ដោយៈគង់ សូរិយា
ភ្នំពេញៈ ក្រសួងទេសចរណ៍ បានធ្វើការយ៉ាងជិតស្និតជាមួយទីភ្នាក់ងារស្វីសសម្រាប់ការអភិវឌ្ឍន៍ និងកិច្ចសហប្រតិបត្តិការ (SDC) អង្គការស្វីសខន់ថាក់ និងមន្ទីរទេសចរណ៍ខេត្ត និងបានបណ្តុះបណ្តាលយុវជនលើជំនាញទេសចរណ៍ និងបដិសណ្ឋារកិច្ចក្នុងដំណាក់កាលទី២ ដើម្បីលើកស្ទួយធនធានមនុស្សក្នុងវិស័យនេះ។
យោងតាមរបាយការណ៍នៃកិច្ចប្រជុំបូកសរុប ការងារត្រីមាសទី១ និងទិសដៅត្រីមាសទី២ ឆ្នាំ២០២១ របស់គណៈកម្មការគ្រប់គ្រងគម្រោងបដិសណ្ឋារកិច្ចសម្រាប់កម្ពុជា(ហូកា)កាលពីចុងសប្តាហ៍មុនបានឲ្យដឹងថា គម្រោងបណ្តុះបណ្តាលបដិសណ្ឋារកិច្ចហូកាជំហានទី២ឆ្នាំ២០២០ -២០២៤បានកំពុងចាប់ផ្តើម ដោយផ្តោតការយកចិត្តទុកដាក់លើការបណ្តុះបណ្តាលជំនាញវិជ្ជាជីវៈ ដល់ក្រុមយុវជនងាយរងគ្រោះ ម្ចាស់អាជីវកម្មទេសចរណ៍ អាជីវកម្មខ្នាតតូច និងសហគមន៍អេកូទេសចរណ៍ នៅតាមបណ្តាខេត្តគោលដៅចំនួន៥រួមមាន ក្រចេះ ស្ទឹងត្រែង ព្រះវិហារ មណ្ឌលគិរី និងរតនគិរី។
គម្រោងបណ្តុះបណ្តាលនេះ មានទិសដៅចម្បងគឺលើកកម្ពស់ជីវភាពរស់នៅរបស់ប្រជាជនមូលដ្ឋាន តាមរយៈការបណ្តុះបណ្តាល ជំនាញវិជ្ជាជីវៈទេសចរណ៍ ការពង្រឹងអាជីវកម្ម គុណភាពសេវាកម្មទេសចរណ៍ និងការកសាងវិថីអភិវឌ្ឍន៍ដល់អ្នកជំនាញទេសចរណ៍ដើម្បីឆ្ពោះទៅការសិក្សាពេញមួយជីវិត។
លោកប៉ាក់ សុខុម រដ្ឋលេខាធិការ ក្រសួងទេសចរណ៍ បាន មាន ប្រសាសន៍ ថា កម្មវិធី នេះ នឹង ផ្តល់ ឱ្យ យុវជន នូវ ជំនាញ វិជ្ជាជីវៈ បង្កើតឱកាស ការងារ និង ប្រាក់ ចំណូល ។សម្រាប់ជំហ៊ានទី ២ នៃកម្មវិធីនេះយុវជននៅក្នុងខេត្តដែលបានជ្រើសរើសនឹងត្រូវបានផ្តល់នូវជំនាញបដិសណ្ឋារកិច្ចដើម្បីពួកគេអាចទទួលបានការងារធ្វើ” ។
លោកបន្តថា កម្មវិធីនេះក៏នឹងជួយពង្រឹងមន្រ្តីទេសចរណ៍ទាំងថ្នាក់ជាតិ និងថ្នាក់ក្រោមជាតិ ក៏ដូចជាគាំទ្រដល់ការអភិវឌ្ឍអេកូទេសចរណ៍របស់ប្រទេសផងដែរ៕
