ដោយៈគង់ សូរិយា
ភ្នំពេញៈ គំរោងវិនិយោគស្ថានីយ៍អគ្គិសនីដើរដោយថាមពលខ្យល់ នៅខេត្តមណ្ឌ
លគិរី កំពុងស្ថិតក្នុងដំណាក់កាលសិក្សានៅឡើយ ខណៈខេត្តនេះកំពុងមានតម្រូវការថាមពលអគ្គិសនីកើនឡើង ដោយសារល្បឿននៃការអភិវឌ្ឍក្នុងមូលដ្ឋាន។
ក្រុមហ៊ុនដែលវិនិយោគគំរោងនេះ មានឈ្មោះ Xinglan Maritime Energy Co., Ltd កំពុងពន្លឿនបញ្ចប់ការសិក្សាទាំងរបាយការណ៍បច្ចេកទេស និងហិរញ្ញវត្ថុ សម្រាប់គម្រោងផលិតថាមពលអគ្គិសនី ដើរដោយថាមពលខ្យល់អានុភាព១០០មេហ្កាវ៉ាត់ នៅខេត្តមណ្ឌលគីរី។
មន្រ្តីជាន់ខ្ពស់ក្រសួងរ៉ែ និងថាមពល លោកវ៉ិចទ័រ ហ្សូណា អគ្គនាយកថាមពលនៃក្រសួងរ៉ែ និងថាមពលបានមានប្រសាសន៍ឲ្យដឹងកាលពីចុងសប្តាហ៍មុននេះថា ក្រុមហ៊ុន Xinglan Maritime Energy Co., Ltd បានទទួលលិខិតអនុញ្ញាតសិក្សា លើគម្រោងតាំងពីឆ្នាំ ២០១៩មកកន្លងមកនេះ។
លោកបន្តថា “រហូតមកទល់ពេលនេះ ក្រុមហ៊ុនកំពុងព្យាយាមបញ្ចប់ការសិក្សាលើគំរោងនេះ ប៉ុន្តែបើសិនក្រុមហ៊ុនសិក្សាចប់ គាត់នឹងយកមកដាក់របាយការណ៍មកមកក្រសួង ដើម្បីពិនិត្យនិងសម្រេច”។
លោកវ៉ិកទ័រ ហ្សូណាបានបន្តឲ្យដឹងផងដែរថា នាពេលកន្លងមកនេះ ក្រុមហ៊ុនបានដំឡើងប៉មវាស់ខ្យល់ ដែលមានកម្ពស់១០០ម៉ែត្រ ចំនួន២កន្លែងរួចមកហើយ ដោយប៉មទី១ ស្ថិតក្នុងសង្កាត់សុខដុម នៃក្រុងសែនមនោរម្យ និងប៉មទី២ ស្ថិតនៅឃុំដាក់ដាំ ស្រុកអូររាំង ខេត្តមណ្ឌលគិរី។
ក្រុមហ៊ុន Xinglan Maritime Energy Co., Ltd. ជាប្រភេទក្រុមហ៊ុនសហកម្មសិទ្ឋ ដែលជាការវិនិយោគរួមគ្នារវាងក្រុមហ៊ុនក្នុងស្រុក Maritime Group ជាមួយក្រុមហ៊ុនយក្សក្នុងវិស័យថាមពលកកើតជាថ្មីរបស់ប្រទេសចិន Xinglan Group។
បច្ចុប្បន្នក្រៅពីគម្រោងវិនិយោគថាមពលអគ្គិសនី របស់Xinglan Maritime Energy Co., Ltd. កម្ពុជាក៏មានក្រុមហ៊ុនមកពីបារាំងThe Blue Circle ដែលកំពុងធ្វើការសិក្សាបង្កើតរោងចក្រ ផលិតថាមពលអគ្គិសនីដើរដោយខ្យល់នៅក្នុងខេត្តជាប់តំបន់ឆ្នេរមួយរបស់កម្ពុជាផងដែរ៕
