ដោយៈ ជេស៊ីកា
ភ្នំពេញៈ ផលចំណេញពីការវិនិយោគ(Return on Investment)ជាកូនសោគន្លឹះ ក្នុងការទាក់ទាញរំហូរវិនិយោគផ្ទាល់ពីបរទេស(FDI) មកកាន់កម្ពុជា។ ជាមួយគ្នានេះ ច្បាប់បទដ្ឋានគតិយុត្តិនានា ក៏ជាកត្តាសំខាន់មួយ ដែលទាក់ទាញ និងបង្កើនទំនុកចិត្ត របស់អ្នកវិនិយោគអន្តរជាតិផងដែរ។
ផ្អែកលើមូលដ្ឋាននេះ រាជរដ្ឋាភិបាលបានអនុម័តច្បាប់ជាច្រើន ដើម្បីបើកចំហជើងមេឃ ស្វាគមន៍ការវិនិយោគរបស់វិនិយោគិន គ្រប់ជាតិសាសន៍។
មូលដ្ឋានច្បាប់បទដ្ឋានទាំងនោះ រួមមាន ច្បាប់វិនិយោគថ្មី បានផ្តល់នូវចំណុចលើកទឹកចិត្តជាច្រើន ដល់អ្នកវិនិយោគជាតិ និងអន្តរជាតិ ដូចជា អនុញ្ញាត្តឲ្យខេត្តនានាអនុម័តទុនវិនិយោគ ដែលមានតម្លៃចាប់ពី៥លានដុល្លារចុះ អនុញ្ញាត្តឲ្យជនបរទេស មានសិទ្ឋកាន់កាប់ ឬបើកក្រុមហ៊ុនដែលមានទុន ដោយខ្លួនឯង១០០ភាគរយ ការបង់ពន្ឋមិនមានភាពស្មុគ្រស្មាញ ការលើកទឹកចិត្តផ្នែកពន្ឋ ការបង់ពន្ឋមិនសូវមានភាពស្មុគ្រស្មាញជាដើម។
ទាក់ទងការវិនិយោគលើវិស័យសំណង់ និងអចលនទ្រព្យនៅកម្ពុជា តើទទួលបានផលចំណេញដូចមុនឬទេ? អ្នកស្រីអាន សុធីតាអគ្គនាយិកាក្រុមហ៊ុនPropNex Cambodia បានមានប្រសាសន៍ថា ផលចំណេញពីការវិនិយោគនៅកម្ពុជា បានថយចុះអំឡុងវិបត្តិសេដ្ឋកិច្ច ដែលបណ្តាលមកពីជំងឺកូវីដ១៩ និងសង្រ្គាមរវាងរុស្ស៊ី អ៊ុយក្រែន និងភាពតានតឹងភូមិសាស្រ្តនយោបាយនានា។
អ្នកស្រីបន្តថា “យ៉ាងណាផលចំណេញពីការវិនិយោគនៅកម្ពុជា សម្រេចបានចន្លោះ៤ ទៅ៥ភាគរយប្រចាំឆ្នាំ ប៉ុន្តែនិន្នាការនេះបាននិងកំពុងប្រឈមការប្រកួតប្រជែងខ្ពស់”។
ទាក់ទងការវិនិយោគដីធ្លី និងទីផ្សារបុរីលំនៅដ្ឋានវិញ លោកឧកញ៉ាបណ្ឌិតគីម ហ៊ាង ប្រធានKW Cambodia និងជាអ្នកអភិវឌ្ឍន៍បុរីវិមានសំណាងបានមានប្រសាសន៍ថា ការវិនិយោគលើដីធ្លី ទទួលបានផលចំណេញតិចជាងមុន ដោយសារឱកាសទីផ្សារត្រូវបានបែងចែកច្រើន ដែលទីផ្សារនេះពីមុន ប្រៀបដូចជាបឹងមួយមានត្រី១០០០ក្បាល មានមនុស្សចាប់១០នាក់ ប៉ុន្តែបច្ចុប្បន្នទំហំបឹងនៅដដែល ចំនួនត្រីនៅដដែលប៉ុន្តែចំនួនអ្នកចាប់ត្រី បានកើនឡើងដល់១០០នាក់ឬច្រើនជាងនេះ៕
