ដោយៈគង់ សូរិយា
ភ្នំពេញៈ ក្រុមហ៊ុនម៉ាឡេស៊ីដ៏ធំមួយ SUNWAH Group បាននិងកំពុងត្រៀមសាងសង់មជ្ឈមណ្ឌលពាណិជ្ជកម្ម និងលំនៅដ្ឋានបែបសហកម្មសិទ្ឋកំពស់៥២ជាន់ធំមួយនៅក្បែរមជ្ឈមណ្ឌលកំសាន្ត និងកាស៊ីណូNaga1។
យោងតាមប្រភពព៌តមានដែលគួរឲ្យទុកចិត្តបាន ដែលកំពុងចចារលើការដេញថ្លៃសាងសង់ និងការងារបច្ចេកទេសសំរាប់អាគារខ្ពស់ៗនៅកម្ពុជា និងលើពិភពលោកបានបង្ហើបឲ្យដឹងថា បច្ចុប្បន្នក្រុមហ៊ុនSUNWAH កំពុងសិក្សា និងចចារជាមួយក្រុមហ៊ុនសាងសង់ និងក្រុមហ៊ុនបច្ចេកទេសត្រួតពិនិត្យអាគារ ដើម្បីចាប់ផ្តើមបុកគ្រឹះសាងសង់អាគារកំពស់៥២ជាន់ ដែលមានកំពស់២១៦ម៉ែត្រ នៅជិតគំរោងThe PeAk និងជិតគំរោងNaga Wolrd1។
លោកបន្តថា “តាមផែនការគំរោងដ៏ធំនេះ នឹងចាប់ផ្តើមបុកគ្រឹះសាងសង់នៅដើមខែកក្កដាខាងមុខនេះ ប៉ុន្តែប្រសិនជាការសិក្សា និងចចារមិនបញ្ចប់តាមផែនការជាមួយក្រុមហ៊ុនសាងសង់ ការបុកគ្រឹះសាងសង់អាចពន្យាពេលបន្តទៀតឬយ៉ាងណា លោកមិនអាចបញ្ជាក់បាននៅឡើយទេ”។ លោកបន្តថា “ក្រុមហ៊ុននេះដើមឡើយគ្រោងសាងសង់អាគារពាណិជ្ជកម្មបី ឬបួនអាគារ ប៉ុន្តែតាមព៌តមានដែលទទួលបានពេលនេះ គឺក្រុមហ៊ុននឹងសាងសង់តែអាគារកំពស់៥២ជាន់មួយសិនប៉ុណ្ណោះ”។
ក្រុមហ៊ុនSUNWAH ដែលមានមូលដ្ឋានធំនៅក្រៅប្រទេសនេះ បានប្រកាសវិនិយោគគម្រោងនៅតំបន់នេះជាយូរមកហើយ ប៉ុន្តែការសាងសង់ឬចាប់ផ្តើមគំរោងរបស់ខ្លួនបានលើកពេលជាបន្តបន្ទាប់ ដោយសារបញ្ហាផ្ទៃក្នុងមួយចំនួន។
នៅជុំវិញគម្រោងនេះបច្ចុប្បន្ន សុទ្ឋតែជាបណ្តុំអាគារពាណិជ្ជកម្ម និងលំនៅដ្ឋានសហកម្មសិទ្ឋដូចជាគម្រោង The Bridge, The PeAK, The Mesong កំពស់៦៩ជាន់ដែលកំពុងសាងសង់យឺតៗ និងគំរោងជាច្រើនទៀតដែលបាននិងកំពុងសាងសង់ និងទើបបញ្ចប់កាលពីពេលថ្មីៗនេះ៕
