បុរីថ្មីមួយតម្លៃរាប់សិបលានដុល្លារ កំពុងរួមចំណែកធ្វើឱ្យស្រុកពញាក្រែកកាន់តែមានភាពទាក់ទាញ

ដោយ ៖ រ៉ាណេត

ត្បូងឃ្មុំ ៖ គម្រោងអភិវឌ្ឍន៍បុរីលំនៅដ្ឋានបែបទាន់សម័យដ៏ធំលើកដំបូងនៅក្នុងខេត្តត្បូងឃ្មុំ ដែលកំពុងមានសកម្មភាពសាងសង់ជាបណ្តើរៗនាពេលបច្ចុប្បន្ននេះ នឹងចូលរួមកែប្រែសោភ័ណភាពខេត្ត ជាពិសេសស្រុកពញាក្រែកដែលមានប្រជាជនរស់នៅច្រើនជាងគេ ឱ្យកាន់តែមានភាពស្រស់ស្អាត និងទាក់ទាញប្រចាំតំបន់។

ស្ថិតនៅលើផ្លូវជាតិលខ៧ ដែលជាផ្លូវសេដ្ឋកិច្ចដ៏សំខាន់ គម្រោងសាងសង់បុរីលំនៅដ្ឋានបែបទាន់សម័យ និងធំជាងគេប្រចាំខេត្តត្បូងឃ្មុំ បុរី ក្រែក ស៊ីធី ហ្គាឌិន (Krek City Garden) នឹងជួយកែប្រែសោភ័ណភាព និងសេដ្ឋកិច្ចនៅក្នុងតំបន់ឱ្យកាន់តែមានភាពល្អប្រសើរ ស្ថិតនៅភូមិ ហួចលិច ឃុំក្រែក ស្រុក ពញាក្រែក ខេត្ត ត្បូងឃ្មុំ។

លោកបណ្ឌិត តេង រិទ្ធី ដែលជាម្ចាស់គម្រោងអភិវឌ្ឍន៍មួយនេះ បានមានប្រសាសន៍ប្រាប់ភ្នាក់ងារគេហទំព័រ Propertyarea.asia នៅព្រឹកថ្ងៃទី២៤ ខែវិច្ឆិកា ឆ្នាំ២០២០ នេះថា បុរី ក្រែក ស៊ីធី ហ្គាឌិន (Borey Krek City Garden) គឺជាគម្រោងអភិវឌ្ឍន៍លំនៅដ្ឋានដ៏ធំជាងគេនៅក្នុងខេត្ត ជាពិសេសនៅក្នុងស្រុកពញាក្រែក លើផ្ទៃដីទំហំជាង១៦ហិកតា ស្មើនឹងប្រមាណ ៧០០ខ្នង ដោយមានការបែងចែកជាប្រភេទ ផ្ទះអាជីវកម្ម (ប្រភេទ២ជាន់ និង៣ជាន់, ) វីឡាទោល រួមជាមួយនឹងការអភិវឌ្ឍផ្សារសហគមន៍បែបទំនើបដែលមានរហូតដល់ប្រមាណ៤០០ស្ដង់។

លោកបណ្ឌិត តេង រិទ្ធី បានមានប្រសាសន៍បន្តថា “នៅទីនេះ គឺជាទីតាំងដែលប្រមូលផ្តុំទៅដោយប្រជាពលរដ្ឋ ហើយក៏ជាតំបន់សេដ្ឋកិច្ចដ៏មមាញឹកជាងគេប្រចាំខេត្តត្បូងឃ្មុំ ដោយមានហេដ្ឋារចនាសម្ព័ន្ធជាច្រើនតភ្ជាប់ទៅកាន់បណ្តាខេត្តផ្សេងៗដូចជាខេត្តកំពង់ចាម ក្រចេះ ស្ទឹងត្រែង ក៏ដូចជាតភ្ជាប់ជាមួយរាជធានីភ្នំពេញតាមរយៈផ្លូវជាតិ ៧ និងផ្លូវជាតិលេខ៨ តភ្ជាបជាមួយផ្លូវជាតិលេខ៦A ហើយក៏ជាផ្លូវឆ្ពោះទៅកាន់ច្រកទ្វារព្រំដែនអន្តរជាតិកម្ពុជា-វៀតណាម ដែលជាតំបន់ផ្លាស់ប្ដូរទំនិញផងដែរ”។

អ្វីដែលជាលក្ខណៈពិសេសរបស់គម្រោងអភិវឌ្ឍន៍បុរីលំនៅដ្ឋានបែបទាន់សម័យមួយនេះ គឺមានការផ្តល់ជូននូវជម្រើសក្នុងការក្លាយខ្លួនជាម្ចាស់លំនៅដ្ឋានបានយ៉ាងងាយស្រួល ដោយរាល់ការទិញបង់ផ្តាច់នឹងទទួលបានការបញ្ចុះតម្លៃ ១០ភាគរយភ្លាមៗ។ ដោយឡែកសម្រាប់ការទិញដោយបង់រំលោះ អតិថិជនគ្រាន់តែបង់ចំនួន៣០ភាគរយលើកដំបូង ហើយធ្វើការបង់រំលោះប្រចាំខែដោយគ្មានការប្រាក់រហូតដល់ចំនួន២ឆ្នាំ ជាមួយនឹងការផ្តល់នូវទំនុកចិត្តខ្ពស់បង់រំលោះជាមួយក្រុមហ៊ុនក៏បាន ឬជាមួយធនាគារក៏បាន។

សម្រាប់ប្រភេទលំនៅដ្ឋានអាជីវកម្មដែលមានកម្ពស់២ជាន់ ត្រូវបានដាក់លក់ក្នុងតម្លៃចាប់ ៣៨០០០ដុល្លារឡើងទៅ ហើយប្រភេទផ្ទះអាជីវកម្ម៣ជាន់ មានតម្លៃចាប់ពីជាង ៧ម៉ឺនដុល្លារឡើងទៅ ដោយឡែកប្រភេទផ្ទះវីឡាទោល ត្រូវបានដាក់លក់ត្រឹមតម្លៃជាង ៥ម៉ឺនដុល្លារឡើងទៅតែប៉ុណ្ណោះ ដោយគ្រប់ប្រភេទលំនៅដ្ឋាន និងវីឡា សុទ្ធតែត្រូវបានសាងសង់ឡើងស្របតាមកម្រិតស្ដងដារ ទាំងទំហំផ្ទះ និងទំហំដីផងដែរ។

សម្រាប់ព័ត៌មានពាក់ព័ន្ធនឹងគម្រោង លោកអ្នកអាចទាក់ទងបានតាមរយៈទូរស័ព្ទលេខ ៖ ០៩៧ ៧០ ៥៤ ៨៨៨ / ០៩៧ ៧១ ៥៤ ៨៨៨៕