ដោយៈ ម៉ាណេត
ភ្នំពេញៈ គម្រោងអភិវឌ្ឍន៍ជាច្រើន នៅក្នុងវិស័យសំណង់ក្នុងខេត្តព្រះសីហនុ បានផ្អាកដំណើរការ ដោយក្នុងនោះនៅមានទីតាំងតិចបំផុងនៅដំណើរការ អំឡុងពេលវិបត្តិកូវីដ១៩ (ព្រឹត្តិការណ៍២០កុម្ភៈ)។ បើយោងតាមការបញ្ជាក់របស់អ្នកនាំពាក្យសាលាខេត្តព្រះសីហនុ នៅថ្ងៃទី១២ ខែមីនា ឆ្នាំ២០២១ ។
លោកឃាង ភារម្យអ្នកនាំពាក្យសាលាខេត្តព្រះសីហនុ បានថ្លែងប្រាប់អ្នកសារព័ត៌មានថា ស្របពេលដែលវិស័យផ្សេងៗ ដំណើរការធម្មតាក៏ពិតមែន តែក្នុងនោះមានវិស័យសាងសង់សំណង់ក្នុងខេត្ត មានការផ្អាកដំណើរការ ហើយក្នុងនោះនៅមានទីតាំងតិចបំផុងនៅដំណើរការប៉ុណ្ណោះ។
លោកបានថ្លែងទៀតថា “ការផ្អាកដំណើរការសាងសង់សំណង់នេះដែរ បន្ទាប់ពីមានការអំពាវនាវរបស់រដ្ឋបាលខេត្ត ដែលបានសូមឲ្យប្រជាពលរដ្ឋកុំចាក់ចេញ ឬធ្វើការចល័តទៅតាមទីតាំង ដែលមានការប្រមូលផ្ដុំផ្សេងៗ លើកលែងតែមានករណីណាមួយដែលចាំបាច់” ។ លោកបានបន្តថា “សំណង់វិនិយោគក្នុងខេត្តព្រះសីហនុ ភាគច្រើនជាសំណង់អគារខ្ពស់ៗ ដូចជា សំណង់បែបអគារពាណិជ្ជកម្ម សណ្ឋាគារ និងសំណង់ផ្សេងៗទៀត ដែលបម្រើឲ្យវិស័យទេសចរណ៍នៅក្នុងខេត្ត” ។
លោកឃាង ភារម្យ បានថ្លែងតទៀតថា ក្នុងស្ថានភាពនេះប្រសិនបើយើង ក៏ដូចជាប្រជាពលរដ្ឋទាំងអស់ អនុវត្តតាមការណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល រួមទាំងការអំពាវនាវរបស់ខេត្ត និងប្រជាពលរដ្ឋមិនមានការចល័ត ហើយអនុវត្តតាមការណែនាំរបស់រាជរដ្ឋាភិបាល ដែលលោកបានដាក់ចេញ ៣កុំ និង៣ការពារ នោះនឹងផ្ដល់ភាពងាយស្រួល ដល់ការគ្រប់គ្រងពីស្ថានភាពដ៏អាក្រក់នេះបានផងដែរ។
លោកក៏បានបញ្ជាក់ផងដែរថា រយៈពេល៤ឆ្នាំចុងក្រោមនេះ គិតចាប់ពីឆ្នាំ២០១៧ ដល់ខែធ្នូ ឆ្នាំ២០២០ ខេត្តព្រះសីហនុមាន សំណង់សរុបបានអនុញ្ញាតឲ្យសាងសង់មានចំនួន ១,៥១៤អគារ មានក្រឡាផ្ទៃសរុប១៤,៧៣៦,៥៥៩ម៉ែត្រការ៉េ និងទុនវិនិយោគសរុប ៨,០៤៩,៦៩២,៨៣១ដុល្លារអាមេរិក៕
