ដោយៈ រ៉ាណេត
ភ្នំពេញៈ ឈានចូលដល់សករាជថ្មីនៅក្នុងត្រីមាសទី១ ឆ្នាំ២០២១នេះ បើទោះជាស្ថានភាពនៃជំងឺរាតត្បាត ត្រូវបានរាជរដ្ឋាភិបាលទប់ស្កាត់បានលទ្ធផលល្អប្រសើរក្ដី ប៉ុន្តែសម្រាប់តម្រូវការទីផ្សារខុនដូ នៅតែបន្តមានការធ្លាក់ចុះដដែលមិនទាន់អាចងើបឡើងវិញបានល្អនោះទេ។ នេះបើតាមអ្នកជំនាញក្នុងវិស័យនេះអះអាង។
នាយិកាប្រចាំប្រទេស នៃក្រុមហ៊ុនភ្នាក់ងារអចលនទ្រព្យ CBRE Cambodia លោកស្រី អាន សុធីតា បានមានប្រសាសន៍ប្រាប់ឱ្យដឹងនៅរសៀលថ្ងៃទី៣ ខែមករា ឆ្នាំ២០២១កន្លងមកថា ទីផ្សារខុនដូនៅក្នុងត្រីមាសទី១ ឆ្នាំ២០២១នេះ នឹងនៅតែបន្តការធ្លាក់ចុះដដែល។
លោកស្រីបានបញ្ជាក់ថា “ទីផ្សារខុនដូចាប់ផ្តើមធ្លាក់ខ្លាំង គឺទើបតែនៅក្នុងត្រីមាសទី៤ ចុងឆ្នាំ២០២០កន្លងទៅនេះតែប៉ុណ្ណោះ ខណៈដែលកាលពីអំឡុងត្រីមាសទី២ និងទី៣ សកម្មភាពទិញលក់នៅតែមានជាធម្មតា” ។ លោកស្រីបន្តថា “មួយរយៈចុងក្រោយនេះ ប្រជាជនខ្មែរមួយចំនួន បានចាប់ផ្តើមមានការស្វែងយល់ពីខុនដូ ហើយពួកគាត់មួយចំនួនតូច ក៏បានចាប់ផ្តើមចំណាយលុយទិញខុនដូ ទៅតាមលទ្ធភាពរបស់ខ្លួនក្នុងគោលបំណងផ្សេងគ្នា ដោយខ្លះទិញសម្រាប់រស់នៅ ហើយអ្នកខ្លះទៀតទិញសម្រាប់ទុនវិនិយោគ ឬជួលយកចំណូលប្រចាំខែ ប្រចាំឆ្នាំជាដើម” ។
លោកស្រីអាន សុធីតា បានបន្តថា អ្វីដែលសំខាន់នៅក្នុងដំណាក់កាលនេះ ទាំងតម្រូវការទិញលក់ ទាំងតម្រូវការជួលខុនដូ គឺមានការធ្លាក់ចុះខ្លាំង ដោយសារតែកម្ពុជានៅតែបន្តជាមួយស្ថានភាពប្រឈមនៅឡើយ។ វាអាចនឹងស្ថានភាពបែបនេះ ទោះជាអតិថិជនក្នុងស្រុក អាចចាប់ផ្តើមមានសកម្មភាពឡើងវិញខ្លះៗ ប៉ុន្តែសម្រាប់ទីផ្សារជនបរទេសមួយចំនួន ដែលកំពុងរស់នៅក្នុងប្រទេសកម្ពុជា និងស្នាក់នៅក្នុងខុនដូបានសម្រេចចិត្តចេញទៅជួលផ្ទះនៅជាយក្រុងនៅឡើយ។
ទោះជាយ៉ាងណាក៏ដោយ លោកស្រីបានបញ្ជាក់ថា សម្រាប់ការទិញលក់ខុនដូមានការធ្លាក់ចុះ តែមិនធ្ងន់ធ្ងរខ្លាំងដូចការបាត់បង់តម្រូវការជួលនោះទេ ពោលគឺធ្លាក់ចុះប្រមាណ៣០-៥០ភាគរយ ខណៈដែលតម្រូវការជួល មានការធ្លាក់ចុះរហូតដល់ប្រមាណ៨០ភាគរយ ប៉ុន្តែសង្ឃឹមថាទីផ្សារជួល ដែលទទួលរងនូវភាពធ្ងន់ធ្ងរមួយនេះ អាចនឹងងើបឡើងវិញជាបណ្ដើ រៗខណៈដែលព្រឹត្តិការណ៍២៨វិច្ឆិកា ត្រូវបានប្រកាសបញ្ចប់ជាស្ថាពរកាលពីពេលកន្លងទៅថ្មីៗនេះ៕
