ដោយៈ គៀតឈូ
តូក្យូៈ វិស័យឧស្សាហកម្មរបស់ជប៉ុន បានធ្លាក់ចុះយ៉ាងខ្លាំងប្រចាំខែឧសភា ដោយសារការផលិតរថយន្តបានធ្លាក់ចុះយ៉ាងខ្លាំង ដែលធ្វើឱ្យខូចខាតដល់ការស្ទុះងើបឡើងវិញរបស់សេដ្ឋកិច្ចប្រទេសនេះ ខណៈប៉ុន្មានសប្តាហ៍ខាងមុននេះទីក្រុងតូក្យូ គ្រោងនឹងធ្វើជាម្ចាស់ផ្ទះកីឡាអូឡាំពិក។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៣០ ខែមិថុនា ឆ្នាំ២០២១។
ការស្ទង់មតិរបស់សេដ្ឋវិទូបានបង្ហាញថា នៅក្នុងខែឧសភានេះ ប្រទេសដែលមានសេដ្ឋកិច្ចធំលំដាប់ទី៣ នៅលើពិភពលោកមួយនេះ បានកើនឡើងក្នុងល្បឿនយឺតជាងការគិតក្នុងត្រីមាសបច្ចុប្បន្ន ដោយសារការធ្លាក់ចុះនៃការចំណាយរបស់អ្នកប្រើប្រាស់។
ទិន្ន័យផ្លូវការបានបង្ហាញ នៅពីថ្ងៃពុធនេះថា ទិន្នផលរោងចក្របានធ្លាក់ចុះ៥,៩ភាគរយនៅក្នុងខែឧសភា ធៀបនឹងខែមុន ដែលបានរងផលប៉ះពាល់ដោយការធ្លាក់ចុះនៃការផលិតរថយន្ត និងគ្រឿងម៉ាស៊ីនផលិតកម្ម និងធ្លាក់ចុះខ្លាំងធំបំផុត ធៀបនឹងខែឧសភាឆ្នាំមុន។
ការធ្លាក់ចុះដែលជាការធ្លាក់ចុះលើកដំបូង ក្នុងរយៈពេល៣ខែ គឺទាបជាងការព្យាករណ៍ធ្លាក់ចុះចំនួន ២,៤ ភាគរយនៅក្នុងការស្ទង់មតិរបស់អ្នកសេដ្ឋកិច្ច វាបានធ្វើតាមការកើនឡើង២,៩ភាគរយនៅក្នុងខែមុននេះ។ ការធ្លាក់ចុះចំនួន១៩,៤ភាគរយនៃផលិតកម្មយានយន្តភាគច្រើន គឺដោយសារតែបញ្ហាផ្គត់ផ្គង់បន្ទះឈីបអេឡិចត្រូនិច។
ក្រុមអ្នកផលិតដែលត្រូវបានស្ទង់មតិ ដោយក្រសួងសេដ្ឋកិច្ចពាណិជ្ជកម្ម និងឧស្សាហកម្ម (METI)បានរំពឹងថា ទិន្នផលនឹងស្ទុះងើបឡើងវិញ៩,១ភាគរយនៅក្នុងខែមិថុនា បន្ទាប់មកការធ្លាក់ចុះ១,៤ភាគរយក្នុងខែកក្កដា។
រដ្ឋាភិបាលបានរក្សាការវាយតម្លៃផលិតផលឧស្សាហកម្មថា មិនផ្លាស់ប្តូរដោយនិយាយថាវាកំពុងកើនឡើងវិញ។
ទិន្នន័យដាច់ដោយឡែកកាលពីថ្ងៃអង្គារបានបង្ហាញថា ការលក់រាយបានកើនឡើងក្នុងរយៈពេលបីខែជាប់គ្នាគិតត្រឹម ខែឧសភា ប៉ុន្តែនៅតែមានការព្រួយបារម្ភក្នុងការងើបឡើងវិញនៃសេដ្ឋកិច្ច ដោយសារវិបត្តិកូវីដ១៩។
សេដ្ឋកិច្ចរបស់ប្រទេសជប៉ុន បានធ្លាក់ចុះនៅក្នុងត្រីមាសទី១ ដោយសារការចាក់វ៉ាក់សាំងយឺត និងបណ្ដាលឱ្យការឆ្លងបានកើនឡើង ហើយប៉ះពាល់ដល់តម្រូវការក្នុងស្រុក។ ទោះបីជាមានការថយចុះក៏ដោយ ក៏រដ្ឋមន្រ្តីក្រសួងសេដ្ឋកិច្ចលោក Yasutoshi Nishimura រំពឹងថា សេដ្ឋកិច្ចនឹងវិលត្រឡប់ទៅរកកម្រិតមុន វិបត្តិជំងឺកូវីដ១៩វិញ នាខែមីនា ឆ្នាំ២០២២ ខាងមុខ៕
