កន្លែងកម្សាន្តដ៏ធំរបស់ក្រុមហ៊ុនហុងកុងនៅខេត្តកោះកុងមិនទាន់កំណត់ថ្ងៃបើកដំណើរការច្បាស់លាស់

ដោយៈ ម៉ាណេត

ភ្នំពេញៈ ក្រុមហ៊ុន Century Century International Holdings Limited ដែលចុះបញ្ជីនៅក្រុងហុងកុង បានឱ្យដឹងថា ពេលវេលាជាក់លាក់នៃការបើកដំណើរការកន្លែងកម្សាន្តរបស់ខ្លួននៅរមណីយដ្ឋានតារាសាគរ ក្នុងខេត្តកោះកុង មិនទាន់ត្រូវបានបញ្ជាក់នៅឡើយទេ ដោយសារវិបត្តិកូវីដ១៩។ នេះបើយោងតាមការចេញផ្សាយរបស់សារព័ត៌មាន ASGAM នៅថ្ងៃទី៣០ ខែមិថុនា ឆ្នាំ២០២១។

កាលពីពេលថ្មីៗនេះ ក្រុមហ៊ុន Century Entertainment បាននិងកំពុងដំណើរការផ្លាស់ប្តូរទីតាំងអាជីវកម្មរបស់ខ្លួនទៅកន្លែងកម្សាន្ត (កាស៊ីណូ) ថ្មី នៅដារ៉ាសាគរ នៅពេលដែលការផ្ទុះឡើងនៃជំងឺកូវីដ១៩នៅប្រទេសកម្ពុជាកាលពីខែមីនា។

ទោះបីជាយ៉ាងណាក៏ដោយ ក្រុមហ៊ុនបានឱ្យដឹងថា រាល់ការរៀបចំតុបតែង និងបំពាក់សម្ភារៈចាំបាច់នៃកាស៊ីណូថ្មីត្រូវបានបញ្ចប់ តែរង់ចាំការធ្វើតេស្តប្រព័ន្ធ និងការផ្តល់ការបណ្តុះបណ្តាលដល់បុគ្គលិកកាស៊ីណូ ប៉ុន្តែដោយមើលឃើញរលកថ្មីនៃការផ្ទុះឡើងនេះជំងឺកូវីដ១៩នោះ ពេលវេលាជាក់លាក់នៃការបើកដំណើរការកន្លែងកម្សាន្តរបស់ខ្លួន មិនទាន់ត្រូវបានបញ្ជាក់នៅឡើយទេ។

ក្រុមហ៊ុនបានឱ្យដឹងទៀតថា ខ្លួននឹងបន្តធ្វើការងារត្រៀមរៀបចំ និងខិតខំបើកដំណើរការឱ្យបានឆាប់ នៅពេលស្ថានភាពជំងឺកូវីដ១៩ នៅកម្ពុជាធូរស្បើយ ហើយបុគ្គលិកអាចផ្លាស់ប្តូរទៅទីក្រុងនេះ (តារាសាគរ) បាន។

កាលពីឆ្នាំ២០១៩ ក្រុមហ៊ុនCentury Entertainment បានចុះកិច្ចព្រមព្រៀងរយៈពេល៥ឆ្នាំ ជាមួយក្រុមហ៊ុន Lion King Entertainment Company Ltd ដែលលោក Ng Man Sun ជាម្ចាស់កាន់កាប់ទាំងស្រុង និងជាក្រុមហ៊ុនដែលគ្រប់គ្រងកាស៊ីណូខាងលើនេះ ដើម្បីដំណើរការតុល្បែងជាជួរចំនួន៤នៅកាស៊ីណូ របស់លោកស្ថិតក្នុងខេត្តព្រះសីហនុ។

ទោះជាយ៉ាងណា ដំណើរការកាស៊ីណូនានា បានបង្ខំចិត្តបិទទ្វារនៅខែមេសា ឆ្នាំ២០២០ ដោយសារការឆ្លងរាតត្បាតវីរុសកូវីដ-១៩ ដែលក្រោយមកលោក Ng Man Sun បានទម្លាយឱ្យដឹងថា លោកទទួលបានកិច្ចព្រមព្រៀងដ៏គួរឱ្យជាក់ទាញជាងនេះ នោះគឺការផ្លាស់ប្ដូរទីតាំងកាស៊ីណូរបស់លោក ទៅកាន់រមណីយដ្ឋានតារាសាគរ៕