ដោយៈគង់ សូរិយា
ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ថា លំហូរពាណិជ្ជកម្មកម្ពុជាទៅកាន់ទីផ្សារអន្តរជាតិ មិនរងផលប៉ះពាល់ធ្ងន់ធ្ងរដោយសារវិបត្តិជំងឺកូវីដ១៩នោះទេ។
លោកឧកញ៉ាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣០ មិនានេះថា ការនាំចេញរបស់កម្ពុជាទៅកាន់អាមេរិក អឺរ៉ុប មិនរងផលប៉ះពាល់នោះទេ ដោយលំហូរទំនិញនៅតែបន្តកើនឡើង ហើយនឹងកើនឡើងជាមួយប្រទេសវៀតណាមផលដែរ ដោយសាររដ្ឋាភិបាលវៀតណាម បានអនុគ្រោះពន្ឋលើទំនិញចំនួន៣១មុខ ដោយរួចពន្ឋពីកម្ពុជា។
លោកឧកញ៉ាបន្តថា “ទោះជាយ៉ាងណាការនាំចេញទៅជប៉ុន បានធ្លាក់ចុះមួយចំនួន ប៉ុន្តែយើងរំពឹងអ្វីៗវិលមករកភាពប្រសើរឡើងវិញ ក្រោយបញ្ចប់វិបត្តិកូវីដ១៩”។លោកឧកញ៉ាបានបន្តថា “ស្ថានភាពពាណិជ្ជកម្មនាពេលនេះនៅតែល្អប្រសើរ ហើយបើប៉ះពាល់ក៏មិនមានកម្រិតធ្ងន់ធ្ងរនោះដែរ”។
ជាមួយគ្នានេះ លោកបណ្ឌិតហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានមានប្រសាសន៍ឲ្យដឹងផងដែរថា តាមរបាយការណ៍របស់ក្រសួងកសិកម្ម យើងឃើញថា ការនាំចេញផលិតផលកសិកម្មនៅតែបន្តកើនឡើង ប៉ុន្តែការនាំចេញកង់់ និងផលិតផលមួយចំនួនទៀតមានការថយចុះ ប៉ុន្តែមិនស្ថិតក្នុងកម្រិតធ្ងន់ធ្ងរនោះទេ។
លោកបន្តថា “ប្រសិនបើកម្ពុជាអាចចាក់វ៉ាក់សាំងបាន១លានដូសក្នុង១ខែ តាមប្រសាសន៍របស់សម្តេចតេជោ នឹងជួយធ្វើឲ្យស្ថានភាពជំងឺកូវីដ១៩នៅកម្ពុជា វិលមករកភាពប្រសើរឡើងវិញ ហើយសេដ្ឋកិច្ចកម្ពុជានឹងឆាប់វិលមករកភាពប្រក្រតីផងដែរ”។លោកបន្តថា “យើងមិនរំពឹងសេដ្ឋកិច្ចកម្ពុជាមានកំណើនខ្ពស់នោះទេ ការសម្រេចបានត្រឹម៤ភាគរយវាជាការប្រសើរណាស់សម្រាប់ឆ្នាំនេះ”៕
