ដោយ គង់ សូរិយា
ភ្នំពេញ៖ គំរោងសាងសង់ផ្លូវតភ្ជាប់ពីភូមិភាគពាយ័ព្យ ទៅកាន់ភាគនារតីនៃខេត្តកោះកុងបានសិក្សាបញ្ចប់ហើយ និងមានកញ្ចប់ថវិកាក្រោមជំនួយ ពីរដ្ឋាភិបាលចិនរួចហើយ។
អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ឲ្យដឹងតាមទូរស័ព្ទនាថក្ងៃទី២៧ សីហានេះថា គំរោងសាងសង់ផ្លូវតភ្ជាប់ពីខេត្តបាត់ដំបង ទៅកាន់ខេត្តកោះកុងបានបញ្ចប់ទាំងស្រុងហើយ និងមានកញ្ចប់ថវិការួចហើយផងដែរ រង់ចាំតែពេលវេលាបើកការដ្ឋានសាងសង់ប៉ុណ្ណោះ។ ទោះជាយ៉ាងណាលោកមិនបញ្ជាក់ឲ្យដឹងពីគម្រោងនេះ នឹងចំណាយប៉ុន្មានរយលានដុល្លារនៅឡើយទេ។
លោកបន្តថា “ផ្លូវនេះមានប្រវែង១៩៥គីឡូម៉ែត្រ និងឆ្លងកាត់ខេត្តចំនួនបីរួមមានខេត្តបាត់ដំបង ពោធិសាត់ និងខេត្តកោះកុង”។
ទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនធ្លាប់បានមានប្រសាសន៍ថា ការសាងសង់ផ្លូវនេះមានសារៈសំខាន់ណាស់ ដើម្បីសមាហរណកម្មផ្ទៃក្នុងកម្ពុជា និងកាត់បន្ថយការពឹងផ្អែកប្រទេសជិតខាង ព្រោះកន្លងមកទំនិញឬកសិផលនានារបស់កម្ពុជាត្រូវពឹងផ្អែកលើប្រទេសជិតខាង ដែលយើងមានផលលំបាក។ហេតុនេះប្រសិនជាយើងសាងសង់ផ្លូវនេះបាន តាមចក្ខុវិស័យរបស់សម្តេចតេជោ យើងនឹងកាត់បន្ថយការពឹងផ្អែកប្រទេសជិតខាង ដោយយើងនឹងមានកំពង់ផែដឹកជញ្ជូនខ្លួនឯងឆ្ពោះទៅកាន់ប្រទេសដទៃទៀត។
លោកបន្តថា “នេះជាប្រវត្តិសាស្រ្តថ្មីមួយ ក្រោមការដឹកនាំរបស់ប្រមុខរដ្ឋាភិបាលកម្ពុជា ដែលកម្ពុជានឹងបន្តតភ្ជាប់នូវបណ្តាញផ្លូវគមនាគមន៍ ដើម្បីសម្រួលការដឹកជញ្ជូនក៏ដូចជាសមាហរណកម្មសេដ្ឋកិច្ចកម្ពុជា”៕
