ដោយគង់ សូរិយា
ភ្នំពេញ៖ អាគារការិយាល័យ East Commercial ដែលស្ថិតនៅលើមហាវិថីព្រះនរោត្តមបានបើកដំណើរការជាផ្លូវការហើយ ខណៈទីផ្សារការិយាល័យបានបើកដំណើរការកាន់តែច្រើននៅក្រុងភ្នំពេញ។
អាគារការិយាល័យនេះ ស្ថិតនៅក្នុងសង្កាត់ទន្លេបាសាក់ ខ័ណ្ឌចំការមនក្រុងភ្នំពេញ ដែលស្ថិតនៅជាមួយនឹងអាគារខុនដូចំនួន៤បន្ថែមទៀត ស្ថិតនៅខាងក្រោយអាគារដ៏ ធំនេះ។
អ្នកនាងអាន សុធីតានាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២ មករានេះថា អាគារការិយាល័យនេះបានបើកដំណើរការប៉ុន្មានខែកន្លងមកនេះ ដោយដាក់ជួលក្នុងតម្លៃ១៣ដុល្លារក្នុងមួយម៉ែត្រការ៉េ ដែលតម្លៃនេះមិនទាន់គិតបញ្ចូលតម្លៃសេវាគ្រប់គ្រងនៅឡើយទេ។
អ្នកនាងបន្តថា “អាគារការិយាល័យនេះមានទំហំចាប់ពី៣០ម៉ែត្រការ៉េឡើង និងជាប្រភេទការិយាល័យស្ថិតនៅក្នុងកម្រិតB ជាប្រភេទការិយាល័យនិងមានទីផ្សារកំពុងពេញនិយមនៅកម្ពុជា។អ្នកនាងបន្តថា “ទីផ្សារការិយាល័យនៅកម្ពុជានៅតែមានសញ្ញាវិជ្ជមាន ដោយសារការកើនឡើងនូវតម្រូវការពីអ្នកវិនិយោគក្នុងស្រុក និងអន្តរជាតិ។
នៅឆ្នាំ២០១៨កន្លងមកនេះ អាគារការិយាល័យប្រមាណ៦បានបើកដំណើរការនៅក្រុងភ្នំពេញ ក្នុងនោះមានការិយាល័យបែបសហកម្មសិទ្ឋច្រើនបានដាក់ចូលទីផ្សារ ដែលមានទំហំរហូតដល់៥០,០០០ម៉ែត្រការ៉េ៕
