ដោយសុខុម
វ៉ាស៊ីនតោន: វាពិតជាគួរឱ្យភ្ញាក់ផ្អើលយ៉ាងខ្លាំងដែលធ្លាយដំណឹងថា ពេលនេះសហរដ្ឋអាមេរិក បានជាប់បំណុលជាតិច្រើនសម្បើមមិនធ្លាប់មានក្នុងប្រវត្តិសាស្ត្រ ព្រោះកន្លងមកធ្លាប់តែឮថា ប្រទេសនេះតែងតែដើរជួយប្រទេសនានាទូទាំងពិភពលោកដើម្បីរក្សាទំនាក់ទំនងការទូតល្អ និងឥទ្ធិពលរបស់ខ្លួនក្នុងឋានៈជាមហាអំណាចទី១ របស់ពិភពលោកទាំងផ្នែកសព្វាវុធ និងសេដ្ឋកិច្ច។
យោងតាមទិន្នន័យរបស់ក្រសួងរតនាគារអាមេរិក ចេញផ្សាយកាលពីថ្ងៃអង្គារ ទី០១ កុម្ភៈ បង្ហាញថា បំណុលសាធារណៈ ឬ បំណុលជាតិសរុបរបស់សហរដ្ឋអាមេរិក នៅពេលនេះបានកើនលើស៣០ទ្រីលានដុល្លារ ទៅហើយ ជាកម្រិតថ្មីមួយដែលគួរឱ្យព្រួយបារម្ភយ៉ាងខ្លាំង។
រដ្ឋាភិបាលក្រុងវ៉ាស៊ីនតោន បានសម្រុកខ្ចីបុលអំឡុងវិបត្តិរីករាលដាលវីរុសកូវីដ-១៩ ដើម្បីចំណាយជំរុញសកម្មភាពសេដ្ឋកិច្ច ក្នុងគោលបំណងជួយស្រោចស្រង់សេដ្ឋកិច្ចពីវិបត្តិកូវីដ-១៩។ ជាលទ្ធផលបំណុលជាតិបានកើនឡើងប្រមាណ៧ទ្រីលានដុល្លារ ចាប់តាំងពីដំណាច់ឆ្នាំ២០១៩ មក។
បន្ទាប់ពីរក្សាអត្រាការប្រាក់ឱ្យនៅកម្រិតទាបបំផុតអស់រយៈពេលជាច្រើនឆ្នាំមកនេះ ធនាគារកណ្តាលអាមេរិក (Federal Reserve) កំពុងប្ដូរយុទ្ធសាស្ត្រថ្មីដើម្បីទប់អតិផរណាដែលកំពុងកើនឡើង។ ជាវិធានការ ធនាគារកណ្តាលអាមេរិក មានគម្រោងដំឡើងអត្រាការប្រាក់ជាបន្តបន្ទាប់ចាប់តាំងពីឆ្នាំ២០១៥ មក។ ប៉ុន្តែជាលទ្ធផល ការចំណាយកាន់តែខ្ពស់លើការខ្ចីបុលមិនត្រឹមតែមិនអាចជួយអ្វីបាននោះទេ ផ្ទុយមកវិញគឺធ្វើឱ្យខ្លួនកាន់តែពិបាកដោះបំណុលដែលគរដូចភ្នំ។
លោក David Kelly ប្រធានអ្នកធ្វើយុទ្ធសាស្រ្តទីផ្សារទូទាំងពិភពលោកនៃក្រុមហ៊ុនគ្រប់គ្រងទ្រព្យសកម្ម JPMorgan Asset Management បានលើកឡើងថា “វាមិនមែនជាវិបត្តិរយៈពេលខ្លីឡើយ ប៉ុន្តែវានឹងធ្វើឱ្យយើងកាន់តែក្រីក្ររយៈពេលវែង”។
យោងតាមមូលនិធិ Peter G. Peterson Foundation ជាអង្គការមួយដែលផ្តោតលើការលើកកម្ពស់ការយល់ដឹងអំពីបញ្ហាប្រឈមផ្នែកសារពើពន្ធឱ្យដឹងថា គ្រាន់តែការចំណាយលើការប្រាក់ត្រូវបានព្យាករណថានឹងមានចំនួនលើស៥ទ្រីលានដុល្លារ ក្នុងរយៈពេល១០ឆ្នាំខាងមុខ ហើយនឹងកើនឡើងជិតដល់ពាក់កណ្តាលនៃប្រាក់ចំណូលទាំងអស់របស់សហព័ន្ធ (ប្រាក់ចំណូលរបស់សហរដ្ឋអាមេរិក ទាំងមូល) នៅត្រឹមឆ្នាំ២០៥១។
លោក David Kelly បានគូសបញ្ជាក់ថា ការកើនឡើងថ្លៃចំណាយលើការខ្ចីបុលនឹងកំណត់ទំហំកញ្ចប់ថវិកាដែលរដ្ឋាភិបាលក្រុងវ៉ាស៊ីនតោន អាចចំណាយបានទៅលើបញ្ហាអាទិភាពផ្សេងៗទៀតដូចជាបញ្ហាបម្រែបម្រួលអាកាសធាតុជាដើម។
ពេលនេះរដ្ឋាភិបាលក្រុងវ៉ាស៊ីនតោន ជំពាក់បំណុលបណ្ដាវិនិយោគិនបរទេស និងអន្តរជាតិដែលដឹកនាំដោយប្រទេសជប៉ុន និងមហាយក្សចិន សរុបជិត៨ទ្រីលានដុល្លារ ក្នុងចំណោមបំណុលជាតិទាំង៣០ទ្រីលានដុល្លារ។ ហើយនៅទីបំផុត បំណុលទាំងនោះនឹងត្រូវសងត្រលប់ទៅវិញបូករួមជាមួយនឹងការប្រាក់៕ CNN៕
