ដោយៈគង់ សូរិយា
ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានបើកកិច្ចប្រជុំលើការព្រាអអនុក្រិតស្តីពីការគ្រប់គ្រងលើកិច្ចការ ប្រើប្រាស់ដីចំណីផ្លូវនៅតាមបណ្តោយផ្លូវថ្នល់ និងផ្លូវរថភ្លើង។
កិច្ចប្រជុំនេះដឹកនាំដោយលោក ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន។
កិច្ចប្រជុំនេះធ្វើឡើងក្នុងគោលបំណងពិនិត្យពិភាក្សា និងកែសម្រួលសេចក្តីព្រាងអនុក្រឹត្យស្តីពីការគ្រប់ គ្រងលើកិច្ចការប្រើប្រាស់ដីចំណីផ្លូវ នៅតាមបណ្តោយផ្លូវថ្នល់ និងផ្លូវរថភ្លើង ក៏ដូចជាដើម្បីប្រមូលធាតុ ចូលឱ្យកាន់តែទូលំទូលាយ ដើម្បីបំពេញមន្ថែមចំណុចខ្វះខាត ធ្វើយ៉ាងណាឱ្យការរៀបចំសេចក្ដីព្រាងអនុក្រឹត្យនេះ មានខ្លឹមសារកាន់តែច្បាស់លាស់គ្រប់ជ្រុងជ្រោយ។
លោកប៉ាល់ ចន្ទតារាបានមានប្រសាសន៍ថា អនុក្រិតនេះមានគោលដៅក្នុងការទប់ស្កាត់ការរំលោភដីចំណីផ្លូវ និងបានជំរុញលើក ទឹកចិត្តឱ្យអង្គប្រជុំទាំងមូលចូលរួមជាមតិយោបល់ និងជួយគិតគូរយកចិត្តទុកដាក់ធ្វើយ៉ាងណា ឱ្យអនុក្រឹត្យនេះចេញទៅអាចអនុវត្តប្រកបដោយប្រសិទ្ធភាព និងភាពរលូន ចៀសផុតពីភាពស្រពេចស្រពិល ដល់មន្ត្រីអនុវត្តច្បាប់ និងមិនបង្កផលប៉ះពាល់ដល់ផលប្រយោជន៍ស្របច្បាប់។
ជាលទ្ធផលនៃការពិភាក្សា អង្គប្រជុំបានឯកភាពរក្សាទុកចំណងជើងអនុក្រឹត្យនេះឱ្យនៅដដែល យោងតាមតម្រូវការបន្ទាន់ និងសភាពការណ៍ជាក់ស្តែងនាពេលបច្ចុប្បន្ន និងផ្អែកលើលិខិតបទដ្ឋានមួយចំនួន ហើយយោងតាមគោលការណ៍ច្បាប់ ចំណងជើងត្រូវស្របតាមការចង្អុលបង្ហាញរបស់ច្បាប់ និងប្រវត្តិនៃការរៀបចំផងដែរ។
ជាមួយគ្នានោះផងដែរ លោកប៉ាល់ ចន្ទតារា បានស្នើឱ្យប្រធាននាយកដ្ឋាននីតិកម្មស្តីទីធ្វើការសម្រប សម្រួល និងស្នើសុំមតិយោបល់ពីមន្រ្តីពាក់ព័ន្ធទាំងអស់ ដើម្បីរៀបចំឡើងវិញអត្ថបទនៃមាត្រា១ថ្មីឱ្យស្រប ទៅតាមស្មារតី និងសេចក្តីជូនដំណឹងរបស់ទីស្តីការគណៈរដ្ឋមន្រ្តី សម្រាប់ដាក់ពិភាក្សាក្នុងកិច្ចប្រជុំលើកក្រោយ៕
