ដោយៈ រ៉ាណេត
ភ្នំពេញៈ គម្រាងសាងសង់ផ្សារទំនើបលំដាប់អន្តរជាតិ AEON3 ស្ថិតនៅផ្លូវ៦០ម៉ែត្រ កំពុងតែបន្តការសាងសង់យ៉ាងសកម្ម ដែលស្ថិតនៅក្នុងដំណាក់កាលដំបូងនៃការបុកគ្រឹះ និងឈានទៅដល់ដំណាក់កាលបន្ទាប់នៃការចាប់ក្រវាត់នៃសរសរគ្រឹះ។
ផ្អែកតាមការឱ្យដឹងពីថ្នាក់ដឹកនាំជាន់ខ្ពស់ នៃគម្រោងសាងសង់ផ្សារទំនើបជប៉ុន AEON3 ដែលមានទីតាំង ស្ថិតនៅតាមបណ្តោយមហាវិថីសម្ដេចតេជោហ៊ុន សែន មិនបានបង្អាក់ ឬផ្អាក់ប្រតិបត្តិការរបស់ខ្លួនឡើយ ផ្ទុយទៅវិញគម្រោងមួយនេះកំពុងតែមមាញឹកក្នុងការបុកគ្រឹះសាងសង់គ្រោងសំណង់របស់ខ្លួន ដោយគ្មានការរាំងស្ទះនោះទេ។
ប្រភពដដែលសុំមិនបញ្ចេញឈ្មោះបានប្រាប់ទៀតថា បច្ចុប្បន្ននេះបើទោះជាមានបញ្ហានៃវិបត្តិកូវីដ១៩ ប៉ុន្តែផែនការនៃគម្រោងមិនប៉ះពាល់នោះទេ។ ក្រុមហ៊ុនអភិវឌ្ឍន៍មានទុនបម្រុងរួចជាស្រេច និងគ្រប់គ្រាន់មិនពឹងផ្អែក ទៅលើទុនខាងក្រៅនោះទេ គេដើរតាមផែនការនៃការអភិវឌ្ឍន៍ ដូច្នេះបើទោះជាមានបញ្ហា ដែលកំពុងកើតមាននៅពេលនេះ ក៏មិនជះឥទ្ធិពលទៅលើគម្រោងនោះដែរ។
គម្រោងរបស់ក្រុមហ៊ុន គឺត្រូវបណ្ចប់នៅត្រឹមឆ្នាំ២០២៣ ដូច្នេះពេលនេះបើទោះជាមានបញ្ហាសេដ្ឋកិច្ចផ្ទៃក្នុង ប៉ុន្តែមិនជះឥទ្ធិពលដល់គម្រោងនោះទេ ពួកគេនៅតែបន្ត និងជំរុញការសាងសង់ លុះនៅពេលចប់វិបត្តិ គម្រោងទាំងមូលក៏ត្រូវបញ្ចប់ ដូច្នេះទីផ្សារដែលអាចទទួលយកបាន គឺមានវិសាលភាពធំទូលាយជាងពេលបច្ចុប្បន្នជាក់ជាមិនខាន។
គម្រោងសាងសង់ផ្សារទំនើបដ៏ធំ AEON3 ត្រូវបានធ្វើឡើងនៅលើផ្ទៃដីទំហំជាង១៧ហិកតា ស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ក្បែរស្ពានថ្ម ជិតគម្រោងអភិវឌ្ឍន៍លំនៅដ្ឋានបែបទំនើប និងប្រណីតភាពរបស់បុរីប៉េងហួត ដែលជាមជ្ឈមណ្ឌលពាណិជ្ជកម្មថ្មី នៃរាជធានីភ្នំពេញ ដោយមានផ្ទៃក្រឡាសរុបរហូតដល់ទៅ១៧៤,០០០ម៉ែត្រការ៉េ ដែលធំជាងផលបូកផ្ទៃក្រឡាផ្សារទំនើប AEON 1 (៦៨០០០ ម៉ែត្រការ៉េ) និងផ្សារទំនើប AEON 2 ខណ្ឌសែនសុខ (១០០០០០ ម៉ែត្រការ៉េ)។
ជាមួយនឹងវត្តមានរបស់ផ្សារទំនើប AEON3 គេជឿជាក់ថា នឹងមានភាពល្អប្រសើរច្រើនជាងបញ្ហាប្រឈម ដោយសារតែផ្សារទំនើបAEON បានផ្តោតសំខាន់ទៅលើអតិថិជនកម្រិតមធ្យម ដែអាចប្រមូលចំណែកទីផ្សារ មកពីតំបន់ជិតខាងបន្ថែមទៀត ដែលខុសប្លែកពីមជ្ឈមណ្ឌលពាណិជ្ជកម្ម និងផ្សារទំនើបមួយចំនួនទៀត ដែលនឹងបង្ហាញខ្លួនជិតគ្នាបានជ្រើសរើសអតិថិជនកម្រិតខ្ពស់ ឬកម្រិតអភិជន៕
