ដោយៈ គង់ សូរិយា
ភ្នំពេញៈ គំរោងខុនដូថ្មីៗចំនួន១០ ដែលមានយូនីតសរុបចំនួន១៤,០០០នឹងបញ្ច ប់ការសាងសង់ និងដាក់ឲ្យដំណើរការលើទីផ្សារនៅដំណាច់ឆ្នាំ២០២១នេះ នៅរាជធានីភ្នំពេញ។ នេះបើតាមរបាយការណ៍របស់ក្រុមហ៊ុនCBRE Cambodia។
របាយការណ៍ដដែលបានឲ្យដឹងថា គិតត្រឹមដំណាច់ឆ្នាំ២០២០កន្លងមកនេះ នៅរាជធានីភ្នំពេញ មានគំរោងខុនដូចំនួន១០០អាគារបានដាក់ចូលទីផ្សារ ដែលមានយូនីតសរុបចំនួន២៥,០០០ ខណៈពេលរយៈពេល១ឆ្នាំ២០២០ មានគំរោងខុនដូចំនួន១៧គំរោង និងមានយូនីតសរុប១០,០០០បានដាក់ចូលទីផ្សារ។
លោកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ឲ្យដឹងកាលពីចុងសប្តាហ៍មុនថា និន្នាការទិញខុនដូរបស់ប្រជាពលរដ្ឋខ្មែរនាពេលបច្ចុប្បន្ននេះ គឺពួកគាត់ទិញសម្រាប់រស់នៅ ជាជាងសម្រាប់ទុកវិនិយោគយកផលចំណេញ ឬទិញសម្រាប់ជួល។
លោកស្រីបន្តថា “ការវិនិយោគលើខុនដូមានអត្រាចំណេញពីការវិនិយោគទាប បើធៀបនឹងការទិញលំនៅដ្ឋាន និងអត្រាចំណេញពីការវិនិយោគបានថយពីកម្រិត៧ មកត្រឹម៥ភាគរយ”។លោកស្រីបន្តថា “ហេតុនេះទីផ្សារខុនដូ កំពុងមានការប្រែប្រួលពីអ្នកទិញ ដោយអ្នកទិញភាគច្រើនជាជនជាតិខ្មែរនាពេលបច្ចុប្បន្ននេះ”។
ជាមួយគ្នានេះ លោកខន គង្គាអគ្គនាយកក្រុមហ៊ុនERA Cambodiaបានមានប្រសាសន៍ឲ្យដឹងផងដែរថា ទីផ្សារខុនដូបានផ្តោតលើអតិថិជនបរទេសភាគច្រើន សំរាប់គំរោងលំដាប់ប្រណីត ប៉ុន្តែខុនដូមានតម្លៃមធ្យមភាគច្រើនផ្តោតលើទីផ្សារក្នុងស្រុក ហើយការលក់នៅតែដំណើរការយឺតជាងមុន ដោយសារកម្ពុជាកំពុងស្ថិតក្នុងកំឡុងវិបត្តិកូវីដ១៩ក្តី។
លោកបន្តថា “ទោះជាយ៉ាងណាការវិនិយោគខុនដូនាពេលនេះ មានឳកាសចំណេញខ្ពស់ ដោយសារការលក់បញ្ចុះតម្លៃពិសេសពីម្ចាស់គំរោងនានា”៕
