ដោយៈសុខុម
ភ្នំពេញ: ទំនាក់ទំនងការទូតស្អិតរមួត បេះមិនចេញរវារាជរដ្ឋាភិបាលកម្ពុជានិងរដ្ឋាភិបាលក្រុងប៉េកាំង បានជួយឱ្យកម្ពុជា ទទួលបានឱកាសអភិវឌ្ឍន៍ប្រទេសក្នុងល្បឿនយ៉ាងលឿន ជាពិសេសក្នុងរយៈពេលប៉ុន្មានចុងក្រោយនេះ តួយ៉ាងដូចនៅក្រុងព្រះសីហនុ ជាដើម។
ការសិក្សាពី“ទីផ្សារទេសចរណ៍នៅក្រៅប្រទេសរបស់ចិន ឆ្នាំ២០២១-២០២៦” បានបង្ហាញពីសក្ដានុពលខ្ពស់របស់កម្ពុជា ត្រូវបានដាក់បញ្ចូលទៅក្នុងគេហទំព័រស្រាវជ្រាវទីផ្សារដ៏ល្បីល្បាញរបស់ប្រទេសអៀរឡង់ ឈ្មោះថា ResearchAndMarkets.com។ នេះបើយោងតាមសារព័ត៌មាន Business Wire ចុះផ្សាយកាលពីចុងសប្តាហ៍មុន ។
ទីផ្សារទេសចរណ៍នៅក្រៅប្រទេសរបស់ចិន ដែលរួមមានទាំងផ្សារកម្ពុជាផង នឹងទទួលបានកំណើនខ្ពស់ខ្លាំងនៅត្រឹមឆ្នាំ២០២៦ ជាមួយនឹងអត្រាកំណើនប្រចាំឆ្នាំ៣២%អំឡុងរយៈពេលនៃការព្យាករនេះ។
របាយការណ៍សិក្សាស្តីពី ទីផ្សារទេសចរណ៍នៅក្រៅប្រទេសរបស់ចិន នេះផ្តល់នូវការវិភាគជារួម ទំហំទីផ្សារ និងការព្យាករ និន្នាការ កត្តាជំរុញកំណើន និងបញ្ហាប្រឈមនានាព្រមទាំងការវិភាគ លើទីផ្សារប្រទេសចំនួន២៦ ដែលរួមទាំងប្រទេសកម្ពុជា យើងផងដែរ។
លទ្ធលផលនៃរបាយការណ៍នេះ គឺចេញពីការប្រើប្រាស់ទិន្នន័យ និងការវិភាគ ដើម្បីពិភាក្សាអំពីឱកាស ផ្ដល់ប្រាក់ចំណេញច្រើន និន្នាការបច្ចុប្បន្ន និងអនាគតទាក់ទងនឹងរំហូរទេសចរណ៍នៅក្រៅប្រទេសការរបស់ចិន ការចំណាយ គោលបំណងនៃការមកទស្សនា និងទីផ្សារគោលដៅសំខាន់ៗ។ របាយការណ៍នេះ ផ្តល់នូវចក្ខុវិស័យច្បាស់លាស់លើស្ថានការណ៍ វិវឌ្ឍន៍វិស័យទេសចរណ៍បច្ចុប្បន្ន និងអនាគត នៃទីផ្សារទេសចរណ៍នៅក្រៅប្រទេសរបស់ចិន។
លើសពីនេះទៅទៀត របាយការណ៍នេះប្រើប្រាស់ការវិភាគ ដែលផ្តោតលើប្រទេសនីមួយៗក្នុងចំណោមប្រទេសទាំង២៦ ដើម្បីស្វែងយល់លម្អិតអំពីទីផ្សារទេសចរណ៍នៅក្រៅប្រទេសរបស់ចិន។ កត្តាជំរុញ និងបញ្ហាប្រឈមនានាត្រូវបានសិក្សាលម្អិត ដើម្បីស្វែងយល់ឱ្យកាន់តែស៊ីជម្រៅអំពីទីផ្សារ និងស្វែងយល់ពីឱកាសកំណើននាពេលអនាគតរបស់ទីផ្សារ៕
