ទីក្រុងហូជីមិញគ្រោងដាក់ដេញថ្លៃដីឡូតិ៍ចំនួន៦កន្លែង ដើម្បីកៀរគរទំហំទឹកប្រាក់ចំនួន១ពាន់លានដុល្លារអាមេរិក

ដោយ: គង់ លាងហួរ
អន្តរជាតិ: អាជ្ញាធរក្រុងហូជីមិញនៃប្រទេសវៀតណាមគ្រោងនឹងកៀរគរទំហំទឹកប្រាក់ចំនួនជាង២៥,៤ទ្រីលានដុង (ប្រមាណ១ពាន់លានដុល្លារអាមេរិក) ដោយគ្រោងដាក់ដេញថ្លៃលក់ដីចំនួន៦កន្លែងនៅក្នុងតំបន់ Thu Duc និងតំបន់ Thu Thiem ។

ជាពិសេស នៅតំបន់ Thu Thiem ផែនការវាយតម្លៃដីសម្រាប់អភិវឌ្ឍន៍គម្រោងទីក្រុង Thu Thiem Eco Smart City ត្រូវបានដាក់ជូនទៅកាន់អាជ្ញាធរ ដោយរំពឹងថា នឹងអាចទទួលបានទំហំទឹកប្រាក់ចំនួន១៦,២ទ្រីលានដុងពីការដេញថ្លៃ។

ដីឡូតិ៍មួយទៀតនៅក្នុងសង្កាត់ An Phu ដែលមានទំហំជិត១៥ហិកតា ត្រូវបានស្នើឡើងសម្រាប់ការដេញថ្លៃដើម្បីសាងសង់គម្រោងផ្លូវមួយខ្សែ ដោយរំពឹងថា នឹងរកប្រាក់ចំណូលពីការដេញថ្លៃបានចំនួន៣,៤៩ទ្រីលានដុង។

ជាមួយគ្នានោះ អាជ្ញាធរក៏បានកំណត់តម្លៃដីទំហំ៨២៨ម៉ែត្រការ៉េក្នុងទំហំទឹកប្រាក់ប្រហែល១៩ពាន់លានដុងនៅក្នុងគម្រោងលំនៅដ្ឋាន Nam Phan។នេះបើយោងតាមការដកស្រង់ចុះផ្សាយដោយកាសែតវៀតណាម Vnexpress។

លើសពីនេះទៀត ដីឡូតិ៍ចំនួន៣កន្លែងនៅក្នុងតំបន់ Thu Thiem ត្រូវបានស្នើសម្រាប់ការដាក់ដេញថ្លៃ ដែលមានតម្លៃសរុបបញ្ចូលគ្នាចាប់ពី៥,៧ទ្រីលានដុង។ សរុបមក ប្រាក់ចំណូលសរុបពីការដេញថ្លៃដីឡូត៍ទាំង៦កន្លែងអាចមានទំហំចំនួន២៥,៤ទ្រីលានដុង។

ដី ដែលបានដាក់លក់ដេញថ្លៃទាំងនេះនឹងត្រូវបានអភិវឌ្ឍន៍ទៅជាគម្រោងអចលនទ្រព្យលំនៅដ្ឋានពហុមុខងារ តំបន់ពាណិជ្ជកម្ម ការអប់រំ និងវប្បធម៌៕