ដោយ: ម៉ាលីស
ភ្នំពេញៈ នៅក្នុងការទិញអចលនទ្រព្យ រឿងមួយដែលសំខាន់ជាងគេមុននឹងសំរេចចិត្តទិញ គឺត្រូវដឹងពីប្រភេទប្លង់កម្មសិទ្ធ និងដំនើរការផ្ទេរសិទិ្ធ ដែលជាទូទៅមាន២ប្រភេទ គឺប្លង់ទន់ និងប្លង់រឹង។
តើប្រភេទប្លង់ឬប័ណ្ណកម្មសិទ្ឋទាំង២នេះ ត្រូវរៀបចំនិងធ្វើតាមនិតិវិធីយ៉ាងដូចម្តេច?
១ ប្លង់ទន់
ដោយហេតុថាប្លង់ទន់ អ្នកនៃចលនវត្ថុពុំមានការកំណត់ទទួលស្គាល់ ពេញលេញតាមផ្លូវច្បាប់ ដូច្នេះដំណើរការនៃការផ្ទេរសិទ្ធិ លើអចលនវត្ថុគឺធ្វើឡើងតាមរយៈការបញ្ជាក់លិខិតផ្ទេរសិទ្ធិ ជាការលក់ ឬធ្វើអំណោយពីសំណាក់អាជ្ញាធរមូលដ្ឋាន ចាប់ពីកម្រិតថ្នាក់ភូមិ ឃុំរហូតដល់ស្រុក រឺខណ្ឌ។
ប្លង់ទន់ គឺប្រើរយៈពេលតែ៣ រហូតដល់៧ថ្ងៃ អាស្រ័យទៅលើអាជ្ញាធរ ឃុំ/សង្កាត់ រវល់ឬមិនរវល់ គឺការផ្ទេរសិទ្ធិនិងបានសម្រេចជាស្ថាពរ ហើយការធ្វើប្លង់ទន់នេះមិនតម្រូវឲ្យបង់ពន្ធលើការផ្ទេរសិទ្ធិនោះឡើយ។ ប៉ុន្តែភាគីអ្នកទិញអចលនវត្ថុ នឹងត្រូវទទួលយកហានិភ័យនានាដែលពាក់ព័ន្ធ នឹងភាពស្រពេចស្រពិលនៃសិទ្ធិ ក្នុងប្លង់ទន់ព្រមទាំងកាតព្វកិច្ចដែលពាក់ព័ន្ធ។
ការធ្វើប្លង់ទន់ គឺម្ចាស់អចលនទ្រព្យក៏ត្រូវបំពេញលិខិតកិច្ចសន្យា ដើម្បីធានាថាផ្ទះ និងដីដែលកំពុងកាន់កាប់មិនប៉ះពាល់ដល់ដីរដ្ឋ។
២ ប្លង់ រឹងឬប្លង់ LMAP
ប្លង់រឹងគឺជាប្លង់ដែលទទួលសិទ្ធិស្របច្បាប់ លើការគ្រប់គ្រងអចលនទ្រព្យ ដូច្នេះត្រូវធ្វើចាប់ពី ភូមិ ឃុំ ស្រុក រឺខណ្ឌ និងរហូតដល់មន្ទីសុរិយោដី ប៉ុន្តែត្រូវចំណាយពេលជាមធ្យម៤៥ថ្ងៃ ដើម្បីចាត់ចែងផ្ទេរសិទ្ធិលើអចលនវត្ថុបាន គូភាគីត្រូវបំពេញបែបបទលើលិខិតយថាភូត ដោយប្រើប្រាស់ទម្រង់របស់រដ្ឋបាល សុរិយោដីដែលហៅថា លិខិតលក់ដាច់និងផ្តិត និងផ្តិតស្នាមមេដៃនៅចំពោះមុខមន្ត្រីមានសមត្ថកិច្ច។
នៅពេលមន្ត្រីសុរិយោដីបំពេញនីតិវិធី និងបែបបទក្នុងសមត្ថកិច្ចរបស់ខ្លួនរួចហើយ ច្បាប់តម្រូវឲ្យបង់ពន្ធប្រថាប់ត្រា លើការផ្ទេរសិទ្ធិលើអចលនវត្ថុ (អត្រា៤%នៃតម្លៃអចលនវត្ថុដែលវាយតំលៃដោយអាជ្ញាធរពន្ធដារ)៕
