ដោយៈ រ៉ាណេត
ភ្នំពេញៈ បន្ថែមពីលើគម្រោងដែលមានស្រាប់ ក្រោមការបណ្តាក់ទុនវិនិយោគដោយក្រុមហ៊ុន OCIC ប្រមាណ៦០០០លានដុល្លារ ក្នុងការបង្កើតក្រុងរណបដ៏ទំនើបដំបូងគេនៅកម្ពុជា បច្ចុប្បន្នតំបន់ជ្រោយចង្វារ បាននិងកំពុងលេចចេញនូវគម្រោងអភិវឌ្ឍន៍ធំៗបន្ថែមទៀត ដែលកាន់តែធ្វើឱ្យមានភាពលេចធ្លោជាងគេ នៅតំបន់ត្រើយម្ខាងរាជធានីភ្នំពេញ។
នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រីតាំង ហួរ បានមានប្រសាសន៍ប្រាប់នៅល្ងាចថ្ងៃទី៦ ខែមេសា ឆ្នាំ២០២១កន្លងមកថា នៅតំបន់ដែលបានរៀបរាប់ខាងលើនេះ ភាគច្រើនត្រូវបានទិញទុក ដោយក្រុមហ៊ុនអភិវឌ្ឍន៍ដ៏ធំប្រចាំប្រទេស OCIC របស់អ្នកឧកញ៉ាពុង ឃាវសែ សម្រាប់អភិវឌ្ឍន៍ជាក្រុងរណបបែបទំនើបប្រចាំប្រទេស។
លោកស្រីបានបន្តថា “នៅក្នុងគម្រោងអភិវឌ្ឍន៍ក្រុងរណបមួយនេះ នឹងមានការសាងសង់ជាមជ្ឈមណ្ឌលពាណិជ្ជកម្ម តំបន់កម្សាន្ត តំបន់លំនៅដ្ឋានបែបប្រណីតដែលមានតម្លៃរហូតដល់ខ្ទង់លានដុល្លារ” ។ លោកស្រីបន្តថា “ក្រៅពីនេះនៅមានមណ្ឌលពិណ័រដែលមានទំហំធំថែមទៀត។ ម្យ៉ាងទៀត បន្តពីគម្រោងទីក្រុងរណបរបស់ក្រុមហ៊ុន OCIC នៅមានគម្រោងបង្កើតក្រុមរណបមួយទៀត របស់ក្រុមហ៊ុនលីយ៉ុងមួយទៀត បន្ថែមពីលើគម្រោងអភិវឌ្ឍន៍បុរីធំៗជាង១០គម្រោង ដែលកំពុងដំណើរការនៅពេលបច្ចុប្បន្ន” ។
បច្ចុប្បន្នតំបន់នេះមានបុរី និងទីក្រុងរណបធំៗជាច្រើនបានបញ្ចប់ការសាងសង់ និងកំពុងបន្តការសាងសង់ដូចជា បុរីប៉េង ហួត បុរី The Mekong Royal បុរីភ្នំពេញ ផាក បុរីអ័រគីដេឌឹបូតានិក និងទីក្រុងរណបរបស់គំរោងនេះជាដើម។
លោកស្រីតាំង ហួរបានបន្តថា ចាប់ពីចំណុចគល់ស្ពានជ្រោយចង្វារ រហូតដល់គល់ស្ពានដែក ស្របតាមដងទន្លេមិនសូវមានដីទំនេរនោះទេ ព្រោះក្រៅពីដីដែលត្រូវបានទិញទុកដោយក្រុមហ៊ុន OCIC គឺជាដីរបស់អ្នកសម្បូរធនធាន សម្រាប់សង់ធ្វើជាវីឡាប្រណីតកម្រិតអភិជន។
ដោយឡែកសម្រាប់តំបន់ ដែលនៅស្របផ្លូវជាតិលេខ៦A ក៏មិនសូវមានដីទំនេរដែរ ដែលក្រៅពីមានគម្រោងសាងសង់អគារពាណិជ្ជកម្ម គឺមានគម្រោងបុរីខ្នាតយក្ស ដែលមានដើមទុន រាប់រយលានដុល្លារចូលទៅអភិវឌ្ឍន៍។ ដូច្នេះមិនយូរទៀតនោះទេ តំបន់នេះនឹងប្រែរូបរាងក្លាយទៅជាទីក្រុងដ៏ប្រណីត និងទាក់ទាញខ្លាំងជាងតំបន់អភិវឌ្ឍន៍នៅផ្លូវ៦០ម៉ែត្រនោះទៀត។
ជាក់ស្ដែងនៅពេលបច្ចុប្បន្ននេះ បើទោះជាកំពុងប្រឈមនឹងបញ្ហាកូវីដក៏ដោយ ក៏គម្រោងសាងសង់ជាច្រើន កំពុងតែបន្តដំណើរការរបស់ខ្លួន ដោយមិនមានការផ្អាកនោះទេ។
ជាមួយគ្នានេះ លោកទូច សំណាង អគ្គនាយករងក្រុមហ៊ុន OCIC ធ្លាប់បានមានប្រសាសន៍ថា ទស្សនទាននៃការអភិវឌ្ឍទីក្រុងរណបជ្រោយចង្វារ ទីក្រុងនៃអនាគត ក្រុមហ៊ុនកំពុងរៀបចំផែនការអភិវឌ្ឍន៍ជាទីក្រុង Smart City ឬទីក្រុងឆ្លាតវៃ ដោយរៀបចំប្រព័ន្ឋហេដ្ឋារចនាសម្ព័ន្ឋក្រោមដី មានការបែងចែករវាងទឹកភ្លៀង និងទឹកស្អុយចេញពីលំនៅ ដ្ឋាន រៀបចំទីក្រុងនេះបែបបៃតង (Green City) រៀបចំប្រព័ន្ឋបំពាក់អគ្គិសនីដោយប្រើប្រាស់អំពូលLED ដែលកាត់បន្ថយការបំពុលបរិស្ថាន និងសន្សំសំចៃអគ្គិសនី។
លោកបន្តថា “ទស្សនទាននៃការអភិវឌ្ឍនៅតំបន់នេះ កំពុងរៀបចំជាទីក្រុងពាណិជ្ជកម្ម ដែលមានភាពស្រដៀងគ្នា នឹងតំបន់ពាណិជ្ជកម្មនានា នៅលើមហាវិថីព្រះមុនីវង្ស” ។ លោកបន្តថា “ទីក្រុងនេះនឹងមានការសាងសង់អាគារខ្ពស់ៗ ជាច្រើននាពេលអនាគត ខណៈគំរោងជាច្រើនបានចាប់ផ្តើម និងខ្លះបានផ្អាកដោយសារវិបត្តិជំងឺកូវីដ១៩” ៕
