បច្ចុប្បន្នការសាងសង់សំណង់ ខុនដូរ វីឡា ផ្ទះល្វែង កំពង់មានសកម្មភាពកាន់តែខ្លាំងឡើងៗនៅក្នុងរាជធានីភ្នំពេញ ដែលជាចលករជំរុញឱ្យតម្លៃដីកាន់តែមានសន្ទុះខ្លាំងឡើងៗ ទន្ទឹមគ្នានោះផងដែរ ដូច្នេះក្រៅពីរាជធានីភ្នំពេញ តើខេត្តណាខ្លះដីមានសក្តានុពលខ្លាំងទន្ទឹមគ្នានេះដែរ?
លោកបណ្ឌិត គឹម ហ៊ាង ប្រធានសមាគមអ្នកវាយតម្លៃអចលនទ្រព្យកម្ពុជា មានប្រសាសន៍ថា ក្រៅពីរាជធានីភ្នំពេញតម្លៃដីកំពុងមានសក្តាឡើងខ្លាំង នៅខេត្តដែលមានសក្តានុពល ក្នុងវិស័យទេសចរណ៍។
លោកថាខេត្តដែលមានសក្តានុពលទេសចរណ៍ជាងគេ គឺខេត្តសៀមរាប ដោយសារទីនោះ ជាអតីតព្រះបរមរាជវាំងរបស់ព្រះមហាក្សត្រជំនាន់មុនៗ បន្សល់ទុកនូវប្រាសាទបូរាណសំបូរបែប និងល្អផ្តាច់គេនៅក្នុងតំបន់អាស៊ី សម្រាប់ទាក់ទាញទេសចរមកទស្សនាកម្សាន្ត ដែលជាចំណែកមួយជួយដល់កំណើនសេដ្ឋកិច្ចប្រជាជនក្នុងខេត្តនោះ។
យោងទៅលើកំណើនទេសចរ កើនឡើងជាប្រចាំនេះហើយ ទើបធ្វើឱ្យសំណង់សណ្ឋគារទំនើបៗខ្នាតអន្តរជាតិ ផ្ទះសំណាក់ ក្លឹបក្សាន្ត រួមនិងសំណង់ផ្ទះល្វែងរីកលូតលាស់យ៉ាងខ្លាំង ជាចំណែកសំខាន់ធ្វើឱ្យសកម្មភាពពុះដីឡូរ និងការសាងសង់ផ្ទះល្វែង មានចំនួនកើនឡើងគួរកត់សម្គាល់។ ក្រៅពីខេត្តសៀមរាប កំពង់សោមក៍មានសន្ទុះដីឡើងថ្លៃខ្លាំងកប់ពពកដូចនៅក្នុងរាជធានីភ្នំពេញដែរ ជាក់ស្តែងជនជាតិចិនបានចូលមករស់នៅកាន់តែច្រើនឡើងៗ និងសកម្មភាពនៃការសាងសង់អគារសណ្ឋាគារ ខុនដូរ និងកាស៊ីណូទំនើបៗកំពុងតែពុះកញ្ច្រូលឡើងដូចគ្នា។
បន្ទាប់ពីកំពង់សោម កំពតក៍ជាមជ្ឈមណ្ឌលទេសចរណ៍កម្សាន្តមាត់សមុទ្រ ដ៏មានសក្តានុពលផងដែរ ហើយបច្ចុប្បន្នគេសង្កេតឃើញថា ចលនាទិញលក់ដី សកម្មភាពពុះដីឡូតិ៍លក់ សកម្មភាពសាងសង់ទីកន្លែងកម្សាន្ត និងការសាងសង់អគារស្នាក់នៅផ្សេងៗ ក៏មានការកើនឡើងផងដែរ។
ក្រៅពីខេត្តទេសចរណ៍ទាំង3 បាត់ដំបងក៍មានសក្តានុពលរដ្ឋដីធ្លីនេះដែរ ដោយជាខេត្តដែលមានទីក្រុងធំទូលាយ មានការចរាចរណ៍ទំនិញខ្លាំង ពិសេសមានសំណង់អាគារប្រវត្តិសាស្រ្តបន្សល់ពីសម័យបុរាណ ឬបន្សល់ពីសម័យបារាំងជាច្រើន។ បច្ចុប្បន្នការកើនឡើងនៃតម្លៃដីក៍កំពុងបែឆ្ពោះទៅខេត្តកំពង់ចាមផងដែរ ដែលគេសង្កេតឃើញថា សកម្មភាពសាង់សាង់ផ្ទះល្វែងលក់ក៍មានការរីកលូតលាស់ខ្លាំងដែរនៅទីនោះផងដែរ៕
