ដោយៈ ប៊ី
ភ្នំពេញៈ មជ្ឈមណ្ឌលកម្សាន្តចំរុះដ៏ធំ និងល្បីល្បាញបំផុតរបស់ប្រទេសកម្ពុជា ណាហ្គា៣ (Naga3)ដែលគ្រោងបោះទុន៣៥០០លានដុល្លារ បាននិងកំពុងសាងសង់យ៉ាងសកម្ម ជាមួយការរចនាប្លង់ស្ថាបត្យកម្មចុងក្រោយ គឺអាគារខ្ពស់បំផុតនៃគម្រោងនេះមានកំពស់រហូតដល់៧៥ជាន់។
ការប្រកាសរបស់ក្រុមហ៊ុនNaga Corpបានឲ្យដឹងកាលពីពេលថ្មីៗនេះថា Naga3នឹងក្លាយជាអាគារខ្ពស់ជាងគេនៅកម្ពុជា នៅពេលការសាងសង់បញ្ចប់។
ក្រុមកម្មករ កាលពីខែមករា បានចាប់ផ្តើមបុកគ្រឹះ សម្រាប់គម្រោងដ៏ធំមួយនេះ។ ផ្អែកលើការគម្រោងរចនា លក្ខណៈពិសេសរបស់ណាហ្គា៣ នឹងជាប៉មសណ្ឋាគារកម្ពស់៧៥ជាន់។ ក្រុមអ្នកអភិវឌ្ឍគម្រោងនេះ បានឲ្យដឹងថា “គម្រោងនេះ នឹងក្លាយជាអាគារខ្ពស់ជាងគេនៅកម្ពុជា នៅពេលបញ្ចប់ការសាងសង់”។
គម្រោងដែលចំណាយទឹកប្រាក់ចំនួន៣,៥ពាន់លានដុល្លារ ដែលស្ថិតនៅសង្កាត់ទន្លេបាសាក់ រាជធានីភ្នំពេញ ក៏នឹងរួមបញ្ចូលទាំងប្លុកអគារសណ្ឋាគារ កម្ពស់៥២ជាន់ ចំនួនពីរផងដែរ។
នៅក្នុងបរិវេណនោះ នឹងមានប្លុកវេទិកាពហុមុខងារចំនួន១៧ជាន់ (ផលិតផលរចនាបថជីវិត សួនឧទ្យានបច្ចេកវិទ្យាខ្ពស់ ការកម្សាន្ត បន្ទប់ប្រជុំ ការលើកទឹកចិត្ត មជ្ឈមណ្ឌលសន្និសីទ និងកន្លែងតាំងពិព័រណ៍នានា (MICE) ជាដើម។
ជាមួយគ្នានេះដែរ ក៏មានជាន់ក្រោមដីចំនួន៤ជាន់សម្រាប់ចំណតរថយន្ត និងសេវាគាំទ្រផ្សេងៗទៀតផងដែរ។
ណាហ្គា៣នឹងបន្ថែមបន្ទប់សណ្ឋាគារ និងបន្ទប់ប្រណីតជិត៣.០០០បន្ទប់ ទៅលើមជ្ឈមណ្ឌលណាហ្គាវើលដ៍ ដែលមានស្រាប់ផងដែរ។ ផ្ទៃដីសរុបសម្រាប់គម្រោងនេះ មានចំនួន៥០០,០០០ម៉ែត្រការ៉េ។ អ្នកអភិវឌ្ឍន៍ អ្នកម៉ៅការ និងអ្នករចនា សម្រាប់គម្រោងនេះ នឹងសាងសង់ស្របតាមស្តង់ដារអន្តរជាតិ។
ការរចនាកំពុងត្រូវបានគ្រប់គ្រងដោយក្រុមហ៊ុនអន្ដរជាតិ ដែលទទួលបានពានរង្វាន់ចំនួនពីរ គឺក្រុមហ៊ុន Steelman & Partners និងក្រុមហ៊ុន Skidmore, Ownings & Merrill LLP (SOM) ។
សេចក្តីថ្លែងការណ៍មួយរបស់ក្រុមហ៊ុន SOM បានឲ្យដឹងថា “ណាហ្គា ៣ នឹងក្លាយជាទីតាំងសម្គាល់ ដែលលិចធ្លោរបំផុត សម្រាប់ទីក្រុងភ្នំពេញនាពេលអនាគត។ ជាមួយនឹងចំណុចខ្ពស់បំផុត នៃប៉មប៉ែកខាងជើង អាចឲ្យឃើញនូវទិដ្ឋភាព ដែលគ្មានគូប្រៀបនៃទីក្រុងភ្នំពេញ និងតំបន់ជុំវិញនេះ”។
ទន្ទឹមនឹងនេះ ក្រុមហ៊ុន Jacobs Engineering គឺជាអ្នកដែលទទួលបាននូវតួនាទីចាត់ចែងការងារស៊ីវិល និងសំណង់។ ក្រុមហ៊ុន ដែលមានទីស្នាក់ការកណ្តាល នៅសហរដ្ឋអាមេរិកនេះ ស្ថិតនៅក្នុងចំណោមក្រុមហ៊ុនពិគ្រោះយោប ល់ផ្នែកវិស្វកម្មធំជាងគេបំផុត នៅលើពិភពលោក ដែលមាននិយោជិកចំនួន៥៥ ០០០ នាក់ ការិយាល័យ៤០០ នាក់ នៅក្នុងប្រទេសជាង៤០ ជាមួយប្រាក់ចំណូលប្រចាំឆ្នាំ ចំនួន១៣ពាន់លានដុល្លារ។
ក្រុមហ៊ុន CCAG Asia Co Ltd ត្រូវបានជ្រើសរើស ជាអ្នកម៉ៅការចម្បង។ ក្រុមហ៊ុនផ្សេងទៀតដែលកំពុងដើរតួយ៉ាងសំខាន់ នៅក្នុងគម្រោង រួមមាន KWA Consult Sdn Bhd (ទីប្រឹក្សាមេកានិក និងអគ្គិសនី) ក្រុមហ៊ុន ELP Quantity Surveyors Sdn Bhd (ទីប្រឹក្សា QS) និងក្រុមហ៊ុន Steelman Partners LLP (រចនាផ្ទៃខាងក្នុង)។
ក្រុមហ៊ុន Steelman Partners LLP មានមូលដ្ឋាន នៅសហរដ្ឋអាមេរិក ដែលបានរចនាកាស៊ីណូ និងរមណីយដ្ឋានជាច្រើន នៅជុំវិញពិភពលោក ក៏បានចូលរួមជាមួយគម្រោងណាហ្គា១ និងណាហ្គា២ផងដែរ។
ក្រុមហ៊ុន MCC International Co Ltd ត្រូវបានចុះបញ្ជីជាអ្នកម៉ៅការគ្រឹះក្នុងភាពជាដៃគូជាមួយក្រុមហ៊ុនជំនាញផ្នែកគ្រឹះ គឺជាក្រុមហ៊ុន Econpile Berhad. MCC International ដែលជាក្រុមហ៊ុនមួយ ក្នុងចំណោមបណ្តាក្រុមហ៊ុន Global Fortune 500 ដែលស្ថិតក្នុងចំណោមក្រុមហ៊ុនសំណង់ ដែលគ្រប់គ្រងដោយរដ្ឋធំជាងគេរបស់ប្រទេសចិន។ ក្រុមហ៊ុនត្រូវបានចុះបញ្ជីជាសាធារណៈនៅក្រុងសៀង ហុងកុង ខណៈក្រុមហ៊ុន Econpile Berhad គឺជាក្រុមហ៊ុនចុះបញ្ជីសាធារណៈរបស់ប្រទេសម៉ាឡេស៊ី។
យោងតាមក្រុមហ៊ុនណាហ្គាខប អ្នកម៉ៅការគ្រឹះឯកទេស ត្រូវបានជ្រើសរើសក្នុងចំណោមបណ្តាក្រុមហ៊ុន ដែលចូលរួមដេញថ្លៃអន្តរជាតិចំនួន១៤ ជាមួយនឹងការវាយតម្លៃយ៉ាងហ្មត់ចត់ និងទូលំទូលាយអំពីសមត្ថភាពបច្ចេកទេស បទពិសោធន៍ ភាពគ្រប់គ្រាន់នៃគ្រឿងម៉ាស៊ីនសំណង់គ្រឹះ និងធនធានភូមិសាស្ត្រ រួមទាំងបទពិសោធន៍សាងសង់ពីលើចុះក្រោម៕
