ដោយៈ រ៉ាណេត
ភ្នំពេញៈ ក្រសួងប្រៃសណីយ៍ កម្ពុជាបានបង្កើនទំនុកចិត្ត ជាមួយបណ្តាប្រទេសនានានៅជុំវិញពិភពលោក និងបានបង្កើនកិច្ចទំនាក់ទំនងក្នុងនាមជាដៃគូ លើការដឹកជញ្ជូនទំនិញគ្រប់ប្រភេទសរុបចំនួន ១៩២ប្រទេស ហើយក៏សមាជិករបស់ UBU ដែលមានប្រព័ន្ធគ្រប់គ្រង EMS អាចអនុញ្ញាតឱ្យអតិថិជន ឆែកមើលអីវ៉ាន់បញ្ញើររបស់ខ្លួន ទៅដល់គោលដៅណាមួយបានយ៉ាងងាយស្រួល។
ប្រធានសមាគមពាណិជ្ជករដឹកជញ្ជូនទំនិញ លោកជា ចាន់ដារ៉ា បានប្រាប់ឱ្យដឹងនៅថ្ងៃទី៩ ខែមីនា ឆ្នាំ២០២១នេះថា សេវាកម្មដឹកជញ្ជូនទំនិញ ស្ថិតក្នុងស្ថានភាពវិបត្តិនៃជំងឺកូវីដ-១៩ បានធ្លាក់ចុះយ៉ាងខ្លាំង ព្រោះផលិតផលមួយចំនួនធំគ្មានអ្នកបញ្ជាទិញ។
លោកបញ្ជាក់ថា “វិស័យដឹកជញ្ជូនទំនិញកម្ពុជា អាចនឹងងើបឡើងល្អប្រសើរវិញបន្ទាប់ពីវិបត្តិនៃជំងឺកូវីដ-១៩មានភាពធូរស្រាល ខណៈដែលបច្ចុប្បន្នកម្ពុជានៅតែជាប្រទេសគោលដៅយ៉ាងសំខាន់ ដែលមានភាពទាក់ទាញអ្នកវិនិយោគទុនថ្មីៗបន្ថែម” ។ លោកបន្តថា “កម្ពុជា ក៏ជាប្រទេសនាំចេញផលិតផលកសិកម្ម កាន់តែច្រើនទៅកាន់ទីផ្សារអន្តរជាតិ ដោយសាររាជរដ្ឋាភិបាលបានកំពុងជំរុញអភិវឌ្ឍន៍វិស័យកសិកម្ម ដើម្បីបម្រើទីផ្សារក្នុងស្រុក ក៏ដូចជាការនាំចេញ ហើយក្រៅពីនេះរាជរដ្ឋាភិបាល ក៏បានជំរុញពង្រីកទីផ្សារក្រៅប្រទេសបន្ថែមទៀត តាមរយៈនៃការចុះកិច្ចព្រមព្រៀងផ្សេង” ។
លោកជា ចាន់ដារ៉ា បានបញ្ជាក់ថា កន្លងមកនេះ សមាគមបានចុះអនុស្សារណៈជាមួយប្រៃសណីយ៍កម្ពុជា ដើម្បីផ្សារភ្ជាប់សេវាដឹកជញ្ជូនទំនិញឲ្យបានរហ័ស និងមានទំនុកចិត្ត។ ក្រៅពីនេះ សមាគមពាណិជ្ជករដឹកជញ្ជូនទំនិញ ក៏បានចុះអនុស្សារណៈបន្ថែមជាមួយគណៈកម្មាធិការជាតិ ជំរុញភូមិមួយផលិតផលមួយជាដើម។
លោកបន្តថា “យើងជឿជាក់ថា បន្ទាប់ពីស្ថានភាពនៃការរាតត្បាតជំងឺកូវីដត្រូវបានផុតរលត់ វិស័យដឹងជញ្ជូនរបស់កម្ពុជានឹងមានការកើនឡើងខ្ពស់ ទាំងការដឹកជញ្ជូនតាមគោក ផ្លូវទឹក និងផ្លូវអាកាស” ៕
