មន្រ្តីរដ្ឋាភិបាលៈ វិស័យអចលនទ្រព្យកម្ពុជាមានភាពប្រសើរឡើងវិញបណ្តើរហើយ

ដោយៈ គង់ សូរិយា

    ភ្នំពេញៈ រដ្ឋមន្រ្តីប្រតិភូអមនាយករដ្ឋមន្រ្តី លោកព្រាប កុលបានថ្លែងថា វិស័យអចលនទ្រព្យកម្ពុជា មានសញ្ញាប្រសើរឡើងវិញបណ្តើរៗហើយ។

លោកបានថ្លែងក្នុងពិធីបើកសម្ភោធសាកល្បង ក្រុមហ៊ុនអចលនទ្រព្យដ៏ធំរបស់អាមេរិកCOLDWELL BANKER CAMBODIA នៅរាជធានីភ្នំពេញកាលពីដើមសប្តាហ៍ថា បច្ចុប្ប​ន្ននេះ មានសញ្ញាព៌ណខៀវបណ្តើរៗក្នុងវិស័យនេះ ស្របពេលស្ថានភាពទីផ្សារ កាលពីប៉ុន្មានឆ្នាំមុន មានសញ្ញាព៌ណក្រហម។

លោកបញ្ជាក់ថា “វិស័យអចលនទ្រព្យ ជាតំណាងឲ្យសុខភាពសេដ្ឋកិច្ចរបស់ប្រទេសមួយ ព្រោះពេលភ្ញៀវអន្តរជាតិមកទស្សនាកម្ពុជា អ្វីដែលពួកគេមើលឃើញមុនគេគឺអាគារខ្ពស់ៗ និងផ្សារទំនើបជាដើម”។

ក្នុងនាមជាអ្នកពាក់ព័ន្ឋក្នុងវិស័យនេះ ស្ងៀមស្ងាត់មួយរូប លោកព្រាប កុលបានបន្តថា យើងជឿជាក់ថា អ្វីៗនឹងកាន់តែមានភាពល្អប្រសើរ បើទោះជាលោកមិនពាក់ព័ន្ឋច្រើននឹងវិស័យនេះ ក៏លោកមានភរិយាជាអ្នកបានប្រឡូកផ្ទាល់ក្នុងវិស័យនេះ ហើយបានជះឥទ្ឋិពលដល់លោកផងដែរ។

លោកបន្តថា យើងសង្ឃឹមថាជម្លោះជាមួយប្រទេសថៃ នឹងបញ្ចប់ឆាប់ៗ ហើយសេដ្ឋកិច្ចេរបស់យើងមានភាពធន់ ដែលនឹងផ្តល់ភាពអំ ណោយផលកាន់តែខ្លាំង ដល់វិស័យនេះនាពេលអនាគត៕