ដោយ: គង់ លាងហួរ
បាងកក: ក្រុមនាយកប្រតិបត្តិជាច្រើន ក្នុងវិស័យអចលនទ្រព្យថៃបានអំពាវនាវឱ្យរដ្ឋាភិបាលថ្មី ត្រូវបានបង្កើតឡើងឱ្យបានលឿន និងដោយរលូន តាមដែលអាចធ្វើទៅបាន និងបានស្នើសុំឱ្យរដ្ឋាភិបាលថ្មី ដំឡើងប្រាក់ឈ្នួលអប្បបរមាជាបណ្តើរៗ ដើម្បីទប់ស្កាត់ការកើនឡើងនៃការចំណាយភ្លាមៗ។
លោក Worawut Kanchanakul ប្រធានក្រុមហ៊ុនអភិវឌ្ឍន៍លំនៅដ្ឋាន W House បានមានប្រសាសន៍ថា “រដ្ឋាភិបាលថ្មីគួរតែដំឡើងប្រាក់ឈ្នួលអប្បបរមាបន្តិចម្តងៗ។ ដូច្នេះសហគ្រិននឹងអាចទប់ទល់ នឹងការកើនឡើងនៃតម្លៃសំណង់ ហើយរដ្ឋាភិបាលថ្មីគួរតែដោះស្រាយបញ្ហាតម្លៃរស់នៅជាមុនសិន”។
លោក Worawut បានបន្តទៀតថា “ខ្ញុំចង់ឃើញរដ្ឋាភិបាលថ្មី ត្រូវបានបង្កើតឡើងបានយ៉ាងរលូន ដើម្បីទទួលបានទំនុកចិត្តពីបណ្តាអ្នកវិនិយោគក្នុងស្រុក និងបរទេស”។
លោករំពឹងទុកថា រដ្ឋាភិបាលថ្មីនឹងត្រូវបង្កើតឡើង នៅខែសីហាខាងមុខ ប៉ុន្តែប្រសិនបើប្រើពេលយូរជាងនេះ វាអាចជះផលប៉ះពាល់មិនល្អដល់ការចំណាយលើអាជីវកម្ម និងរដ្ឋាភិបាល។
លោកបានថ្លែងទៀតថា “ប្រសិនបើរដ្ឋាភិបាលថ្មី ត្រូវបានបង្កើតលឿនជាងនេះ នោះបញ្ហាជាច្រើនអាចនឹងត្រូវបាន ដោះស្រាយបានយ៉ាងឆាប់រហ័ស”។
អធិការធនាគារលំនៅដ្ឋានរដ្ឋ និងជានាយកស្តីទីនៃមជ្ឈមណ្ឌលព័ត៌មានអចលនវត្ថុ លោកWichai Wiratkaphan បានថ្លែងឲ្យដឹងផងដែរថា “លោកមានការព្រួយបារម្ភ អំពីការពន្យារពេលក្នុងការបង្កើតរដ្ឋាភិបាលថ្មី ដែលវាអាចបង្កជាឧបសគ្គ ដល់ការអនុម័តថវិកាជាតិរបស់រដ្ឋាភិបាលសម្រាប់ឆ្នាំសារពើពន្ធ២០២៤”។
លោក Wichai បានពន្យល់ថា “ការពន្យារពេលក្នុងការអនុម័តថវិការបស់រដ្ឋាភិបាល អាចបង្អាក់វិស័យអចលនទ្រព្យ និងធ្វើឱ្យផលិតផលក្នុងស្រុកសរុបរបស់ប្រទេសថៃមានការធ្លាក់ចុះ”។
លោកបានផ្តល់នូវមតិថា រដ្ឋាភិបាលថ្មីគួរតែពិចារណាលើឥទ្ធិពល នៃការដំឡើងប្រាក់ឈ្នួលអប្បបរមា ដោយលោកអះអាងថា វានឹងជំរុញឱ្យមានការចំណាយ សម្រាប់សហគ្រិនតូចតាច និងកាត់បន្ថយចំនួនការងារ។
ទោះជាយ៉ាងណាក្តី លោកមិនរំពឹងទេថា ការដំឡើងប្រាក់ឈ្នួលអប្បបរមានឹងជះផលប៉ះពាល់ ដល់វិស័យអចលនទ្រព្យ ដោយសារតែក្រុមអ្នកអភិវឌ្ឍន៍ភាគច្រើន បានបង់ប្រាក់ឱ្យកម្មកររបស់ពួកគេខ្ពស់ជាងប្រាក់ឈ្នួលអប្បបរមាផ្លូវការរួចទៅហើយ។
លោក Peerapong Jaroon-ek ប្រធានសមាគមខុនដូថៃ មានក្តីសង្ឃឹមថា “រដ្ឋាភិបាលថ្មី នឹងត្រូវបានបង្កើតឡើងយ៉ាងលឿន និងដោយរលូន”។
លោកបន្ថែមថា រដ្ឋាភិបាលថ្មីគួរអនុវត្តន៍ វិធានការជំរុញសេដ្ឋកិច្ចឲ្យបានឆាប់ តាមដែលអាចធ្វើទៅបាន ដើម្បីជំរុញឲ្យសេដ្ឋកិច្ចជាតិអាចងើបឡើងវិញ។
លោក Peerapong Jaroon-ek អះអាងទៀតថា លោកចង់ឲ្យ រដ្ឋាភិបាលថ្មី បង្កើនប្រាក់ឈ្នួលអប្បបរមាជាបណ្តើរបន្តិចម្តងៗ ព្រោះការកើនឡើងភ្លាមៗ ពេលវាអាចបង្កឲ្យមានអតិផរណា៕
