ដោយគង់ សូរិយា
ភ្នំពេញៈ លោកឧកញ៉ាបណ្ឌិតគីម ហ៊ាង បានថ្លែងថា ខេត្តដែលមានការរីកចម្រើនលឿន ទាល់តែខេត្តនោះមានអភិបាលខេត្ត ជាអ្នកមានជំនាញខាងសេដ្ឋកិច្ច និងការបង្កើតលុយ។
ប្រធាន KW Cambodia រូបនេះបានថ្លែងឲ្យដឹងតាមទូរស័ព្ទ នារសៀលថ្ងៃទី៣ វិច្ឆិកាកន្លងមកថា តាមធម្មតាអភិបាលខេត្ត គឺជាអ្នកធំប្រចាំខេត្ត ហេតុនេះដើម្បីឲ្យសេដ្ឋកិច្ចរបស់ខេត្តណាមួយនោះមានភាពរីកចម្រើន ទាមទារឲ្យអភិបាលខេត្តមានជំនាញខាងសេដ្ឋកិច្ច។
លោកបន្តថា “មិនថាខេត្តនោះ មានទីតាំងនៅតាមព្រំដែនឬមាត់សមុទ្រទេ បើអភិបាលខេត្ត មិនមានជំនាញខាងសេដ្ឋកិច្ច ខាងរកលុយសំរាប់អភិវឌ្ឍន៍ខេត្តទេ ខេត្តនោះមិនងាយរីកចម្រើមនឡើយ” ។ លោកឧកញ៉ាបានបន្តថា “អភិបាលខេត្តជាអ្នកធំ ហេតុនេះគាត់អាចរៀបចំដីពី១០០ទៅ១០០០ហិកតាឲ្យគេវិនិយោគ បង្កើតរោងចក្រ សហគ្រាសឲ្យបានច្រើនដោយមិនយកកម្រៃ ខេត្តនោះនឹងទាក់ទាញអ្នកវិនិយោគ និងបង្កើតការងារជូនប្រជាពលរដ្ឋហើយ” ។
លោកឧកញ៉ាគីម ហ៊ាង បានបន្តថា ហេតុនេះរាជរដ្ឋាភិបាលគួរតែតែងតាំងអភិបាលខេត្តមួយៗ ដែលមានជំនាញខាងសេដ្ឋកិច្ច ពូកែទាក់ទាញអ្នកវិនិយោគ ទើបខេត្តនោះមានភាពរីកចម្រើនលឿន ស្របតាមការចង់បានរបស់ប្រមុខរដ្ឋាភិបាលកម្ពុជា។
តាមការសង្កេតមើលជាក់ស្តែងនាពេលបច្ចុប្បន្ននេះ ខេត្តមួយចំនួនមានភាពលេចធ្លោ ដោយសារថ្នាក់ដឹកនាំខេត្តមានជំនាញខាងសេដ្ឋកិច្ច និងការអភិវឌ្ឍ ហើយខេត្តកំពុងមានភាពលេចធ្លោមានដូចជា ខេត្តព្រះសីហនុ ខេត្តកំពត និងខេត្តកំពង់ស្ពឺជាដើម៕
