ដោយៈរ៉ាណេត
ភ្នំពេញៈ ទំហំពាណិជ្ជកម្មទ្វេភាគី កម្ពុជា-ជប៉ុនសម្រេចបានប្រមាណ២០១០ លានដុល្លារអាមេរិក ក្នុងនោះកម្ពុជានាំចេញទៅជប៉ុន មានទំហំទឹកប្រាក់ប្រមាណ១,១៣១ លានដុល្លារ និងជប៉ុននាំចូលមកវិញ ក្នុងចំនួនទឹកប្រាក់ជាង ៨៧៩លានដុល្លារ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងក្នុងពិធីបើកសម្ពោធការតាំងបង្ហាញទំនិញជប៉ុន “Good Goods Japan ២០២១” នៅថ្ងៃទី៣ ខែកុម្ភៈនេះថា គិតត្រឹម៦ខែដើមឆ្នាំ២០២០ ទំហំពាណិជ្ជកម្មទ្វេភាគីកម្ពុជា-ជប៉ុន សម្រេចបានប្រមាណ៨៤១លានដុល្លារ។
លោកបន្ថែមថា ទំនិញដែលកម្ពុជានាំចេញទៅជប៉ុនមាន ដូចជា ផលិតផលសម្លៀកបំពាក់កាត់ដេរ ស្បែកជើង គ្រឿងសង្ហារឹម គ្រឿងសំអាង ក្រដាស សម្ភារៈការិយាល័យ ស្បែកនិងផលិតផលធ្វើអំពីស្បែក និងដែក ។ល។ ទំនិញដែលនាំចូលពីជប៉ុន រួមមាន គ្រឿងម៉ាស៊ីន រថយន្ត សាច់ គ្រឿងអេឡិចត្រូនិច សង្ហារឹម ក្រដាស កប្បាស ក្រណាត់គ្រប់ប្រភេទ ផលិតផលផ្លាស្ទីក សម្ភារៈកីឡា និងគ្រឿងបន្ទាប់បន្សំ ជាដើម។
លោកបន្តថា “ទំនាក់ទំនងការទូតរវាងកម្ពុជា និងប្រទេសជប៉ុនកើតឡើងតាំងពីឆ្នាំ១៩៥៣មកម្ល៉េះ រហូតមកដល់ឆ្នាំ២០១៣ កន្លងទៅកម្ពុជា និងជប៉ុនបានក្លាយជាដៃគូយុទ្ធសាស្ត្រ និងកិច្ចសហប្រតិបត្តិការស៊ីជម្រៅជាមួយគ្នា។លោកបន្តថា “ជប៉ុនបានជួយជ្រោមជ្រែងអភិវឌ្ឍន៍ប្រទេសកម្ពុជា តាមរយៈការស្តាឡើងវិញ នូវហេដ្ឋារចនាសម្ព័ន្ធរូបវន្ត បណ្តុះបណ្តាលធនធានមនុស្ស ពង្រីកទំនាក់ទំនងសេដ្ឋកិច្ច ពាណិជ្ជកម្ម ជំរុញវិស័យទេសចរណ៍ និងវិនិយោគជាដើម” ។
ក្នុងក្របខណ្ឌកិច្ចសហប្រតិបត្តិការ លើវិស័យសេដ្ឋកិច្ចរវាងអាស៊ាន និងជប៉ុន ជប៉ុន បានរៀបចំគម្រោងអភិវឌ្ឍសេដ្ឋកិច្ច៨៧គម្រោង ក្នុងនោះ៥៨គម្រោង សម្រាប់ជួយដល់ប្រទេសកម្ពុជា ឡាវ ភូមា និងវៀតណាម លើវិស័យកសិកម្ម ទេសចរណ៍ ការអភិវឌ្ឍន៍សហគ្រាសធុនតូច និងមធ្យម ធានាគុណភាពទំនិញ ជំរុញវិនិយោគ កសាងបរិយាកាស អាជីវកម្ម បរិស្ថាន កសាងសមត្ថភាពមន្ត្រីរាជការ ដើម្បីកាត់បន្ថយគម្លាតនៃការអភិវឌ្ឍរបស់ប្រទេសក្រីក្រ។
ចាប់តាំងពីឆ្នាំ១៩៩៤ ដល់ឆ្នាំ២០១៨ គម្រោងវិនិយោគរបស់ជប៉ុន នៅកម្ពុជា មានចំនួន១៣៧គម្រោង ដែលមានទុនវិនិយោគសរុបចំនួន២,៤៨៦ លានដុល្លារ។ ក្នុងឆ្នាំ២០១៩ ជប៉ុនវិនិយោគមាន៦គម្រោង ដែលមានទឹកប្រាក់ចំនួន២៩៩លានដុល្លារ ក្នុងនេះ គម្រោងសាងសង់ផ្សារ AEON Mall 3 មាន ទុនវិនិយោគ រហូតដល់២៨៩.៦លានដុល្លារ ហើយក្នុងឆ្នាំ២០២០ មាន១គម្រោង ដែលមានទឹកប្រាក់ចំនួន ៧.១៧លានដុល្លារ ភាគច្រើន គឺវិនិយោគក្នុងតំបន់សេដ្ឋកិច្ចពិសេសភ្នំពេញ បាវិត នាងកុក ប៉ោយប៉ែត និងក្នុង តំបន់សេដ្ឋកិច្ចពិសេសខេត្តព្រះសីហនុ៕
