ដោយៈ គង់ សូរិយា
ភ្នំពេញៈ អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានអះអាងថា ទុនវិនិយោគជិត៤០០០លានដុល្លារ ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា ក្នុងរយៈពេល៩ខែឆ្នាំនេះ។
ព័ត៌មាននេះ ត្រូវបានលើកឡើងដោយលោក ជា វុទ្ធី អគ្គលេខាធិការគណៈកម្មការ វិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (ក.អ.ក.) បានទទួលជួបពិភាក្សាការងារជាមួយគណៈ ប្រតិភូសមាគមសភាពាណិជ្ជកម្មចិន ដឹកនាំដោយលោក Lin Shiqiang ប្រធានសមាគម។
លោកជា វុទ្ធី បានសម្តែងនូវសេចក្តីសោមនស្សរីករាយ និងការស្វាគមន៍យ៉ាង កក់ក្តចំពោះវត្តមានរបស់គណៈប្រតិភូ សភាពាណិជ្ជកម្មចិន និងបានលើកឡើងអំពីសារៈសំខាន់ចំពោះ កិច្ចសហប្រតិបត្តិការវិនិយោគ និងកិច្ចសហប្រតិបត្តិការផ្សេងៗទៀត រវាងប្រទេសទាំងពីរ កម្ពុជា-ចិន។
លោកអគ្គលេខាធិការ បានវាយតម្លៃខ្ពស់ចំពោះការវិនិយោគរបស់ចិននៅក្នុងប្រទេសកម្ពុជា ជាពិសេសការកើនឡើងនៃការវិនិយោគក្នុងវិស័យកម្មន្តសាល។ លោកបន្តថា ជាក់ស្តែងក្នុងរយៈពេល ៩ខែ ឆ្នាំ២០២៣ ក្រុមប្រឹក្សាអភិវឌ្ឍន៍ កម្ពុជា បានអនុម័តគម្រោងវិនិយោគ ដែលមានទំហំទុនវិនិយោគ ប្រមាណជិត៤ប៊ីលានដុល្លារអាម៉េរិក ក្នុងនោះទុនវិនិយោគរបស់ចិន មានប្រមាណ៧៦%។
គោលបំណងនៃការជួបពិភាក្សា ការងារនៅថ្ងៃនេះ ដើម្បីស្តាប់មតិយោបល់ ពីសមាគមសភាពាណិជ្ជកម្មចិន ក្នុងការចូលរួមកែលម្អបរិស្ថានវិនិយោគនៅកម្ពុជា។
មានមតិក្នុងកិច្ចប្រជុំនេះ លោកប្រធានគណៈប្រតិភូ បានថ្លែងអំណរគុណដល់ឯកឧត្តមអគ្គលេខាធិការ ដែលបានអនុញ្ញាតឱ្យលោក និងសហការីចូលជួបពិភាក្សាការងារ ដែលការណ៍នេះបានបង្ហាញពីការយក ចិត្តទុកខ្ពស់របស់ក្រុមប្រឹក្សាអភិវឌ្ឍន៍កម្ពុជា ចំពោះវិនិយោគិនចិន។
ជាមួយគ្នានេះដែរ លោកប្រធានគណៈ ប្រតិភូបានស្នើសុំឱ្យឯកឧត្តមអគ្គលេខាធិការ ពន្យល់ពីវិស័យអាទិភាព ដែលមានចែងក្នុងច្បាប់វិនិយោគថ្មី, និងយន្តការដោះស្រាយបញ្ហារបស់វិនិយោគិនចិន។
លោកជា វុទ្ឋីបានលើកឡើងថា ក្នុងច្បាប់វិនិយោគថ្មី វិស័យអាទិភាព មានចំនួន១៩ ដែលក្នុងនោះមានវិស័យអាទិភាពពីរ ដែលយើងកំពុងចង់បានខ្លាំងបំផុតនោះ គឺការវិនិយោគ ក្នុងវិស័យដែលមានបច្ចេកវិទ្យាខ្ពស់ ប្រកបដោយនវានុវត្តន៍ និងការស្រាវជ្រាវ និងការអភិវឌ្ឍន៍ និងការវិនិយោគក្នុងវិស័យកសិកម្ម កសិឧស្សាហកម្ម ឧស្សាហកម្មកែច្នៃផលិតផលកសិកម្ម ឧស្សាហកម្មកែច្នៃចំណីអាហារដែលបម្រើទីផ្សារក្នុងស្រុក ឬ ការនាំចេញ។
លោកបន្តថា បច្ចុប្បន្ន នៅក្រុមប្រឹក្សាអភិវឌ្ឍន៍កម្ពុជាមាន តុចិន (China Desk) សម្រាប់រង់ចាំផ្តល់ការប្រឹក្សាជូនវិនិយោគិនចិន។ ចំពោះយន្តការសម្រាប់ ដោះស្រាយបញ្ហារបស់វិនិយោគិន៕
