ដោយៈគង់ សូរិយា
ភ្នំពេញៈ អភិបាលរាជធានីភ្នំពេញ លោកឃួង ស្រេងបានថ្លែងថា
គិតត្រឹមដើមឆ្នាំ២០២២នេះ នៅរាជធានីភ្នំពេញមានសំណង់បុរី និងបណ្ដុំផ្ទះល្វែងចំនួន ៣១០ កន្លែង និងអគារខ្ពស់ៗ ចំនួន១៦០៣អគារ។
លោកឃួង ស្រេង អភិបាលនៃគណៈអភិបាលរាជធានីភ្នំពេញបានមានប្រសាសន៍ឲ្យដឹងបែបនេះ ក្នុងពិធីសម្ពោធជាផ្លូវការនៃផ្សារទំនើប ព្រីនស៍ថាមស៍សឃ្វែរ នាថ្ងៃទី៧ ខែមិថុនា ឆ្នាំ២០២២។
លោកបន្តថា បើទោះបីជាក្នុងឆ្នាំ២០២១ មានវិបត្តិជំងឺកូវីដ១៩ ក៏ដោយ ក៏រាជធានីភ្នំពេញ នៅតែបន្តទទួលបានគម្រោង សាងសង់ថ្មីៗចំនួន ១០៥០គម្រោង មានផ្ទៃក្រឡាសំណង់សរុប ប្រមាណ៤,៦៣លានម៉ែត្រក្រឡា ដែលមានទុនវិនិយោគ ទំហំប្រមាណ២,២៦ពាន់លានដុល្លារអាមេរិកបន្ថែមទៀត។
លោកឃួង ស្រេងបានបន្ថែមថា បើយោងតាមកំណើនសេដ្ឋកិច្ច កម្ពុជានឹងបន្តងើបឡើងវិញ នៅប៉ុន្មានឆ្នាំខាងមុខនេះ ស្របតាមការកើនឡើងនូវតម្រូវការសកល និងទំនុកចិត្តរបស់វិនិយោគិនទាំងក្នុងស្រុក និងបរទេស ដែលជាសក្តានុពលដ៏ធំ សម្រាប់ការវិនិយោគ ក្នុងវិស័យអចលនទ្រព្យជាពិសេស អគារពាណិជ្ជកម្ម សណ្ឋាគារ សំណង់បុរី អគារស្នាក់នៅរួម ខុនដូ និងផ្សារទំនើប។
យោងតាមរបាយការណ៍របស់ក្រុមហ៊ុន អចលនទ្រព្យលំដាប់អន្តរជាតិ CBRE Cambodia បានបង្ហាញក្នុងរបាយការណ៍ស្រាវជ្រាវរបស់ខ្លួន ថា ចំនួនគម្រោងបូរីនៅកម្ពុជានឹងបន្ដកើនឡើង ដោយព្យាករណ៍ថានឹងមានដល់ទៅជាង៣០០គម្រោង ត្រឹមចុងឆ្នាំនេះ ហើយនឹងកើនដល់ជិតដល់ចំនួន៤០០គម្រោង នៅចុងឆ្នាំ២០២៣ខាងមុខ៕
