ដោយ: គង់ លាងហួរ
អន្តរជាតិ: បណ្តាវិនិយោគិនទូទាំងពិភពលោក រួមទាំងអ្នកវិនិយោគនៅទីក្រុងហុងកុង កំពុងងាកមកបណ្តាក់ទុនក្នុងទីផ្សារលំនៅដ្ឋានរបស់ប្រទេសជប៉ុន ខណៈអត្រាផលចំណេញពីការវិនិយោគនៅក្នុងប្រទេសចិនបានធ្លាក់ចុះដល់កម្រិតទាបបំផុត។
យោងតាមទិន្នន័យដែលបានចងក្រងដោយក្រុមហ៊ុនប្រឹក្សាអចលនទ្រព្យ Colliers បានឱ្យដឹងថា លំហូរវិនិយោគផ្ទាល់ពីបរទេសចំនួន១១,២ពាន់លានដុល្លារបានហូរចូលទៅក្នុងទីផ្សារអចលនទ្រព្យជប៉ុនក្នុងត្រីមាសទី១។ បណ្តាវិនិយោគិនភាគច្រើនមានប្រភពមកពីសហរដ្ឋអាមេរិក សិង្ហបុរី និងទីក្រុងហុងកុង។
លើសពីនេះ បណ្តាអ្នកវិនិយោគចិនដីគោកក៏កំពុងស្វែងរកគោលដៅថ្មីផងដែរ ដោយបានចាក់បញ្ចូលទឹកប្រាក់ចំនួន១ពាន់លានដុល្លារអាមេរិកទៅក្នុងទីផ្សារអចលនទ្រព្យរបស់ប្រទេេសជប៉ុនក្នុងរយៈពេលដូចគ្នា។
លោក Masahiro Tanikawa អ្នកជំនាញនៅក្រុមហ៊ុន Colliers Japan បានអះអាងថា ពីមុន អ្នកវិនិយោគហុងកុងបានផ្តោតការវិនិយោគតែនៅប្រទេសចិនប៉ុណ្ណោះ។ ប៉ុន្តែ ចាប់តាំងពីការដួលរលំនៃទីផ្សារអចលនទ្រព្យចិន លំហូរមូលធនបានបង្វែរទៅកាន់ទីផ្សារដែលមានស្ថិរភាពដូចជាប្រទេសជប៉ុន និងអូស្ត្រាលី។
បច្ចុប្បន្ន បណ្តាវិនិយោគិនកំពុងធ្វើពិពិធកម្មផលបត្រចេញពីប្រទេសចិន បន្ទាប់ពីវិស័យអចលនទ្រព្យចិនបានធ្លាក់ចូលវិបត្តិបំណុលចាប់តាំងពីឆ្នាំ២០២០ ហើយតម្លៃផ្ទះថ្មីបានធ្លាក់ចុះក្នុងរយៈពេល២ឆ្នាំជាប់ៗគ្នា។នេះបើយោងតាមការចុះផ្សាយដោយកាសែត South China Morning Post។
ប្រាក់យ៉េនរបស់ជប៉ុនបានធ្លាក់ថ្លៃចុះប្រហែល១ភាគរយធៀបនឹងប្រាក់ដុល្លារអាមេរិកកាលពីខែមុន។ អត្រាអតិផរណានៅប្រទេសនេះបានកើនឡើងដល់៤ភាគរយកាលពីខែមករា ដែលជាកម្រិតខ្ពស់បំផុតក្នុងរយៈពេលពីរឆ្នាំ មុនពេលថយចុះមកនៅត្រឹម៣,៥ភាគរយកាលពីខែឧសភា៕
