ដោយ វុត្ថា
ភ្នំពេញៈ ក្រុមហ៊ុនប្រតិបត្តិករទេសចរណ៍ជាច្រើន បាននឹងកំពុងផ្សព្វផ្សាយ និងត្រៀមលក់កញ្ចប់ទេសចរណ៍របស់ខ្លួន ទៅកាន់ភ្ញៀវទេសចរក្នុងស្រុក អំឡុងពេលដែលរាជរដ្ឋាភិបាលកម្ពុជា ឱ្យអនុញ្ញាតឱ្យឈប់សំរាក់រយៈពេល៥ថ្ងៃ នៅក្នុងខែសីហា ឆ្នាំ ២០២០ខាងមុខនេះ ជំនួសថ្ងៃចូលឆ្នាំខ្មែរកន្លងមកនេះ។
លោកស្រី ឆាយ ស៊ីវលីន ប្រធានសមគមទីភ្នាក់ងារទេសចរណ៍កម្ពុជា (CATA) បានប្រាប់ឱ្យដឹងនៅថ្ងៃទី ១៥ ខែកក្កដាឆ្នាំ ២០២០កន្លងមកថា រៀងរាល់ចុងសប្តាហ៍មានប្រជាពលរដ្ឋខ្មែរ បានចេញទៅដើរលេងកម្សាន្ត នៅតាមគោលដៅទេសចរណ៍ជាច្រើននៅក្នុងប្រទេសកម្ពុជា ហើយកាលពីពេលថ្មីៗ រាជរដ្ឋាភិបាលបានប្រកាសឱ្យមានការឈប់សំរាកក្នុងខែសីហានាខាងមុខនេះ ជាឱកាសមួយសម្រាប់ក្រុមហ៊ុនប្រតិបត្តិករទេសចរណ៍ជាច្រើនត្រៀមផ្សព្វផ្សាយ និងលក់កញ្ចប់ទេសចរណ៍របស់ខ្លួន។
លោកស្រីបន្តថា“ថ្ងៃឈប់សំរាក់ដែលសម្តេចប្រមុខរាជរដ្ឋាភិបាល បានប្រកាសឱ្យឈប់នៅក្នុងខែសីហា ខាងមុខនេះ ខាងក្រុមហ៊ុនទេសចរណ៍ និងភា្នក់ងារទេសចរណ៍ជាច្រើនបាននឹងកំពុងត្រៀមនៅក្នុងការផ្សព្វផ្សាយ ដើម្បីផ្តល់សេវាកម្មរៀបចំឱ្យប្រជាពលរដ្ឋដែលឈប់សំរាកនេះបានដើរកំសាន្ត” ។
លោកស្រីបន្ថែមថា “កន្លងមកនេះ បើទោះបីមានការរៀបចំកញ្ចប់ទេសចរណ៍ តែប្រជាពលរដ្ឋខ្មែរ យើងមិនមានពេលវេលាច្រើនដូចជាពេលលើកនេះនោះទេ ហើយភាគច្រើនពួកគាត់ដើរលេងដោយខ្លួនឯង” ។
ក្រុមហ៊ុនទេសចរណ៍បានសិក្សាពីតម្លៃ និងគោលដៅទេសចរណ៍ និងសកម្មភាពកម្សាន្តផ្សេងៗ ដើម្បីឱ្យភ្ញៀវទេសចរណ៍កាន់តែទាក់ទាញ និងមានតម្លៃធូថ្លៃជាង។
លោកស្រីឆាវ ស៊ីវលីនបានបន្តថា កញ្ចប់ទេសចរណ៍ដែលក្រុមហ៊ុនបាននឹងកំពុងផ្សព្វផ្សាយដាក់លក់នៅពេលនេះ គឺនៅតាមតំបន់ភ្នំ (តំបន់ឦសានប្រទេស) ខណៈដែលពលរដ្ឋខ្មែរភាគច្រើនចូលចិត្តធម្មជាតិ និងការដើរឡើងភ្នំជាដើម ក្រៅពីនេះ ក៏មានតំបន់ឆ្នេរ និងកោះផ្សេងៗ ផងដែរ។
ពាក់ព័ន្ធនឹងកំណើនសេដ្ឋកិច្ចទេសចរណ៍វិញ លោកស្រីរំពឹងថា នឹងមានការកើនឡើង ដោយសារក្នុងរយៈពេលប៉ុន្មានថ្ងៃមកនេះ មានទេសចរណ៍ក្នុងស្រុកជាច្រើន បានទាក់ទងមកក្រុមហ៊ុន ដើម្បីចង់ដឹងពីគោលដៅទេសចរណ៍នានា នៅក្នុងប្រទេស ហើយនិងជួយជំរុញឱ្យមានកំណើននូវសេវាកម្មផ្សេងៗ ក្នុងវិស័យទេសចរណ៍ផងដែរ។
លោកហូ វណ្ឌី សហប្រធានក្រុមការងារវិស័យទេសចរណ៍ផ្នែកឯកជនបានឱ្យដឹងថា ការអនុញ្ញាតឱ្យមានការឈប់សំរាក របស់រដ្ឋាភិបាលនាពេលខាងមុខនេះ ឆ្លុះបញ្ចាំងពីមិនមានការភ័យខ្លាច ចំពោះការមិនឆ្លងរីករាលដាលនូវជំងឺ Covid-19 នៅក្នុងសហគមន៍។
លោកបន្តថា “ការឈប់សំរាកនេះ នឹងធ្វើឱ្យមានកំណើនសេដ្ឋកិច្ចសង្គម តាមរយៈការចាយវាយរបស់ពលរដ្ឋទៅលើប្រេងឥន្ទនៈ (ដឹកជញ្ជូន)ពិសារអាហារ(ចំណីអាហារ) និងសេវាកម្មស្នាក់នៅ ទាំងសណ្ឋាគារ និងផ្ទះសំណាក់” ។លោកបន្តថា “បន្ថែមពីនេះ ក៏មានចំណូលចូលដល់រមណីយដ្ឋាន និងប្រជាពលរដ្ឋមូលដ្ឋាន និងអ្នកទទួលផលដោយប្រយោលជាដើម” ។
លោកហូ វណ្ឌីបានបញ្ជាក់ថា ប្រជាពលរដ្ឋខ្មែរយើងភាគច្រើន ដើរទៅលេងកម្សាន្ត នៅតាមសហគមន៍ទេសចរណ៍មានដូចជាតំបន់ឆ្នេរ និងភូមិភាគឦសានប្រទេស ប៉ុន្តែយ៉ាងណាយើងសង្ឃឹមថា ពួកគាត់នឹងត្រឡប់ទៅលេងកម្សាន្ត នៅខេត្តសៀមរាមវិញ ដើម្បីផ្តល់ចំណូលដល់ពលរដ្ឋនៅក្នុងតំបន់នេះឡើងវិញ។
រាជរដ្ឋាភិបាលបានកំណត់យកថ្ងៃឈប់សម្រាក ជំនួសឱ្យថ្ងៃបុណ្យចូលឆ្នាំថ្មីប្រណីខ្មែររយៈពេល៥ចាប់ពីថ្ងៃទី ១៧ ដល់២១ខែសីហា ឆ្នាំ ២០២០ ខាងមុខនេះ ដែលនឹងអនុញ្ញាតឱ្យប្រជាជនចូលរួម ជួយលើកស្ទួយវិស័យទេសចរណ៍ក្នុងស្រុក តាមរយៈការ ក្នុងអំឡុងពេលឈប់សម្រាកដាច់ពីគ្នា៕
