ដោយៈសុខុម
ឌូបៃ: ពេលនិយាយដល់អគារខ្ពស់ៗកប់ពពក អ្នកប្រាកដជានឹកឃើញដល់ក្រុងឌូបៃមុនគេ ព្រោះនៅទីនោះ សម្បូរទៅដោយអគារខ្ពស់ៗកប់ពពក ឬអាចនិយាយបានថាអគារអណ្ដែតលើផ្ទៃពពក ដ៏សែនស្រស់ស្អាតប្រៀបនឹងឋានសួគ៌។
សម្រាប់អាគារដ៏ស្រស់ស្អាត និងទាក់ទាញនេះ ក៏ស្ថិតនៅក្នុងក្រុងឌូបៃដែរ។ ថ្វីដ្បិតតែអគារមជ្ឈមណ្ឌល នវានុវត្តន៍សូឡា Solar Innovation Centre នេះមិនមែនជាអគារខ្ពស់កប់ពពកក្ដី ក៏វាជាអគារដ៏អស្ចារ្យមួយ ដែលល្បីល្បាញពាសពេញពិភពលោកជាមួយនឹងរចនាប័ទ្មរាងរមួលៗ ដូចស្ករទាញតាំងពីក្រោមរហូត ដល់កំពូលគួរឱ្យភ្ញាក់ផ្អើល។
ឌីហ្សាញឡើងដោយក្រុមហ៊ុនស្ថាបត្យកម្ម Kettle Collective និងទទួលសាងសង់ដោយក្រុមហ៊ុនម៉ៅការសាងសង់ Hadeed Emirates Contracting Company អគារនេះត្រូវបានសាងសង់រួចរាល់ជាស្ថាពរនៅក្នុងឆ្នាំ២០១។
អគារនេះមាន៤ជាន់ កម្ពស់៨៨ម៉ែត្រ និងមានផ្ទៃក្រឡាសរុប៤.៣៥៥ម៉ែត្រការ៉េ។ នៅជាន់ខាងក្រោមជាកន្លែងទទួលភ្ញៀវ ជាន់ទី១ ជាសារមន្ទីររបស់រដ្ឋាករទឹក និងអគ្គិសនីក្រុងឌូបៃ (DEWA) ព្រមទាំងសាលប្រជុំ។ ចំណែកឯជាន់ទី២ មានបន្ទប់សម្រាប់ធ្វើបាឋកថា មជ្ឈមណ្ឌលចែករំលែកចំណេះដឹង បន្ទប់ពិសោធន៍ បន្ទប់បណ្ដុះបណ្ដាល។
នៅជាន់ទី៣ គឺជាភោជនីយដ្ឋាន និងកន្លែងអង្គុយលេង ចំណែកឯជាន់ទី៤ គឺជាកន្លែងគយគន់ទេសភាពក្នុងឧទ្យានសូឡាទាំងមូល។
អគារនេះស្ថិតក្នុងដំណាក់កាលទី៣ នៃគម្រោងអភិវឌ្ឍន៍ឧទ្យានសូឡា Mohammed bin Rashid Al Maktoum Solar Park ដែលជាឧទ្យានសូឡាដ៏ធំធំបំផុតក្នុងពិភពលោក។ឧទ្យានសូឡានេះ មានគម្រោងផលិតថាមពលអគ្គិសនី ឱ្យបាន៥.០០០មេហ្គាវ៉ាត់នៅត្រឹមឆ្នាំ២០៣០ ជាមួយនឹងទំហំវិនិយោគរហូត ដល់ទៅ១៣,៦ពាន់លានដុល្លារអាមេរិក។
អគារនេះ ពិតជាបានជួយពង្រឹងសមត្ថភាព របស់ប្រទេសអារ៉ាប់រួមអេមីរ៉ាត ដែលមានប្រជាជនប្រមាណ៩,៩៩លាននាក់ នៅក្នុងការប្រកួតប្រជែងលើវិស័យថាមពលកកើតឡើងវិញ។ ទន្ទឹមនេះ វាក៏បានជួយគាំទ្រដល់យុទ្ធសាស្ត្រ ថាមពលកកើតឡើងវិញរបស់ក្រុងឌូបៃ ដែលមានបំណងផ្គត់ផ្គង់ឱ្យបាន៧៥% នៃការផ្គត់ផ្គង់ថាមពលសរុបក្នុងក្រុង ដែលមានប្រជាជនរស់នៅប្រមាណ៣,៣៨លាននាក់មួយនេះនៅត្រឹមឆ្នាំ២០៥០ផងដែរ។
អគារសូឡាដ៏ធំបែបនេះ គឺជាអគារដំបូងមិនធ្លាប់មាន នៅតំបន់មជ្ឈិមបូព៌ា និងអាហ្វ្រិកខាងជើង។
បច្ចុប្បន្ន អគារនេះបានក្លាយជាតំបន់ទេសចរណ៍ ដ៏ពេញនិយមមួយដែលបើកទទួលស្វាគមន៍ភ្ញៀវគ្រប់វ័យរួមមានសិស្សនិស្សិត គ្រួសារ ពាណិជ្ជករ និងអ្នកអាជីព។ ពេលទៅដល់ទីនោះ ក្រុមការងារនឹងជូនអ្នកដើរទស្សនា ហើយអ្នកនឹងទទួលបានឱកាសសិក្សារៀនសូត្រ និងយល់ដឹងអំពីសារៈសំខាន់ នៃបច្ចេកវិទ្យាថាមពលកកើតឡើងវិញ៕
