ដោយៈ រ៉ាណេត
ភ្នំពេញៈ បន្ថែមពីលើការរៀបចំ និងស្ថាបនាផ្លូវថ្នល់ ស្ពានចាស់ដែលមានស្រាប់ និងកំពុងចរាចរណ៍ឱ្យកាន់តែទូលាយល្អប្រសើរជាងមុន រដ្ឋបាលរាជធានីភ្នំពេញកំពុងសិក្សាពីគម្រោងសាងសង់ផ្លូវថ្មីមួយខ្សែទៀត ប្របតាមច្រាំងទន្លេចាប់ពីចំណុចស្ពានព្រះមុនីវង្សរហូតដល់តំបន់អភិវឌ្ឍន៍កោះន។
តាមរយៈមន្ត្រីសាលាខណ្ឌច្បារអំពៅ បានបង្ហើបប្រាប់នៅល្ងាចថ្ងៃទី២៤ ខែមីនា ឆ្នាំ២០២១នេះ ក្នុងគោលបំណងជួយសម្រួល ដល់ការធ្វើដំណើរដល់ប្រជាពលរដ្ឋ និងកាត់បន្ថយនូវជំនន់កកស្ទះចរាចរណ៍ ដែលទេកើតមានជារៀងរាល់ថ្ងៃ នៅកំណាត់ផ្លូវជាតិលេខ១ ក្នុងសង្កាត់ច្បារអំពៅ ខណ្ឌច្បារអំពៅ ជាពិសេសនៅចំណុចគល់ស្ពានព្រះមុនីវង្ស រដ្ឋបាលរាជធានីភ្នំពេញ កំពុងសិក្សាពីគម្រោងសាងសង់ផ្លូវបន្ថែមថ្មីមួយខ្សែទៀត។
មន្ត្រីដដែលនេះបានបញ្ជាក់ថា “គម្រោងសាងសង់ផ្លូវថ្មីមួយខ្សែនេះ អាចត្រូវបានចាប់ផ្តើមពីចំណុចគល់ស្ពានព្រះមុនីវង្សចាស់ ប្របតាមច្រាំងទន្លេបន្តឆ្ពោះទៅតំបន់អភិវ ឌ្ឍន៍កោះនរា ក្បែរគម្រោងកំពង់ចម្លងថ្មី ដែលគ្រោងនឹងដំណើរនៅពេលឆាប់ៗខាងមុខនេះ”។
មន្រ្តីដដែលបានបន្តថា នៅត្រឹមល្ងាចថ្ងៃទី២៤ ខែមីនា ឆ្នាំ២០២១នេះ ការវាស់វែង និងកំណត់ព្រំធ្វើទីតាំងច្រាំងទន្លេ និងស្ថាបនាផ្លូវថ្មីមួយខ្សែនេះ ត្រូវបានមន្ត្រីជំនាញចុះវាស់វែង និងបោះបង្គោលរួចរាល់ហើយ ក្រោមកិច្ចចូលរួមសហការពីសំណាក់ប្រជាពលរដ្ឋដែលពាក់ព័ន្ធ ដែលធ្វើឱ្យការកំណត់ព្រំ ទីតាំង និងការបោះបង្គោលប្រព្រឹត្តយ៉ាងរលូន។
ទោះជាយ៉ាងណាមន្ត្រីរូបនេះ មិនបានបញ្ជាក់លម្អិតពីទម្រង់ផ្លូវថ្នល់ ដែលនឹងត្រូវសាងសង់មានទំហំ និងប្រវែងប៉ុន្មានម៉ែត្រនៅឡើយ ដោយពេលនេះកំពុងស្ថិតនៅក្នុងដំណាក់កាលសិក្សាពីលទ្ធភាព និងផលប៉ះពាល់នៅឡើយ៕
