ដោយៈ រ៉ាណេត
ភ្នំពេញៈ អ្នកជំនាញដែលធ្លាប់មានបទពិសោធន៍ជាច្រើនឆ្នាំ នៅក្នុងវិស័យអចលនទ្រព្យ បានលើកទឹកចិត្តដល់អ្នករកស៊ី ក្នុងវិស័យអចលនទ្រព្យថ្មោងថ្មី ដែលកំពុងជួបបញ្ហាប្រឈមទៅនឹងវិបត្តិ នៃជំងឺកូវីដ១៩នាពេលបច្ចុប្បន្ននេះ គប្បីកុំបាក់ទឹកចិត្ត ប៉ុន្តែត្រូវប្ដូរយុទ្ធសាស្ត្រ បង្កើនការប្រុងប្រយ័ត្ន និងសិក្សាឱ្យបានច្បាស់មុនពេលវិនិយោគ។
លោកស្រីតាំង ហួរ នាយិកាក្រុមហ៊ុនភ្នាក់ងារអចលនទ្រព្យ Amatak Property Service បានថ្លែងថា បច្ចុប្បន្ននេះមិនថា អ្នកប្រកបមុខជំនួញក្នុងវិស័យអ្វីនោះទេ គឺភាគច្រើន កំពុងតែទទទួលរងនូវផលប៉ះពាល់ស្ទើរទាំងអស់។
លោកស្រីបញ្ជាក់ថា “ក្នុងដំណាក់កាលនេះមនុស្សភាគច្រើន ក៏ដូចជាអ្នករកស៊ីផ្សេងៗសុទ្ធតែទទួលរងនូវផលប៉ះពាល់ ប៉ុន្តែចំពោះអ្នករកស៊ីដែលឆ្លាត នៅតែអាចឆ្លាតឱកាស ស្វែងរកផលចំណេញពីស្ថានការដែលលំបាកនេះបាន” ។ លោកស្រីបន្តថា “នៅក្នុងស្ថានការណ៍ យើងទទួលស្គាល់ថាពិតជាលំបាក ជាពិសេសសម្រាប់អ្នកដែលទើបចូលប្រឡូកនៅក្នុងវិស័យអចលនទ្រព្យថ្មីថ្មោង ខ្វះបទពិសោធន៍” ។
លោកស្រីបន្តថា ប៉ុន្តែសូមកុំបាក់ទឹកចិត្តក្នុងដំណាក់កាលនេះ ហើយត្រូវតែផ្លាស់ប្ដូរយុទ្ធសាស្ត្រ ក្នុងការបន្តដំណើរវិនិយោគរបស់ខ្លួន ជាពិសេសគួរយកឱកាសនេះ ដើម្បីស្វែងយល់បន្ថែម សម្រាប់ការត្រៀមខ្លួនឈានជើង ចូលក្នុងទីផ្សារអចលនទ្រព្យក្រោយពេលស្ថានការបានធូស្រាល ដែលលោកស្រីគិតថា យ៉ាងយូរត្រឹមដើមឆ្នាំក្រោយ។
លោកស្រីតាំង ហួរ បានបញ្ជាក់ថា “វាជាការពិត នៅពេលដែលមនុស្សមិនហ៊ានចេញដើរក្រៅ វានឹងធ្វើឱ្យចរន្តសេដ្ឋកិច្ចមិនដើរដូចគ្នា ប៉ុន្តែវាមិនមានរយៈពេលយូនោះទេ” ។ លោកស្រីបន្ថែមថា “ក្នុងនាមយើងជាអ្នករកស៊ី គឺមិនត្រូវខ្លាចនោះទេ តែគួរបង្កើនក្ដីប្រុងប្រយ័ត្ន និងការពារសុវត្ថិភាពសុខភាព ព្រោះសម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា បានប្រកាសពីការជំរុញឱ្យប្រជាពលរដ្ឋ ទទួលចាក់វ៉ាក់សាំងឱ្យបានគ្រប់ៗគ្នា” ។
ជាមួយគ្នានេះ លោក ឡុង គឹមសួគ៌ អគ្គនាយកក្រុមហ៊ុន Century21 Advance បានថ្លែងថា នៅក្នុងអំឡុងពេលនេះ ទីផ្សារអចលនទ្រព្យរបស់កម្ពុជា បាននឹងកំពុងប្រឈមយ៉ាងខ្លាំង ជាពិសេសម្ចាស់ក្រុមហ៊ុនអចលនទ្រព្យតូចល្មមៗ អាចនឹងប្រឈមនឹងការដួលរំលំមិនខាន បើសិនជាជំងឺកូវីដ១៩ នៅក្នុងប្រទេសបន្តអូសបន្លាយកាន់តែយូរទៅមុខ។
លោកបញ្ជាក់ថា “ស្ថានការវានឹងល្អឡើងវិញ ក្រោយពេលពលរដ្ឋកម្ពុជាទទួលបានការចាក់វ៉ាក់សាំងកាន់តែច្រើន ជាងពេលបច្ចុប្បន្ន ដែលអាចកាត់បន្ថយភាពប្រឈមការរាលដាល។ នៅពេលមនុស្សចាប់ផ្តើមចេញដើរសាជាថ្មី នោះទីផ្សារអចលនទ្រព្យក៏នឹងងើបឡើងវិញ” ។
ទោះជាយ៉ាងណា លោកឡុង គឺមសួគ៌ បានក្រើនរំលឹក និងលើកទឹកចិត្តដល់បណ្តាអ្នករកស៊ីនៅក្នុងវិស័យអចលនទ្រព្យថ្មីថ្មោង ឬទ្រង់ទ្រាយតូចថា នៅក្នុងអំឡុងពេលនេះម្ចាស់ក្រុមហ៊ុន ត្រូវធ្វើយ៉ាងណាខិតខំប្រឹងប្រែងទប់ខ្លួនកុំឱ្យដួល តាមរយៈកាត់បន្ថយការចំណាយណាមួយដែលមិនចាំបាច់។ បន្ថែមពីនេះត្រូវមានការប្រុងប្រយ័ត្ន និងសិក្សាឱ្យបានល្អិតល្អន់ មុនពេលវិនិយោគដើម្បីយកចំណេញ ប៉ុន្តែមិនត្រូវបាក់ទឹកចិត្តនោះទេ៕
