ដោយៈ សុផារី
ភ្នំពេញៈ ក្រសួងសេដ្ឋកិច្ចនិងហិរញ្ញវត្ថុ និងក្រសួងប្រៃសណីយ៍និងទូរគមនាគមន៍ កាលពីថ្ងៃទី១០ ខែកុម្ភៈ បានចេញសេចក្តីប្រកាសព័ត៌មានឱ្យ ក្រុមហ៊ុនឃីង ថេកណឡជី (Opennet) ចូលមកបំពេញកាតព្វកិច្ចទូទាត់បំណុលជូនរដ្ឋជាកំហិត ដោយទុកពេលឱ្យ៧ថ្ងៃ។
តាមរយៈសេចក្តីជូនដំណឹងនេះ បានឱ្យដឹងថា ក្រុមហ៊ុនឃីង ថេកណឡជី (Opennet) ជាប្រតិបត្តិករផ្តល់សេវាអ៊ិនធឺណិត ដែលមិនទាន់បានអនុវត្តន៍ កាតព្វកិច្ចទូទាត់បំណុលជូនរដ្ឋនៅឡើយ ដោយក្រសួងទាំងពីរសម្រេចទុករយៈពេល៧ (ប្រាំពីរ)ថ្ងៃ គិតចាប់ពីថ្ងៃចេញសេចក្តីជូនដំណឹងនេះ ដើម្បីឱ្យក្រុមហ៊ុនចូលមកបំពេញកាតព្វកិច្ច ទូទាត់បំណុលនៃចំណូលបែងចែក (Revenue Share) និងបំណុលដទៃទៀតដែលក្រុមហ៊ុននៅជំពាក់រដ្ឋជាកំហិត។
ក្រសួងទាំងពីរបានឱ្យដឹងថា ក្នុងករណីក្រុមហ៊ុនឃីង ថេកណឡជី (Opennet) នៅតែគេចវេសមិនព្រមទូទាត់បំណុល ជូនរដ្ឋក្រសួងទាំងពីរនឹងចាត់វិធានការព្យួរអាជ្ញាបណ្ណរបស់ក្រុមហ៊ុន និងអនុវត្តមាត្រា៧៨ នៃច្បាប់ស្តីពីទូរគមនាគមន៍ ព្រមទាំងចាត់វិធានការដទៃទៀត ស្របតាមច្បាប់និងលិខិតបទដ្ឋានគតិយុត្តជាធរមាន៕
