ដោយ៖ សុផារី
កំពង់ស្ពឺ៖ កីឡដ្ឋានខេត្តកំពង់ស្ពឹ ដែលមានតម្លៃ៣លានដុល្លារ ត្រូវបានសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី០៦ ខែកញ្ញា ឆ្នាំ២០២២នេះ ក្រោមអធិបតីភាពលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។
កីឡដ្ឋានខេត្តកំពង់ស្ពឺនេះ បានបើកការដ្ឋានសាងសង់ជាផ្លូវការ កាលពីថ្ងៃទី២១ ខែកុម្ភៈ ឆ្នាំ២០២១ ក្រោមគំនិតផ្ដួចផ្ដើមរបស់លោក ហ៊ុន ម៉ានី តំណាងរាស្រ្ដមណ្ឌលកំពង់ស្ពឺ និងជាប្រធានសហភាពសហព័ន្ធយុវជនកម្ពុជា (ស.ស.យ.ក) ដោយចំណាយថវិកាជាង៣លានដុល្លារ។
កីឡដ្ឋានបាល់ទាត់ខេត្តកំពង់ស្ពឺ មានទីតាំងស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ដោយសាងសង់លើផ្ទៃដីជាង៤ហិកតា ដែលជាកីឡដ្ឋានមានលក្ខណៈស្ដង់ដារ អាចទទួលរៀបចំការប្រកួតក្នុងប្រទេស និងកម្រិតតំបន់បាន។
កីឡដ្ឋានបាល់ទាត់ខេត្តកំពង់ស្ពឺ ក្នុងដំណាក់កាលទី១ នៃការសាងសង់ បានបញ្ចប់ការសាងសង់ ដោយមានកន្លែងអង្គុយចំនួន៣០០០កៅអី និងទីតាំងសម្រាប់ភ្ញៀវ VIP ផងដែរ៕
