ដោយ: គង់ លាងហួរ
ភ្នំពេញ: នៅពេលអ្នកទៅលេងខេត្តសៀមរាប បំណងប្រាថ្នាដំបូងគេគឺទៅទស្សនាប្រាសាទអង្គរវត្ត អង្គរធំ និងទៅលេង Pub Street ប៉ុន្តែនៅមានកន្លែងជាច្រើនផ្សេងទៀត ដែលអ្នកគួរតែទៅទស្សនា និងមិនអាចបំភ្លេចបាន។
ជាក់ស្តែង ស្រុកបន្ទាយស្រីក្នុងខេត្តសៀមរាប បាននិងកំពុងមានការរីកចម្រើនលូតលាស់ និងមានភាពល្បីល្បាញ ដោយសារប្រាសាទបន្ទាយស្រី ដែលរចនាឡើងបានយ៉ាងរសរវើក។
ស្រុកនេះបាន និងកំពុងទាក់ទាញគម្រោងអភិវឌ្ឍន៍ជាច្រើន រួមទាំងគម្រោង Banteay Srei Eco City ដែលកំពុងអភិវឌ្ឍលើផ្ទៃដីជាង៣០០ហិកតាផងដែរ។
លោកបណ្ឌិត Alexander Evengroen ដៃគូសហការ និងជានាយកផ្នែកអភិវឌ្ឍន៍គំរោងនៃក្រុមហ៊ុន Strategic Realty Investment Co., Ltd ដែលបាននិងកំពុងអភិវឌ្ឍន៍គំរោងខាងលើនេះ និងជាអ្នកជំនាញអចលនទ្រព្យលំដាប់អន្តរជាតិ បានមានប្រសាសន៍ កាលពីព្រឹកថ្ងៃទី១៤ ខែសីហា កន្លងមកថា ប្រាសាទបន្ទាយស្រីមានសក្ដានុពលដ៏ធំ និងឱកាសរីកចម្រើនដ៏អស្ចារ្យ ក្នុងពេលឆាប់ៗនេះ ដោយសារមូលដ្ឋានដែលមានស្រាប់ ដូចជា ប្រាសាទបុរាណល្បីៗ ទីតាំងភូមិសាស្រ្ត ភាពទាក់ទាញប្រវត្តិសាស្រ្តពិភពលោក បូករួមទាំងគម្រោងអភិវឌ្ឍជាច្រើនបាន និងកំពុងឆ្ពោះទៅកាន់តំបន់ដ៏អស្ចារ្យនេះ។
ជាមួយនឹងគោលដៅ លើកកម្ពស់វិស័យទេសចរណ៍ ការអភិវឌ្ឍបរិស្ថានក្នុងតំបន់ ការបង្កើតការងារ និងការជំរុញកំណើនសេដ្ឋកិច្ចជាតិ ក្រុមហ៊ុន Strategic Realty Investment Co., Ltd បាននិងកំពុងអភិវឌ្ឍទីក្រុង Banteay Srei Eco City ដែលរហូតមកទល់ពេលនេះ ការរៀបចំប្លង់មេសម្រាប់ គម្រោងបានបញ្ចប់៩៥%ហើយ ដោយក្រុមហ៊ុន កំពុងចាប់ផ្តើមអភិវឌ្ឍលើផ្ទៃដីទំហំ៦០+ហិកតា ក្នុងដំណាក់កាលមេចំនួន៣ ហើយគម្រោងនេះ បាននិងកំពុងទទួលបានការចាប់អារម្មណ៍យ៉ាងខ្លាំង ពីសំណាក់វិនិយោគិនក្នុងស្រុក និងអន្តរជាតិ។
លោក Alexander Evengroen បានមានប្រសាសន៍បន្តទៀតថា ក្រុមហ៊ុនបាននិងកំពុងអភិវឌ្ឍមួយជំហានម្តងៗ ហើយរហូតមកដល់ពេលនេះ យើងបាននិងកំពុងអភិវឌ្ឍជាច្រើនជំហាន នៅក្នុងគម្រោងរបស់យើង ប៉ុន្តែយើងនឹងបន្តការយកចិត្តទុកដាក់ ទៅលើការបង្កើតតម្លៃបន្ថែមសម្រាប់តំបន់ ប្រជាជន សេដ្ឋកិច្ចកម្ពុជា ការបង្កើតរបៀបរស់នៅថ្មី តភ្ជាប់មនុស្សជាមួយនឹងធម្មជាតិ ជុំវិញប្រកបដោយភាពច្នៃប្រឌិត ការអភិវឌ្ឍដែលមិនប៉ះពាល់ដល់បរិស្ថាន និងការកម្សាន្តដ៏គួរឱ្យចាប់អារម្មណ៍ ជាច្រើនសម្រាប់កុមារ និងមនុស្សចាស់។
លោកបញ្ជាក់ទៀតថា លើសពីនេះ យើងកំពុងសាងសង់ផ្ទះវីឡា សួនច្បារ សួនផ្កា ទីលានកីឡា ផ្ទះលំហែរកាយ និងកន្លែងញុំាអាហារ ជាមួយនឹងគំនិតបង្កើតថ្មី ប្រកបដោយភាពច្នៃប្រឌិតខ្ពស់ ដែលមានលក្ខណៈខុសប្លែកពីខេត្តដទៃ ក៏ដូចជារួមចំណែកដល់ការអភិវឌ្ឍសេដ្ឋកិច្ចជាតិផងដែរ ហើយវាមានសារៈសំខាន់ណាស់ សម្រាប់ក្រុមហ៊ុនដើម្បីរីកចម្រើនជាមួយគ្នា។
គម្រោង Banteay Srei Eco City នឹងនាំមកជូននូវសាកលវិទ្យាល័យលំដាប់ពិភពលោក អន្តេវាសិកដ្ឋាន ភោជនីយដ្ឋានប្រណិត ផ្ទះអាជីវកម្ម វីឡា សួនកុមារ ផ្សារទំនើប វីឡាបែបខ្មែរ ស្តាតបាល់ទាត់ទំនើប មជ្ឈមណ្ឌលអាពាហ៍ពិពាហ៍ និងមជ្ឈមណ្ឌលសន្និបាត សកម្មភាពជិះទូកកម្សាន្ត ផ្សារទំនើប កោះប្រណិត ផ្លូវ៣០ម៉ែត្រ និងរបស់ជាច្រើនផ្សេងទៀត។
លោកបណ្ឌិត Alexander Evengroen បានលើកឡើងថា យើងកំពុងអភិវឌ្ឍគម្រោងនេះឡើង ដើម្បីបង្កើត និងផ្តល់ឱកាសដល់យុវជនជំនាន់ក្រោយ ដូចជាអ្នករចនាឌីហ្សាញ អ្នកម៉ៅការ និងស្ថាបត្យករ ព្រោះយើងគិតគូរអំពីអនាគត របស់មនុស្សជំនាន់ថ្មី ដែលពួកគេនឹងធ្វើអ្វីៗដោយគំនិតថ្មីវ័យក្មេង។
វិធីសាស្ត្រាក្នុងការបង្កើត Banteay Srei Eco City នឹងធានាថា ភ្ញៀវទេសចរជាតិ និងអន្តរជាតិ មិនអាចមើលរំលងគម្រោងនេះបានទេ ហើយនឹងមិនអាចបំភ្លេចបាន និងលើកទឹកចិត្តពួកគេឱ្យមកទស្សនាម្តងហើយម្តងទៀត។
នៅពេលស្ថិតនៅរាជធានីភ្នំពេញ ប្រជាពលរដ្ឋកម្ពុជារំភើបចិត្តបំផុត ពេលទៅទស្សនាពហុកីឡដ្ឋានមរតកតេជោ ដែលបានរៀបចំព្រឹត្តិការណ៍កីឡាស៊ីហ្គេមដ៏ជោគជ័យ និងសាយភាពល្បីល្បាញលើឆាកអន្តរជាតិ ប៉ុន្តែនៅសៀមរាប យើងចង់ឲ្យភ្ញៀវទេសចរណ៍នឹកឃើញដល់ កីឡដ្ឋានដ៏ស្រស់ស្អាត និងទាក់ទាញបំផុតនៅស្រុកបន្ទាយស្រី ដែលស្ថិតនៅក្នុងគំរោងទីក្រុង Banteay Srei Eco CITY ដែលនឹងទាក់ទាញសកម្មភាពកីឡាក្នុងស្រុក និងអន្តរជាតិ ប្រកបដោយភាពវិជ្ជមាន និងរួបរួមមនុស្សមកពីជុំវិញពិភពលោក។
លោកបណ្ឌិត Alexander បានបន្ថែមថា ជាមួយនឹងចក្ខុវិស័យច្បាស់លាស់ បេសកកម្ម និងមូលដ្ឋានដ៏រឹងមាំ យើងកំពុងផ្តល់ឱកាសសម្រាប់អ្នកវិនិយោគក្នុងស្រុក និងអន្តរជាតិ ព្រមទាំងសាធារណជនទូទៅ ដើម្បីចូលរួមជាមួយយើង ក្នុងឱកាសវិនិយោគឈ្នះ-ឈ្នះ និងឈ្នះ-ឈ្នះសម្រាប់ក្រុមហ៊ុន ប្រជាជន និងសេដ្ឋកិច្ច ដើម្បីជំរុញការអភិវឌ្ឍសង្គម-សេដ្ឋកិច្ច-នវានុវត្តន៍។
លើសពីនេះ ក្រុមហ៊ុន Strategic Ltd Realty Investment Co., Ltd នឹងចាប់ផ្តើមរៀបចំដំណើរកំសាន្ត Field exploration trips ជាច្រើន ដើម្បីណែនាំ និងបង្ហាញគម្រោង Banteay Srei Eco City ទៅកាន់ពិភពលោក រួមទាំងក្រុមហ៊ុនក្នុងស្រុក និងអន្តរជាតិ ដើម្បីទស្សនា ស្វែងរក និងសិក្សាពីឱកាសវិនិយោគរួមគ្នា៕
