ដោយ: គង់ លាងហួរ
ភ្នំពេញ: យោងតាមទិន្នន័យពាណិជ្ជកម្មចុងក្រោយរបស់អគ្គនាយកដ្ឋានគយ និងរដ្ឋាករ (GDCE) បានឱ្យដឹងថា ប្រទេសសិង្ហបុរី និងឥណ្ឌាបានក្លាយជាគោលដៅនាំចេញកំពូលរបស់កម្ពុជានៅក្នុងរយៈពេល៤ខែដំបូង ឆ្នាំ២០២៣នេះ។
ការនាំចេញរបស់កម្ពុជាទៅកាន់ប្រទេសសិង្ហបុរីបានកើនឡើងប្រហែល៣៤៥ឆភាគរយចាប់ពីខែមករាដល់ខែមេសាឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ខណៈការនាំចេញរបស់កម្ពុជាទៅកាន់ប្រទេសឥណ្ឌាបានកត់ត្រាកំណើនជាង៦០ភាគរយ។ ទិន្នន័យបានបង្ហាញថា ប្រទេសទាំងពីរមានអត្រាកំណើនលឿនបំផុត (ក្នុងការនាំចេញពីកម្ពុជា) ក្នុងចំណោមគោលដៅនាំចេញកំពូលទាំង២០របស់កម្ពុជា។
ទំហំទឹកប្រាក់ពីការនាំចេញទៅកាន់ប្រទេសសិង្ហបុរីបានឈានដល់២២៤លានដុល្លារនៅក្នុងរយៈពេល៤ខែដំបូង ធៀបនឹង៥០លានដុល្លារក្នុងអំឡុងពេលដូចគ្នាកាលពីឆ្នាំមុន។ ចំណែកឯ ការនាំចេញទៅប្រទេសឥណ្ឌាបានកើនដល់៩១,៥លានដុល្លារពីមួយឆ្នាំទៅមួយឆ្នាំបើធៀបនឹង ៥៥,៧ លានដុល្លារកាលពីឆ្នាំមុន។
ពាណិជ្ជកម្មអន្តរជាតិរបស់កម្ពុជា (ការនាំចេញ និងការនាំចូលរួមគ្នា) មានទំហំទឹកប្រាក់ចំនួន១៥,១៦ពាន់លានដុល្លារ សម្រាប់ខែមករា ដល់ខែមេសា ធ្លាក់ចុះ១៤,១ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ប្រទេសចិនគឺជាដៃគូពាណិជ្ជកម្មដ៏ធំបំផុតរបស់កម្ពុជាដែលមានទំហំទឹកប្រាក់ពាណិជ្ជកម្មចំនួន៣,៨៩ពាន់លានដុល្លារ បន្ទាប់មកគឺសហរដ្ឋអាមេរិកដែលមានទំហំទឹកប្រាក់ចំនួន២,៥២ពាន់លានដុល្លារ ហើយវៀតណាមជាដៃគូពាណិជ្ជកម្មធំទី៣របស់ប្រទេសកម្ពុជាដែលមានទំហំទឹកប្រាក់២,៤៣ពាន់លានដុល្លារ ប៉ុន្តែអាមេរិកនៅតែជាទីផ្សារនាំចេញធំបំផុតទី១របស់កម្ពុជា។
ទន្ទឹមនឹងនោះ សិង្ហបុរីក៏កំពុងក្លាយជាប្រភពដ៏សំខាន់នៃលំហូរវិនិយោគផ្ទាល់ពីបរទេស (FDI) ចូលមកកម្ពុជាផងដែរ។ ថ្មីៗនេះ ឥណ្ឌាក៏បានបង្កើនទំនាក់ទំនងពាណិជ្ជកម្ម ដោយបានបញ្ជូនគណៈប្រតិភូធុរកិច្ចមកកាន់កម្ពុជាផងដែរ។ ដំណើរទស្សនកិច្ចរបស់គណៈប្រតិភូឥណ្ឌាត្រូវបានគេរំពឹងថានឹងជំរុញឱ្យមានការកើនឡើងនៃលំហូរ FDI ពីប្រទេសឥណ្ឌាមកកម្ពុជា។
លោក ឡោ វិចិត្រ អនុប្រធានសមាគមពាណិជ្ជកម្មចិន-កម្ពុជា បានមានប្រសាសន៍ថា តំបន់អាស៊ីប៉ាស៊ីហ្វិកកំពុងលេចចេញជាក្បាលម៉ាស៊ីនកំណើនសេដ្ឋកិច្ចពិភពលោក ហើយអំណាចទិញដែលកំពុងកើនឡើងរបស់ប្រទេសសិង្ហបុរី និងឥណ្ឌា គឺជាហេតុផលសម្រាប់ការកើនឡើងនៃពាណិជ្ជកម្មជាមួយកម្ពុជា។
លោកបន្ថែមថា “IMF និងធនាគារពិភពលោកបានកំណត់តំបន់អាស៊ីប៉ាស៊ីហ្វិកថាជាម៉ាស៊ីនកំណើនសម្រាប់សេដ្ឋកិច្ចពិភពលោក”។
លោកឡោ វិចិត្រ បានចង្អុលបង្ហាញទៀតថា “ការនាំចេញរបស់កម្ពុជាទៅកាន់ប្រទេសសិង្ហបុរី និងប្រទេសឥណ្ឌា កំពុងតែកើនឡើងពីមួយឆ្នាំទៅមួយឆ្នាំ ដោយសារការកើនឡើងនៃវណ្ណៈកណ្តាលនៅក្នុងប្រទេសទាំង២នេះ”៕
