ដោយៈ ប៊ី
ភ្នំពេញៈ ព័ត៌មានលម្អិតអំពីផ្លូវដែកពីរគន្លងពីទីក្រុង Mae Sot ខេត្ត Tak ទៅខេត្ត Kamphaeng Phet និងទីក្រុង Nakhon Sawan ក្នុងខេត្ត Nakhon Sawan នឹងត្រូវប្រកាសនៅក្នុងសិក្ខាសាលាមួយនៅថ្ងៃទី១៩ ខែមីនានៅសណ្ឋាគារ Wiang Tak ក្នុងស្រុកមឿង។ នេះបើយោងតាមការចេញផ្សាយរបស់កាសែតបាងកកប៉ុស្តិ៍ នៅថ្ងៃទី១៥ ខែមីនា ឆ្នាំ០២១។
គម្រោងនេះគឺជាផ្នែកដំបូង នៃផ្លូវដែកមានពីរគន្លង តាមបណ្តាញច្រកផ្លូវសេដ្ឋកិច្ចខាងកើត-ខាងលិច ដែលនឹងគាំទ្រដល់ការដឹកជញ្ជូនទៅកាន់ប្រទេសជិតខាង ដូចជាមីយ៉ាន់ម៉ា ឡាវ វៀតណាម និងប្រទេសកម្ពុជា និងជួយក្នុងការជំរុញពាណិជ្ជកម្ម និងទេសចរណ៍នៅក្នុងតំបន់។
ក្រមហ៊ុនផ្លូវដែករដ្ឋ (SRT) បានផ្ញើលិខិតអញ្ជើញតំណាងការិយាល័យរដ្ឋាភិបាលរដ្ឋបាលមូលដ្ឋាន និងសាធារណជនទូទៅ ឱ្យចូលរួមសិក្ខាសាលា ដែលនឹងត្រូវដឹកនាំដោយលោក Pongrat Piromrat អភិបាលខេត្តTak។
នៅក្នុងសិក្ខាសាលានេះតំណាងក្រុមហ៊ុន SRT នឹងពន្យល់លម្អិតអំពីគម្រោងនេះ។
នៅឆ្នាំ ២០២០ ក្រុមប្រឹក្សា SRT បានអនុម័តការជួលក្រុមហ៊ុន Tesco Co, សាកលវិទ្យាល័យជូឡាឡុងកន និងក្រុមហ៊ុន Design Concept Co ក្នុងតម្លៃ ១៦៨លានបាត ដើម្បីធ្វើការសិក្សាលើការរចនា រៀបចំដី និងវាយតម្លៃផលប៉ះពាល់បរិស្ថាន សម្រាប់ការសាងសង់ផ្លូវដែកប្រវែង២៥៦គីឡូរម៉ែត្រ ដែលមានគម្រោងចំណាយ៩៦ពាន់លានបាត។
ក្រុមការងារនេះត្រូវបានផ្តល់ឱ្យរយៈពេល៣៦០ថ្ងៃ ដើម្បីបញ្ចប់ការងារទាំងនេះ។ ប្រជាជននៅខេត្ត Mae Sot ជាទូទៅបានស្វាគមន៍ចំពោះផ្លូវដែក ដែលបានគ្រោងទុកសម្រាប់ការស្ថាបនានាពេលមុខ៕
