ដោយៈស៊ីវ ម៉េង
ភ្នំពេញៈ លោកស្រីតាំង ហួរនាយិកាក្រុមហ៊ុន AMATAK Property Service បានមានប្រសាសន៍ថា តំបន់ឆ្នេរកម្ពុជានៅតាមបណ្តាខេត្តទាំងបួន សុទ្ឋតែមានសក្តានុពលក្នុងការវិនិយោគលើអចលនទ្រព្យ ពិសេសផ្នែកដីធ្លី។
លោកស្រីបានមានប្រសាសន៍បន្ទាប់ពីចុះបំពេញការងារ នៅតាមបណ្តាខេត្តទាំងបួនខាងលើកាលពីសប្តាហ៍៍មុនថា ការរីកចម្រើនវិស័យអចលនទ្រព្យ នឹងបន្តកើនឡើងនៅតាមបណ្តាខេត្តទាំងនោះ ដោយសារខេត្តទាំងនោះ មានសក្តានុពលធនធានធម្មជាតិ ពិសេសតំបន់ទាំងនោះមានភ្នំ មានទឹកជ្រោះ និងទឹកសមុទ្រខៀវស្រងាត់ ដែលអំណោយផលដល់ការរស់នៅនិងវិនិយោគ។
លោកស្រីបន្តថា “តម្លៃដីធ្លីនៅតែមានតម្លៃសមរម្យ ដែលអំណោយផលដល់ការវិនិយោគយកផលចំណេញ”។លោកស្រីបន្តថា “រហូតមកទល់ពេលនេះ អ្នកមានលុយច្រើននៅតែបន្តវិនិយោគ ព្រោះពួកគេមើលឃើញផលចំណេញខ្ពស់នាពេលអនាគត ដោយសារវិស័យនេះ នឹងបន្តរីកចម្រើនរយៈពេលវែងបន្តទៀត”។
លោកស្រីតាំង ហួរបានបន្តថា ឱកាសវិនិយោគនាពេលនេះ ពិតជាល្អប្រសើរ ដោយសារអាចរកបានអចលនទ្រព្យតម្លៃល្អ ដែលមើលឃើញឱកាសចំណេញខ្ពស់ ព្រោះបន្ទាប់ពីបញ្ចប់វិបត្តិកូវីដ១៩ វិស័យអចលនទ្រព្យកម្ពុជា នឹងមានសន្ទុះឡើងខ្ពស់មួយកម្រិតទៀត។
ខេត្តជាប់តំបន់ឆ្នេរត្រូវបានផ្នែកឯកជន ក្នុងវិស័យទេសចរណ៍ហៅថា តំបន់ K4 ដែលសំដៅដល់ខេត្តកំពង់សោម កំពត កែប និងខេត្តកោះកុង ខណៈខេត្តទាំងបួនមានសក្តានុពលផ្សេងៗគ្នា និងគំរោងអភិវឌ្ឍន៍ធំៗជាច្រើន កំពុងឆ្ពោះទៅកាន់ខេត្តនេះកាន់តែច្រើន និងកើនឡើងថែមទៀតនាពេលអនាគត៕
