ដោយគង់ សូរិយា
ភ្នំពេញៈ ក្រុមហ៊ុន OCIC បានអះអាងថា ការវិនិយោគលើហេដ្ឋារចនាសម្ព័ន្ឋទីក្រុងកោះនរាទាំងមូល នឹងត្រូវចំណាយប្រាក់រហូតដល់ ២០០០លានដុល្លារអាមេរិក ខណៈការរៀបចំនេះនឹងបញ្ចប់នៅឆ្នាំ២០២៣ខាងមុខ។
អគ្គនាយករងក្រុមហ៊ុន OCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទកាលពីពេលថ្មូៗនេះថា ការស្ថាបនាទីក្រុងថ្មីកោះនរារហូតមកទល់ពេលនេះ បាននិងកំពុងដំណើរការយ៉ាងសកម្ម លើផែនការរយៈពេលបីឆ្នាំ ដើម្បីរៀបចំបញ្ចប់ការកសាងហេដ្ឋារចនាសម្ព័ន្ឋទីក្រុងនេះទាំងមូល ដែលគ្រោងចំណាយទឹកប្រាក់ប្រមាណ២ពាន់លានដុល្លារអាមេរិក។
លោកបន្តថា “ការសាងសង់ស្ពានតភ្ជាប់ពីទីក្រុងកោះពេជ្រ និងទីក្រុងកោះនរាបាននិងកំពុងដំណើរការយ៉ាងសកម្ម” ។ លោកបន្តថា “វាជាស្ពានយោងដោយខ្សែកាប ដែលមានរចនាបទខ្មែរ ហើយទំហំស្ពានធំជាងស្ពាន ដែលតភ្ជាប់រវាងផ្លូវជាតិលេខ៥ ទៅកាន់ទីក្រុងរណបជ្រោយចង្វារ” ។
ការស្ថាបនាស្ពានតភ្ជាប់រវាងទទីក្រុងរណបទាំងពីរនេះ គ្រោងចំណាយទឹកប្រាក់ជាង៣៨លានដុល្លារអាមេរិក ហើយស្ពាននេះនឹងរួមចំណែកសម្រួល ការធ្វើចរាចរណ៍ពីផ្លូវជាតិលេខ១ ដើម្បីតភ្ជាប់មកកាន់រាជធានីភ្នំពេញ។
លោកទូច សំណាងបានបន្តថា ទស្សនទាននៃការអភិវឌ្ឈ ទីក្រុងរណបកកោះនរា ដែលមានផ្ទៃដីទំហំជាង១០០ហិកតា និងស្ថិតនៅក្នុងផែនការមេអភិវឌ្ឍន៍ ដែលមានភាពស្រដៀងគ្នានឹងទីក្រុងកោះពេជ្រ៕
