ដោយៈ គង់ ម៉ាលីន
ភ្នំពេញៈ ក្រុមហ៊ុនVtrust Appraisal បានសហការជាមួយក្រុមហ៊ុន ក្រេឌីត ប្យួរ៉ូ ខេមបូឌា (ស៊ីប៊ីស៊ី) ដើម្បីផ្តល់សេវាកម្មវាយតម្លៃអចលនទ្រព្យ តាមបច្ចេកវិទ្យាឌីជីថលដល់គ្រឹះស្ថានហិរញ្ញវត្ថុដំបូងគេនៅកម្ពុជា ដែលនេះជាការបោះជំហានមួយកម្រិតថែមទៀតទៅក្នុងវិស័យអចលនទ្រព្យរបស់កម្ពុជា។
ការសហការគ្នារវាងក្រុមហ៊ុនទាំង២ ត្រូវចុះអនុស្សរណៈនៃការយោគយល់គ្នា (MoU) តាមប្រព័ន្ធវីដេអូ Zoom ដោយការព្រមព្រៀងធ្វើសមាហរណកម្មកម្មវិធីវាយតម្លៃអចលនទ្រព្យ តាមអ៊ីនឌីខេសិន ផ្លើស ភ្លេតហ្វម (Indication Plus Platform) របស់ក្រុមហ៊ុន វីត្រាស់ អឹព្រេហ្សល ទៅ ភ្លេតហ្វម នៃឧបករណ៍វាយតម្លៃឥណទានរបស់ក្រុមហ៊ុន ក្រេឌីត ប្យួរ៉ូ ខេមបូឌា (ស៊ីប៊ីស៊ី)។
ប្រធានក្រុមប្រឹក្សាភិបាលក្រុមហ៊ុនVtrust Appraisal លោក វង្ស សុខាល បានថ្លែងនៅក្នុងពិធីចុះហត្ថលេខាកាលពីថ្ងៃទី២៧ ឧសភាកន្លងមកថា កិច្ចសហការនេះនឹងបង្កើនប្រសិទ្ធភាព ប្រតិបត្តិការក្នុងវិស័យហិរញ្ញវត្ថុ និងជំរុញឱ្យការប្រើប្រាស់សេវាវាយតម្លៃអចលនទ្រព្យកាន់តែទូលំទូលាយ ដល់ស្ថាប័នហិរញ្ញវត្ថុទាំងអស់។
លោកបានអះអាងថា “Vtrust Appraisal ជាក្រុមហ៊ុនផ្តល់សេវាកម្មវាយតម្លៃអចលនទ្រព្យ ទំនើបបែបឌីជីថលដែលអាចវិភាគ និងចេញជារបាយការណ៍វាយតម្លៃអចលនទ្រព្យសង្ខេប និងមានលក្ខណៈពេញលេញដោយស្វ័យប្រវត្តិ ដោយមានការរៀបចំចងជាប្រព័ន្ធរូបមន្តត្រឹមត្រូវដោយអ្នកជំនាញ និងតាមស្តង់ដាវាយតម្លៃអចលទ្រព្យអន្តរជាតិ”។ លោកបន្តថា “លើសពីនេះអ្នកប្រើប្រាស់ អាចពិនិត្យមើលការវិវត្តនៃដំណើរការវាយតម្លៃ ចាប់ពីពេលបានដាក់បញ្ជូនសំណើ រហូតដល់ចេញជារបាយការណ៍វាយតម្លៃសង្ខេបជាស្ថាពរ”។
តាមរយៈសេវា អ៊ីនឌីខេសិន ផ្លើស ភ្លេតហ្វម នេះ លោកអ្នកអាចចូលប្រើ និងស្នើការវាយតម្លៃអចលនទ្រព្យ] បានគ្រប់ពេលវេលា ងាយស្រួល ឆាប់រហ័សប្រកបដោយទំនុកចិត្តខ្ពស់ ព្រមទាំងបានដឹងពីតម្លៃអចលនទ្រព្យគ្រប់ទីកន្លែងនៅទូទាំងប្រទេស ដែលអ្វីៗស្ថិតក្នុងដៃរបស់លោកអ្នកតែម្តង។
លោកសុខាលបានបញ្ជាក់ថា ភ្លេតហ្វមដែលបានបង្កើតឡើង មានផ្ទុកទិន្នន័យទូលំទូលាយ និងមានវិសាលភាពនៅទូទាំងប្រទេស៕
