថា “បើអ្នកមានលទ្ឋភាព២០ទៅ៣០ម៉ឺនដុល្លារ លោក អ្នកក៏គួរវិនិយោគដីមិនលើស១០០ដុល្លាររក្នុងមួយម៉ែត្រការ៉េដែរ ព្រោះដីមានតម្លៃប៉ុណ្ណឹងឡើង អាចពិបាករកអ្នកទិញ” ។
លោកយិន លាងគង់បានបន្តថា យ៉ាងណាក៏ដោយដីមានតម្លៃថ្លៃ មិនមែនមិនមានផលចំណេញនោះទេ វាក៏មានផលចំណេញដែរ វាអាស្រ័យលើទីតាំងដែលមានភាពល្អប្រសើរឬអត់? ប៉ុន្តែការពិតលទ្ឋភាពរបស់ប្រជាជនកម្ពុជា ដែលមានប្រាក់ទិញដីតម្លៃចាប់ពី១០០ដុល្លារ ទៅ៥០០ដុល្លារ ឬ២០០០ដុល្លារ ទៅ៩០០០ដុល្លារក្នុងមួយម៉ែត្រការ៉េនៅមានកម្រិតនៅឡើយ។
លោកបន្តថា “ហេតុនេះការវិនិយោគលើដីធ្លី ដែលមានតម្លៃចន្លោះ៥ទៅ៣០ដុល្លារក្នុងមួយម៉ែត្រការ៉េ គឺជាតម្លៃសមរម្យ ដែលអ្នកមានជីវភាពមធ្យមអាចមានលទ្ឋភាពទិញបាន ហើយអ្នកមានលទ្ឋភាព ឬជីវភាពមធម្យមមានចំនួនច្រើនលើសលុបនៅកម្ពុជា” ៕
